1-2. Oonkalo dhini hadhi tu lilitha?

 ATUHENI ohatu iyadha tatu lili omathimbo nomathimbo. Ohashi vulika nokuli tu lile, uuna twa nyanyukwa unene. Pashiholelwa, otashi vulika wa lilile sho wa ningilwa oshinima sha ikalekelwa, ngaashi esiku omumwoye a valwa, wa dhimbulukwa oshinima shontumba shoka sha li she ku nyanyudha, nenge sho wa mono kuume koye ngoka wa ihula nale.

² Ihe nonando ongawo, olundji ohatu lili, molwaashoka twa hendwa komutima. Pashiholelwa, otashi vulika tu lile, uuna gumwe e tu uvitha nayi. Otashi vulika tu lile, molwaashoka tu na uuwehamwe omolwomukithi gwa kwata miiti, nenge twa nika oluhodhi omolweso lyagumwe ngoka tu hole unene. Moonkalo dha tya ngawo, otashi vulika tu kale tu uvite ngaashi omuhunganeki Jeremia a li e uvite, sho Jerusalem sha hanagulwa po kAababilon. Jeremia okwa ti: “Omeho gandje oga togala momulonga gwomahodhi . . . Omeho gandje otaga lili gaa na evululuko.” — Oontak. 3:48, 49.

3. Jehova oha kala e uvite ngiini, uuna e wete aapiya ye taya mono iihuna? (Jesaja 63:9)

³ Jehova oku shi iikando ayihe mbyoka twa lila, omolwoonkalo ndhoka dhi nikitha oluhodhi. Ombiimbeli otayi tu shilipaleke kutya oku shi oonkalo oondhigu ndhoka aapiya ye haya iyadha mudho, noha kala e tu uvite, uuna tatu lili tatu pula ekwatho kuye. (Eps. 34:15) Kakele owala kokukala e tu wete nokupulakena kutse, Jehova ohe tu ningile oshindji. Ngaashi owala omuvali omunahole, naye oha kala e tu uvitile ohenda, uuna e wete tatu lili, noha kala a hala oku tu kwathela. — Lesha Jesaja 63:9.

4. Oshike tatu vulu okwiilonga kiiholelwa yimwe yomOmbiimbeli kombinga yankene Jehova ha dhiladhila?

⁴ Okupitila mOohapu dhe, Jehova okwe tu hololela nkene a li a inyenge sho aapiya ye ya li ya nika oluhodhi. Shono otatu vulu oku shi mona mokutala koshiholelwa shaHanna, shaDavid  nosho wo shomukwaniilwa Hiskia. Oshike sha li she ya nikitha oluhodhi? Jehova okwa inyenge ngiini, sho ya li taya lili e ya kwathele? Ongiini oshiholelwa shawo tashi vulu oku tu hekeleka, uuna tatu lili omolwoluhodhi, twa kengelelwa kuyalwe, nenge twa kanitha etegameno?

UUNA TATU LILI OMOLWOLUHODHI

5. Onkalo yaHanna oya li ye mu ningitha a kale e uvite ngiini?

⁵ Hanna okwa li a piti moonkalo dhimwe ndhoka dhe mu ningitha a kale a nika oluhodhi. Ye naPeninna oya li ya hokanwa ombanda. Ihe Peninna okwa li e huge Hanna noonkondo. Nonando Hanna okwa li muudhigu mbono, ka li wo ha mono aanona, omanga Peninna a li e na aanona oyendji. (1 Sam. 1:1, 2) Peninna okwa li he mu sheke, molwaashoka ka li ha mono aanona. Mbela andola ongoye wa li monkalo ya tya ngawo, ando oto kala wu uvite ngiini? Hanna okwa li ha kala a geya nayi, ‘ta lili nokwa tindi okulya’ nokwa li e uvite unene ‘uudhigu komutima.’ — 1 Sam. 1:6, 7, 10.

6. Hanna okwa li a ningi po shike, opo a mone ehekeleko?

⁶ Hanna okwa li a mono ngiini ehekeleko? Oshinima shimwe shoka she mu kwathele, oosho a yi a ka longele Jehova ketsalihangano, ndyoka lya li ondingandinga yelongelokalunga lyashili. Sho a thiki ko, tashi vulika sho e li popepi nomweelo gokuya mehale lyetsalihangano ‘okwa tameke okugalikana kOmuwa e ta lili noonkondo.’ Okwa indile Jehova a ti: “Tala kuudhigu wandje e to dhimbulukwa ndje.” (1 Sam. 1:10b, 11) Hanna okwa li a galikana kuJehova te mu mbumbulile nkene e uvite. Jehova okwa li a uvu nayi, sho a mono omahodhi gomwanakadhona ngoka e hole unene.

7. Hanna okwa li a mono ehekeleko lini, sho a lombwele Jehova nkene e uvite?

⁷ Hanna okwa li a lombwele Jehova megalikano nkene e uvite nokwa li a pewa eshilipaleko kOmuyambi Omunene, Eli, kutya Jehova ota ka yamukula omagalikano ge. Ombiimbeli oya ti: “Okwa zi po e ta li ye ina sa we oluhodhi.” (1 Sam. 1:17, 18) Nonando onkalo ye ndjoka yi nikitha oluhodhi inayi lunduluka, Hanna okwa li e uvite a pepelelwa. Omutenge gwe gwokukala a gwililwa po pamaiyuvo, okwe gu gandja kuJehova. Jehova okwa li a mono nkene Hanna a nika oluhodhi, okwa uvu okulila kwe nolwanima okwe mu laleke nuuyamba mokukala ha mono aanona. — 1 Sam. 1:19, 20; 2:21.

8-9. Metsokumwe nAahebeli 10:24, 25, omolwashike atuheni tu na okuninga ngaashi tatu vulu, tu kale hatu kala pokugongala kopaKriste kehe? (Tala wo ethano.)

⁸ Iiyilongomwa kutse. Mbela oto ungaunga nonkalo ondhigu ndjoka hayi ku ningitha wu kale wa nika oluhodhi? Otashi vulika wa nika oluhodhi omolweso lyomukwanezimo, nenge lya kuume koye. Moonkalo dha tya ngawo, oshi li paunshitwe sho hatu kala twa hala okwiikalela. Ngaashi owala Hanna a li a mono ehekeleko netsomukumo, sho a yi ketsalihangano, nangoye oto vulu okumona ehekeleko mokukala ho yi  kokugongala kopaKriste kehe, nokuli nonando owu uvite wa gwililwa po. (Lesha Aahebeli 10:24, 25.) Sho tatu pulakene koovelise tadhi hekeleke, okuza mOmbiimbeli, uuna tu li pokugongala, Jehova ota vulu oku tu kwathela tu ethe po okudhiladhila iinima iiwinayi nokudhiladhila mbyoka iiwanawa. Shoka otashi vulu oku tu kwathela tu pangele omaiyuvo getu, nonando onkalo yetu itayi lunduluka meendelelo.

⁹ Aamwatate ohaye tu tsu omukumo nohaye tu ulukile nkene yetu hole, pokugongala kehe, nohatu kala tu uvite twa pepelelwa, uuna tu li nayo. (1 Tes. 5:11, 14) Natu taleni koshimoniwa shomumwatate omukokolindjila a ikalekelwa, ngoka a silwa omukulukadhi gwe. Okwa ti: “Omathimbo gamwe ohandi kala nda hala okukala ongame awike, oshoka ohandi kala tandi lili, molwaashoka onda yuulukwa omukulukadhi gwandje. Ihe ngele nda yi kokugongala, ohandi mono etsomukumo ndyoka nda pumbwa. Oohapu oombwanawa ndhoka aamwatate naamwameme haya lombwele ndje nosho wo omatyokosha gawo pokugongala, ohaga hekeleke ndje lela. Kutya nduno ondi kale ndi na iimpwiyu, nenge tandi ipula manga inaandi thika kokugongala, ohandi kala aluhe nda pepelelwa ngele nda thiki ko.” Uuna twa gongala, Jehova ota vulu okulongitha aamwatate naamwameme ye tu hekeleke.

10. Ongiini tatu vulu okulandula oshiholelwa shaHanna, uuna twa uvithwa nayi?

¹⁰ Hanna okwa li wo a mono ehekeleko sho a mbumbulile omutima gwe Jehova megalikano, nkene e uvite. Nangoye oto vulu ‘okutsika Jehova iimpwiyu yoye ayihe’ wu na einekelo kutya ote ke ku pulakena. (1 Pet. 5:7) Omumwameme gumwe ngoka omusamane gwe a dhipagwa kaayugi, okwa ti: “Onda li ndi uvite omutima gwandje gwa fa gwa tetwa muuntimbu uushona nokagu na we esiku gu aluke. Ihe uuna nda galikana kuJehova, Tate gwomegulu, ngoka e hole ndje noonkondo, onda li handi kala ndi uvite nda pepelelwa. Omathimbo gamwe kanda li handi kala ndi shi shoka ndi na okupopya, ihe okwa li e shi nkene ndi uvite. Sho nda li handi kala ndi na iimpwiyu nonda nika oluhodhi unene, onda li handi mu pula a pe ndje ombili. Onda li handi kala ndi uvite omutima nomomadhiladhilo gandje ga ngungumana, nokupula komeho.” Uuna wa lombwele Jehova iimpwiyu yoye, oha kala e wete nkene wa nika oluhodhi, noku uvite ko uuwehame woye. Nonando uudhigu woye inawu za po, Jehova ota vulu oku ku hekeleka noku ku kwathela wu kale wu na ombili. (Eps. 94:19; Fil. 4:6, 7) Ote ke ku yambeka, omolweidhidhimiko lyoye nuudhiginini woye. — Heb. 11:6.

UUNA TATU LILI OMOLWOKUKENGELELWA

11. Oonkalo oombwinayi ndhoka David a li a taalela, odhe mu ningitha a kale e uvite ngiini?

¹¹ Momukokomoko gwonkalamwenyo ye, David okwa li a idhidhimikile oonkalo oondhigu ndhoka dha li dhe mu lilitha. Okwa li e hugike kuyalwe nokwa li a kengelelwa kwaamboka a inekela. (1 Sam. 19:10, 11; 2 Sam. 15:10-14, 30) Pompito yimwe okwa nyola a ti: “Ngame onda dhengwa kuuwehame; kehe uusiku ombete yandje oya tuta kokulila kwandje, nontala yandje otayi hiha omahodhi.” Omolwashike David a li e uvite ngawo? Okwa yelitha a ti: “Omolwaatondi yandje.” (Eps. 6:6, 7) Oonkatu dhayalwe odha li dha ehameke David, nodhe mu ningitha a lile noonkondo.

12. Ngaashi sha popiwa mEpisalomi 56:8, David okwa li a tompwa kushike?

¹² Nonando David okwa li a piti moonkalo oondhigu, okwa li a tompwa kutya Jehova oku mu hole. Okwa nyola a ti: “Omuwa otu uvu okulila kwandje.” (Eps. 6:8) Pompito onkwawo, okwa popi oohapu tadhi pendutha ohokwe, ndhoka tadhi adhika mEpisalomi 56:8. (Lesha.) Oohapu ndhoka otadhi gandja ethano lya yela kutya Jehova oku tu hole unene noku na ko nasha  nankene hatu kala tu uvite. David okwa li e uvite Jehova a fa ta gongele omahodhi ge mekende, nenge te ga nyolele membo. Okwa li e na uushili kutya Jehova oku mu wete, noha dhimbulukwa uuwehame we. David okwa li a tompwa kutya He, omunahole gwomegulu, oku shi uupyakadhi we nosho wo nkene wa li we mu ningitha a kale e uvite.

13. Uuna yalwe ye tu uvitha nayi, oshike tashi vulu oku tu hekeleka? (Tala wo ethano.)

¹³ Iiyilongomwa kutse. Mbela owu uvite nayi pamaiyuvo, molwaashoka wa uvithwa nayi ku gumwe, nenge wa kengelelwa ku gumwe ngoka wa li wa inekela? Nenge tashi vulika wa dhengwa pomutima, molwaashoka ngoka wa li to endelathana naye e ku etha, nenge kuume koye kopandjokana e ku thigi po inaashi tegelelwa, nenge tashi vulika gumwe ngoka wu hole a etha po okulongela Jehova. Omumwatate gumwe ngoka omukulukadhi gwe a yi moluhondelo noku mu thiga po, okwa ti: “Onda li nda haluka noka nda li tandi shi itaale. Onda li ndi uvite kaandi na oshilonga, nda nika oluhodhi nonda geya.” Ngele owa kengelela kugumwe, nenge wa uvithwa nayi noonkondo, oto vulu okumona ehekeleko mokutseya kutya Jehova ke na esiku e ku thige po. Omumwatate okwa ti: “Onde shi ndhindhilika mo kutya aantu otashi vulika ya ndope okukala aadhiginini kungoye, ihe Jehova emanya lyetu. Kutya nduno oshike shi tu ningilwe, oha kala aluhe pamwe natse. Ita ka etha po nando aantu ye aadhiginini.” (Eps. 37:28) Dhimbulukwa wo kutya ohole yaJehova oyi vule kokule ndjoka yaantu. Nonando ohashi tu ehameke, uuna gumwe e tu uvitha nayi, shono ihashi lundulula omukalo moka Jehova e na ko nasha natse. (Rom. 8:38, 39) Oshitsa oshi li mpano kutya, nonando owu uvithwa nayi kugumwe shi thike peni, Ho, ngoka e li megulu oku ku hole.

14. Episalomi 34:18, otali tu pe eshilipaleko lini?

¹⁴ Ngele owa kengelelwa kugumwe, oto vulu oku hekelekwa koohapu dhaDavid, ndhoka tadhi adhika mEpisalomi 34:18. (Lesha.) Embo limwe lyuuyelele olya ti kutya “mboka ya kanitha etegameno,” otashi vulika ya kale ye uvite “kaaye na oshinima oshiwanawa shoka ya tegamena.” Mbela Jehova oha kwathele ngiini mboka haya kala ye uvite ngawo? Ngaashi owala omuvali omunahole ha papatele nokuhekeleka omwana ngoka a gwililwa po, Jehova naye “oku li popepi” natse nohe tu hekeleke, nokwa ilongekidha oku tu kwathela, uuna twa dhengwa pevi, molwaashoka twa kengelelwa, nenge twa silwa. Okwa halelela oku tu kwathela uuna twa gwililwa po, notwa dhengwa koomwenyo. Okwe tu pa wo iinima oyindji mbyoka tatu vulu okukala twa tegamena, mbyoka hayi tu kwathele tu idhidhimikile omashongo ngoka hatu iyadha mugo ngashingeyi. — Jes. 65:17.

 UUNA TATU LILI OMOLWOKWAANA ETEGAMENO

15. Hiskia okwa li a taalela onkalo yini, ndjoka ye mu ningitha a lile?

¹⁵ Omukwaniilwa Hiskia, sho a li e na omimvo 39, okwa li a kwatwa kuuvu wa kwatwa miiti. Omuhunganeki Jesaja okwa li a lombwele Hiskia etumwalaka lya za kuJehova kutya masiku ota ka sa komukithi ngoka. (2 Aak. 20:1) Sho Hiskia a uvu etumwalaka ndyoka, okwa li a gwililwa po nokulila noonkondo. Okwa li a galikana kuJehova nopwaa na ezimbuko. — 2 Aak. 20:2, 3.

16. Jehova okwa li a inyenge ngiini, sho Hiskia a galikana kuye ta lili?

¹⁶ Jehovah okwa li a uvu Hiskia, sho a galikana kuye ta lili, nokwe mu lombwele nohenda a ti: “Ondu uvu egalikano lyoye. Nonda mono omahodhi goye. Otandi ke ku aludha.” Okupitila muJesaja, Jehova okwa ulike ohenda nokwa uvaneke kutya ote ke mu kaleka nomwenyo uule wethimbo lyontumba, nokuhupitha Jerusalem miikaha yAayassur. — 2 Aak. 20:4-6.

17. Jehova ohe tu kwathele ngiini, uuna tatu ehama tatu ehamenene? (Episalomi 41:3) (Tala wo ethano.)

¹⁷ Iiyilongomwa kutse. Mbela owa taalela uuwehame mboka tawu ku ningitha wu kale kuu na etegameno? Popya naJehova okupitila megalikano, nokuli nando oto shi ningi to lili. Ombiimbeli otayi tu shilipaleke kutya, “Tate omunahenda, ngoka kuye haku zi ekwatho alihe,” ote ke tu hekeleka momaudhigu getu agehe. (2 Kor. 1:3, 4) Kunena, inatu tegelela Jehova a kuthe po omaudhigu getu agehe, ihe otatu vulu okukala aluhe twa inekela kutya ote ke tu kwathela. (Lesha Episalomi 41:3.) Okupitila mombepo ye ondjapuki, Jehovah ohe tu pe oonkondo, uunongo nombili yokomwenyo tu vule okwiidhidhimika. (Omayel. 18:14; Fil. 4:13) Ohe tu pe wo oonkondo okupitila metegameno ndyoka lya kankamena kOmbiimbeli kutya omauwehame agehe itaga ka kala po we. — Jes. 33:24.

18. Enyolo lini ho mono tali hekeleke, uuna to ungaunga nonkalo ndjoka ondhigu unene? (Tala oshimpungu, “ Oohapu tadhi hekeleke, uuna twa nika oluhodhi.”)

¹⁸ Hiskia okwa li a mono ehekeleko okuza moohapu dhaJehova, natse otatu vulu okumona ehekeleko okuza mOohapu dhaJehova. Jehova okwa nyolitha oohapu mOmbiimbeli tadhi hekeleke ndhoka tadhi vulu oku tu kwathela, uuna twa taalela oonkalo dhi nikitha oluhodhi. (Rom. 15:4) Sho omumwameme gumwe, ngoka ha zi muAfrika lyokUuninginino, a monika okankela, olundji okwa li ha lili. Ota hokolola ta ti: “Enyolo limwe ndyoka handi mono tali hekeleke oJesaja 26:3. Nonando omathimbo ogendji ihatu vulu oku kutha po uupyakadhi wetu, ovelise ndjono oya shilipaleka ndje kutya Jehova ota vulu oku tu pa ombili yokomwenyo, ndjoka hayi tu kwathele tu kale twa ngungumana notu idhidhimikile omaupyakadhi. Mbela opu na enyolo lyontumba ndyoka hali ku talaleke, uuna wa taalela onkalo oondhigu nongele ku na etegameno lyasha?

19. Mbela otwa tegelela onakuyiwa ya tya ngiini?

 ¹⁹ Otu li lela kolungenge lwomasiku gahugunina, onkene iinima mbyoka hayi tu lilitha, otayi ende tayi indjipala. Ihe ngaashi twa ilongo moshiholelwa shaHanna, shaDavid noshomukwaniilwa Hiskia, Jehova oha kala e tu wete, uuna tatu lili nohashi mu uvitha nayi. Omahodhi getu oge na lela ondilo momeho ge. Onkee ano uuna twa taalela oonkalo dhinikitha oluhodhi, oshi li pandunge okumbumbulila Jehova omutima gwetu okupitila megalikano. Inatu kambadhala nando tu itopole ko kaamwatate naamwameme megongalo, oshoka oye tu hole. Natu tsikileni okumona ehekeleko moohapu tadhi hekeleke ndhoka dhi li mOmbiimbeli. Otatu vulu okukala tu na uushili kutya ngele otwa tsikile okwiidhidhimika nuudhiginini, Jehova ote ke tu pa ondjambi. Shono osha kwatela mo euvaneko ndyoka ewanawa kutya masiku ota ka theta po omahodhi agehe goluhodhi, gokukengelelwa nogo ku kala kaatu na etegameno, momeho getu. (Eh. 21:4) Opo nduno otatu ka lila owala omahodhi genyanyu.