1. Oshike tashi ulike kutya Omanyolo oga li ga simana kuJesus?

 KASHA li tuu oshiwanawa okupulakena kuJesus sho ta longo aantu! Olundji okwa li ha popi Omanyolo omayapuki momutse. Nokuli oohapu ndhoka Jesus a popi manga inaa ninginithwa naandhoka a popi hugunina manga inaa sa, okwa li e dhi totha mOmanyolo. b (Deut. 8:3; Eps. 31:5; Luk. 4:4; 23:46) Momukokomoko gwomimvo ndatu netata okuza peninginitho lye sigo opeso lye, Jesus okwa li wo olundji ha leshele aantu Omanyolo montaneho, noha totha mugo e te ge ya fatululile. — Mat. 5:17, 18, 21, 22, 27, 28; Luk. 4:16-20.

2. Oshike sha li sha kwathele Jesus a tseye nawa Omanyolo sho ta koko? (Tala ethano lyokombanda.)

² Uule womimvo odhindji manga Jesus inaa tameka okuuvitha, okwa li ha lesha noha pulakene Oohapu dhaKalunga olundji. Osha yela kutya okwa li ha uvu Maria naJosef taya totha momanyolo sho taya popi megumbo. c (Deut. 6:6, 7) Otatu vulu okukala nuushili kutya Jesus okwa li ha yi kosinagoga mEsabati kehe naantu yaandjawo. (Luk. 4:16) Kosinagoga oku na okukala a li ha pulakene nuukeka, sho Omanyolo taga leshwa. Mokweendela ko kwethimbo, Jesus okwa li i ilongo okulesha Omanyolo ngoka Omayapuki kuye mwene. Onkee ano, Jesus ka li owala e shi Omanyolo nawa, ihe okwa li wo e ga hole nokwa li e ga etha ga wilike  oonkatu dhe. Pashiholelwa, dhiladhila kwaashoka sha li sha ningwa motempeli, sho Jesus a li owala e na omimvo 12. Aalongimpango mboka ya li ye shi nawa Ompango yaMoses, oya li ya “kuminwa oondunge [dhaJesus] nomayamukulo ge.” — Luk. 2:46, 47, 52.

3. Oshike tatu ka kundathana moshitopolwa shika?

³ Natse otatu vulu okutseya Oohapu dhaKalunga nokutameka okukala tu dhi hole, ngele ohatu dhi lesha pandjigilile. Ihe ongiini tatu vulu okumona mo uuwanawa mwaashoka tatu lesha? Otatu vulu okwiilonga kwaashoka Jesus a li a lombwele mboka ya li ye shi nawa Ompango, mwa kwatelwa aalongimpango, Aafarisayi nAasadukayi. Aawiliki yomalongelokalunga mboka, oya li haya lesha olundji Omanyolo, ihe kaya li haya mono mo uuwanawa mwaashoka taya lesha. Jesus okwa li a tsu omuthindo iinima itatu mbyoka aalumentu mboka ya li ye na okuninga, opo ya vule okumona mo uuwanawa mOmanyolo. Oohapu ndhoka e ya lombwele otadhi tu kwathele tu hwepopaleke uunkulungu wetu (1) tu uve ko shoka tatu lesha, (2) tu mone omaliko mOmbiimbeli nosho wo (3) tu ethe Oohapu dhaKalunga dhi lundulule okukalamwenyo kwetu.

4. Lukas 10:25-29 ote tu longo shike kombinga yokulesha Oohapu dhaKalunga?

⁴ Otwa hala okuuva ko kutya Oohapu dhaKalunga otadhi ti ngiini, uuna tatu dhi lesha. Ngele hasho, otashi vulika kaatu mone mo uuwanawa lela mwaashoka tatu lesha. Pashiholelwa, natu taleni koonkundathana ndhoka Jesus a li a ningi ‘nomunongompango gumwe.’ (Lesha Lukas 10:25-29.) Sho omulumentu ngoka a pula kutya oshike a pumbwa okuninga, opo a ka mone omwenyo gwaaluhe, Jesus okwe mu kwathele a mone eyamukulo mOohapu dhaKalunga. Jesus okwe mu pula a ti: ‘Omanyolo otaga ti ngiini? Oho lesha mo ngiini?’ (Yelekanitha OB-1954.) Omulumentu ngoka okwa li a vulu okugandja eyamukulo li li mondjila, sho a totha mOmanyolo kombinga yokuhola Kalunga nomuntu omukwawo. (Lev. 19:18; Deut. 6:5) Ihe ndhindhilika shoka a pula ishewe. Okwa ti: “Mukwetu olye?” Omulumentu ngoka oku ulike kutya ka li u uvite ko shoka a lesha. Onkee ka li e shi kutya omanyolo ngono ne ga tule ngiini miilonga monkalamwenyo ye.

5. Okugalikana nosho wo okulesha to ende kashona, otayi vulu ngiini oku ku kwathela wu uve ko nawa shoka to lesha?

⁵ Otatu vulu okuuva ko nawa Oohapu dhaKalunga, ngele otwa kala tu na ondjigilile yoku dhi lesha. Mpaka otapu landula omaetopo gamwe ngoka taga vulu oku ku kwathela. Tango galikana manga inoo tameka okulesha. Otwa pumbwa ekwatho lyaJehova, tu vule okuuva ko Oohapu dhe. Onkee natu kale hatu mu pula e tu pe ombepo ye ondjapuki, opo tu vule okugandja eitulomo kwaashoka tatu lesha. Opo nduno lesha to ende kashona. Shoka otashi ku kwathele wu uve ko shoka to lesha. Otashi vulika wu shi mone kutya ohashi ku etele uuwanawa, ngele owa lesha muule nenge wa leshele pamwe newi lyOmbiimbeli ya kwatwa. Kungawo, otashi ke ku kwathela wu vule okuuva ko, okudhimbulukwa nokwiilonga oshindji shoka to lesha mOohapu dhaKalunga. (Jos. 1:8) Ngele wa mana okulesha, galikana natango wu pandule Jehova, omolwomagano gOohapu dhe noku mu pula e ku kwathele wu tule miilonga shoka wa lesha.

6. Omolwashike okwiipula omapulo nokunyola omaidhimbulukitho omafupi, taku ku kwathele wu uve ko shoka wa lesha? (Tala wo ethano.)

⁶ Mpaka opu na ishewe omaetopo gaali tage ku kwathele wu uve ko Ombiimbeli. Ipula omapulo kombinga yaashoka to lesha. Uuna to lesha ehokololo lyontumba ipula ngeyi: ‘Oolye  taya dhana onkandangala mehokololo ndika? Olye ta popi? Ota popi nalye, nomolwashike? Oshiningwanima shoka otashi ningilwa peni nuunake?’ Omapulo ngono otage ke ku kwathela wu kale to dhiladhila nowu mone kutya ehokololo otali popi kombinga yashike. Shimwe ishewe, ninga omaidhimbulukitho omafupi uuna to lesha. Uuna wa nyola kombinga yaashoka wa lesha, oho kala unene to dhiladhila kombinga yasho nohashi ku kwathele wu shi uve ko nawa. Shoka wa nyola otashi ke ku kwathela wo wu dhimbulukwe shoka wa lesha. Oto vulu okunyola omapulo, okunyola iinima mbyoka wa mona sho wa ningi omapekapeko, okungonga omanenedhiladhilo gaashoka wa lesha nokunyola nkene to ke shi longitha, nenge wu nyole owala nkene wu uvite kombinga yasho. Omaidhimbulukitho ngoka wa nyola otaga vulu oku ku kwathela wu tale ko Oohapu dhaKalunga dhi li etumwalaka lye ndyoka e ku nunina.

7. Uukwatya wuni twa pumbwa sho tatu lesha, nomolwashike? (Mateus 24:15)

⁷ Jesus okwa li a popi uukwatya wa simana mboka twa pumbwa, opo tu uve ko shoka tatu lesha mOohapu dhaKalunga, ano uukwatya wokundhindhilika nenge oondunge dhokuyoolola. (Lesha Mateus 24:15.) Okundhindhilika oshike? Okuvula okuuva ko nkene omadhiladhilo ga kwatathana nankene ga yooloka ko komakwawo nokumona nziya shoka inaashi popiwa sha yela. Shimwe ishewe, Jesus okwa li e shi ulike kutya otwa pumbwa okukala hatu ndhindhilike shoka tatu lesha, opo tu mone iiningwanima mbyoka tayi gwanitha po omahunganeko gOmbiimbeli. Otwa pumbwa wo uukwatya mboka, tu mone mo uuwanawa thiluthilu mwaashoka tatu lesha mOmbiimbeli.

8. Ongiini tatu vulu okulongitha oondunge dhokuyoolola sho tatu lesha?

⁸ Jehova oha pe aapiya ye oondunge dhokuyoolola. Onkee galikana kuye noku mu pula e ku kwathele wu kale wu dhi na. (Omayel. 2:6) Ongiini to vulu okukala metsokumwe negalikano lyoye? Konakona nuukeka shoka to lesha, nokundhindhilika nkene sha pambathana  niinima mbyoka wu shi nale. Longitha iileshomwa yetu ya kankamena kOmbiimbeli yi ku kwathele moku shi ninga. Pashiholelwa, oto vulu okulongitha Embo lyokukonga uuyelele lyOonzapo dhaJehova. Iileshomwa mbyoka otayi ku kwathela wu uve ko shoka to lesha mOmbiimbeli kutya otashi ti ngiini, nowu mone omikalo moka to vulu oku shi tula miilonga monkalamwenyo yoye. (Heb. 5:14) Uuna to lesha noondunge dhokuyoolola, oto ka uva ko nawa omanyolo.

9. Oshili yini ya simana yopaManyolo Aasadukayi ya li inaa ya taamba ko?

⁹ Aasadukayi oya li ye shi nawa omambo gatano gotango gOmanyolo gOshihebeli, ihe kaya li ya taamba ko iinima ya simana mbyoka tayi adhika momambo ngoka ga nwethwa mo. Pashiholelwa, natu tale nkene Jesus a li i inyenge sho a pulwa kAasadukayi kombinga yeyumuko. Okwa li e ya yamukula a ti: “Inamu lesha nani membo lyaMoses mehokololo tali popi oshihwa sheno? Moka Kalunga a lombwele Moses ta ti: ‘Ongame Kalunga kaAbraham, Kalunga kalsak naKalunga kaJakob.’” (Mark. 12:18, 26) Nonando Aasadukayi ehokololo ndyoka oye na okukala ya li ye li lesha iikando oyindji, epulo lyaJesus otali ulike kutya kaya li ya taamba ko oshili ya simana yopaManyolo, ano elongo kombinga yeyumuko. — Mark. 12:27; Luk. 20:38. d

10. Otu na okugandja eitulomo kushike uuna tatu lesha?

¹⁰ Oshiilongomwa oshini? Uuna tatu lesha, otwa hala okumona kutya ehokololo lyontumba nenge ovelise yontumba mOmbiimbeli otayi vulu oku tu longa shike. Inatu hala owala okuuva ko omalongo gopetameko, ihe nayilwe wo yomuule nosho wo omakotampango kaage shi omapu okumona.

11. Metsokumwe naTimoteus omutiyali 3:16, 17, ongiini to vulu okumona omaliko mOmbiimbeli?

¹¹ Ongiini to vulu okumona omaliko mOmbiimbeli sho to yi lesha? Tala shoka Timoteus omutiyali 3:16, 17 ta ti. (Lesha.) Ndhindhilika kutya ‘Enyolo kehe oli na oshilonga’ (1) shokulonga, (2) shokukumagidha, (3) shokupukulula nosho wo (4) shokuulukila omuntu ondjila ya uka. Oto vulu okumona nokuli iinima mbyoka ine nomomambo gOmbiimbeli ngoka ihoo longitha naanaa. Konakona ehokololo nokutala shoka tali ku longo kombinga yaJehova, yelalakano lye, nenge kombinga yomakotampango gopakalunga. Tala nkene tali kwathele mokukumagidha omuntu. Shi ninga mokundhindhilika nkene oovelise tadhi ku kwathele wu mone nenge wu yande omahalo omawinayi nenge omikalo omiwinayi, nowu kale omudhiginini kuJehova. Konakona nkene ehokololo ndyoka to vulu oku li longitha mokupukulula etaloko lya puka, tashi vulika lya gumwe ngoka wa mona miilonga yokuuvitha. Tala wo nkene oovelise ndhoka tadhi ku ulukile ondjila yu uka, ndjoka tayi vulu oku ku dheula wu kale ho tala ko iinima ngaashi Jehova.  Ngele owa kala ho kaleke iinima mbika ine momadhiladhilo, oto ka mona omaliko mOmbiimbeli, ngoka taga vulu oku ku kwathela wu mone mo lela uuwanawa mokulesha Ombiimbeli.

12. Omolwashike Jesus a li a pula Aafarisayi epulo ndika kutya: “Inamu lesha nani?”

¹² Jesus okwa li wo a pula epulo ndika a ti: “Inamu lesha nani?,” opo a ulike kutya Aafarisayi oye na etaloko lya puka kombinga yaashoka haya lesha mOmanyolo. (Mat. 12:1-7) e Pompito ndjoka, Aafarisayi oya li ya popi kutya aalongwa yaJesus oya yona Ompango yEsabati. Jesus okwe ya yamukula ngiini? Okwa popi iiholelwa iyali yopaManyolo, e ta totha ovelise yimwe membo lyaHosea a ulukile Aafarisayi mboka kutya kaya li ye uvite ko Ompango yEsabati kutya oyi lile po shike nokaya li haya sile omuntu ohenda. Omolwashike aalumentu mboka kaaya li ya zulwa kwaashoka haya lesha mOohapu dhaKalunga? Omolwaashoka oya li haye dhi lesha taye dhi sheke noye na ombepo yuuntsa. Iikala yawo iiwinayi oye ya imbi yu uve ko shoka taya lesha. — Mat. 23:23; Joh. 5:39, 40.

13. Otu na okulesha Ombiimbeli nelalakano lyashike, nomolwashike?

¹³ Moohapu dhaJesus ohatu ilongo mo kutya otwa pumbwa okulesha Ombiimbeli nelalakano ewanawa. Inatu kala twa fa Aafarisayi, ihe natu kale aaifupipiki notu na ehalo lyokwiilonga. Otu na ‘okutaamba meimweneneno ohapu ndjoka Kalunga e yi kunu momitima dhetu.’ (Jak. 1:21) Ngele otu li aaifupipiki, otatu ka etha Oohapu dhaKalunga dhi tu lundulule. Ngele otwa yanda ombepo yokusheka noyuuntsa, uuna tatu lesha Ombiimbeli, opo owala shoka tatu ilongo mo kombinga yohenda, yolukeno nosho wo yohole, tashi tu lundulula.

14. Ongiini tatu vulu okuulika kutya otwa etha Ombiimbeli yi tu zule? (Tala wo omathano.)

 ¹⁴ Omukalo moka hatu ungaunga nayalwe, otagu vulu okuulika ngele otwa etha Oohapu dhaKalunga dhi tu zule. Aafarisayi oya li ya ndopa okweetha Oohapu dhaKalunga dhi lundulule iikala yawo, naashoka osha li she ya ningitha ya ‘pangule mboka inaaya yona sha.’ (Mat. 12:7) Omukalo moka hatu tala ko nohatu ungaunga nayalwe, ohagu ulike ngele otwe etha Oohapu dhaKalunga dhi tu zule. Pashiholelwa, mbela otu na egamo lyokupopya uuwanawa mboka hatu mono muyalwe, nenge ohatu endelele owala okupopya uuwinayi mboka hatu mono muyo? Mbela otu na ohenda notu na ehalo lyokudhimina po yalwe nenge ohatu ya sheke nokukala twe ya geela? Okwiikonakona momukalo ngoka, otaku vulu okuulika ngele otwa etha shoka hatu lesha shi zule omadhiladhilo getu, omaiyuvo niilonga yetu. — 1 Tim. 4:12, 15; Heb. 4:12.

15. Jesus okwa li u uvitile ngiini Omanyolo Omayapuki?

¹⁵ Jesus okwa li e hole Omanyolo omayapuki. Oohapu ndhoka dhi li mEpisalomi 40:8, odha hunganeka nkene Jesus a li ta ka kala u uvitile Oohapu dhaKalunga. Otadhi ti: “Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.” Molwaashoka Jesus okwa li e hole Omanyolo, okwa li a nyanyukwa nokwa li a pondola mokulongela Jehova. Natse wo otatu vulu okukala twa nyanyukwa nokupondola, ngele ohatu lesha Oohapu dhaKalunga nokwiilonga okukala tu dhi hole. — Eps. 1:1-3.

16. Oshike to ka ninga po, opo wu mone mo uuwanawa owundji mOohapu dhaKalunga sho to dhi lesha? (Tala oshimpungu “ Oohapu dhaJesus otadhi vulu oku ku kwathela wu uve ko shoka to lesha.”)

¹⁶ Metsokumwe noohapu dhaJesus nosho wo oshiholelwa she, natu hwepopalekeni uunkulungu wetu wokulesha Ombiimbeli. Otatu vulu okuuva ko nawa Ombiimbeli, uuna twa galikana, tatu lesha tatu ende kashona, mokwiipula omapulo nokuninga omaidhimbulukitho omafupi. Otatu vulu okulongitha oondunge dhokuyoolola mokukonakona nawa shoka tatu lesha, tatu longitha iileshomwa ya kankamena kOmbiimbeli. Otatu vulu okwiilonga okulongitha Ombiimbeli shi vulithe nale, nokuli nomahokololo ngoka kaatu shi nawa, mokukonga omaliko mOmbiimbeli momahokololo ngoka. Shimwe ishewe, otatu vulu okweetha Oohapu dhaKalunga dhi tu zule mokukala tu na elalakano ewanawa, uuna tatu dhi lesha. Ngele otwa kambadhala okuninga ngaashi tatu vulu tu ninge iinima mbyoka, otatu ki ilonga mo oshindji melesho lyetu lyOmbiimbeli notatu ka hedha popepyeelela naJehova. — Eps. 119:17, 18; Jak. 4:8.