1-2. Sadok okwa li lye? (1 Ondjalulo 12:22, 26-28)

 KALA ando wa fa wu wete ongundu yaalumentu ye vulithe omayuvi 340 000, ya gongala, ya ninge David omukwaniilwa gwaIsraeli ashihe. Uule womasiku gatatu, aalumentu mboka oya kala kiikulundundu ya nika omamanya popepi naHebron. Oya li taya yolo, taya popi notaya imbi omaimbilo genyanyu taya hambelele Jehova. (1 Ondjal. 12:39) Mokati kawo omwa li omulumentu gwedhina Sadok, ihe oyendji kaya li ye shi ndhindhilika. Ihe Jehova okwa shilipaleka kutya tse otwe shi tseya kutya Sadok okwa li mokati kawo. (Lesha 1 Ondjalulo 12:22, 26-28.) Sadok okwa li lye?

² Sadok okwa li omuyambi, ngoka ha longele kumwe nOmuyambi Omunene, Abiatar. Kalunga okwa li wo a pe Sadok uunongo owundji noondunge, opo a uve ko ehalo Lye. (2 Sam. 15:27) Aantu oya li haya yi ya ka pule Sadok omayele gopandunge, uuna ya pumbwa ekwatho. Okwa li wo omulumentu omulaadhi. Uukwatya we mbuka owo tatu ka kundathanwa moshitopolwa shika.

3. (a) Omolwashike aalongeli yaJehova ya pumbwa okukala aalaadhi? (b) Oshike tatu ka kundathana moshitopolwa shika?

³ Pomasiku ngaka gahugunina, Satana ota kambadhala a mana mo a ponokele oshigwana shaKalunga. (1 Pet. 5:8) Otwa pumbwa okukala aalaadhi nenge tu tye tu kale tu na omukumo, omanga twa tegelela Jehova a hanagule po Satana nuuyuni we wa kolokosha. (Eps. 31:24) Natu ka kundathaneni omikalo ndatu moka tatu vulu okuholela uulaadhi waSadok.

AMBIDHIDHA UUKWANIILWA WAKALUNGA

4. Omolwashike oshigwana shaJehova sha pumbwa uulaadhi, opo shi ambidhidhe Uukwaniilwa waKalunga? (Tala wo ethano.)

⁴ Tu li oshigwana shaJehova, ohatu ambidhidha Uukwaniilwa waKalunga nomutima aguhe, ihe olundji ohatu kala twa pumbwa uulaadhi tu shi ninge. (Mat. 6:33) Pashiholelwa, muuyuni mbuka wa kolokosha, otwa pumbwa uulaadhi nenge omukumo, opo tu kale metsokumwe nomithikampango dhaJehova notu uvithe  onkundana ombwanawa yUukwaniilwa. (1 Tes. 2:2) Olundji ohashi pula uulaadhi, opo tu kale ihaatu kutha ombinga mopolotika muuyuni mbuka wa topoka noonkondo. (Joh. 18:36) Oyendji yomoshigwana shaJehova oya kala taya hupu shokadhila, taya dhengwa notaya tulwa nokuli moondholongo, molwaashoka ya tinda okukutha ombinga mopolotika nenge okuya miita.

5. Omolwashike Sadok a li a pumbwa uulaadhi, opo a ambidhidhe David?

⁵ Sadok ka li owala a yi a kuHebron a ka nyanyukilwe okulangekwa po komukwaniilwa kwaDavid. Ihe okwa yi a homata nokwa ilongekidhila olugodhi. (1 Ondjal. 12:38) Okwa li a halelela okuya naDavid kolugodhi nokugamena Israeli kaatondi yasho. Sadok ka li omukwiita a pyokoka. Ihe nonando ongawo, okwa li omulumentu omulaadhi lela.

6. David okwa tulile po ngiini Sadok oshiholelwa shoka a li e na okulandula? (Eps. 138:3)

⁶ Omuyambi ngaashi Sadok okwiilonga peni okukala omulaadhi? Okwa li e shi aalumentu oyendji, mboka ya li ye na oonkondo nuulaadhi. Kapu na omalimbililo kutya okwa li ilongo ko sha kuyo. Pashiholelwa, sho David a li a “wilike Aaisraeli miita” nuulaadhi, osha inyengitha Aaisraeli ayehe ye mu ambidhidhe nomutima aguhe. (1 Ondjal. 11:1, 2) David okwa li aluhe a inekela muJehova e mu kwathele a sinde aatondi ye. (Eps. 28:7; lesha Episalomi 138:3.) Sadok okwa li wo a ilongo uulaadhi kaalumentu, ngaashi Jehoiada nomwanamati omukwiita ofule Benaia nosho wo komalenga galwe 22, ngoka ga li ga gama kombinga yaDavid. (1 Ondjal. 11:22-25; 12:26-28) Aalumentu ayehe mbaka oya li ya tokola toko okuninga David omukwaniilwa gwawo noku mu gamena.

7. (a) Iiholelwa yuulaadhi yoolye yokunena tatu vulu okwiilonga kuyo? (b) Koshiholelwa shomumwatate Nsilu, shoka sha ulikwa mokavidio, owa ilonga mo shike?

⁷ Uuna tatu dhiladhila kiiholelwa yaamboka ya li ya ambidhidha Uukwaniilwa waJehova nuulaadhi, ohashi tu kwathele wo tu kale tu na uulaadhi. Omukwaniilwa gwetu, Kristus Jesus, okwa a li a tindi thiluthilu okukutha ombinga miinima yopapolotika yuuyuni waSatana. (Mat. 4:8-11; Joh.  6:14, 15) Okwa li aluhe hi inekele muJehova e mu pe oonkondo. Kunena, natse otu na iiholelwa oyindji yaalumentu aagundjuka, mboka ya tinda okuya muukwiita nenge okukutha ombinga miinima yopapolotika. Otatu ku ladhipike wu leshe iiholelwa yawo kepandja, jw.org? a

KWATHELA AAMWAHO

8. Omonkalo yini tashi vulika aakuluntugongalo ya kale ya pumbwa uulaadhi, opo ya vule okukwathela aamwahe?

⁸ Oshigwana shaJehova oshi hole okukwathelathana. (2 Kor. 8:4) Ihe omathimbo gamwe, ohashi pula uulaadhi oku shi ninga. Pashiholelwa, ngele opwa holoka iita, aakuluntugongalo yomoshitopolwa ohaya mono kutya aamwatate naamwameme oya pumbwa etsomukumo, eyambidhidho, notashi vulika nokuli ya kale ya pumbwa esiloshimpwiyu lyopambepo nenge lyopalutu. Molwaashoka aakuluntugongalo oye hole oonzi dhaJehova, ohaya tula oomwenyo dhawo moshiponga, opo ye dhi pe ekwatho ndyoka dha pumbwa. (Joh. 15:12, 13) Kungawo, ohaya landula oshiholelwa shaSadok shuulaadhi.

9. Ngaashi sha popiwa muSamuel omutiyali 15:27-29, David okwa lombwele Sadok a ninge shike? (Tala wo ethano.)

⁹ Omwenyo gwaDavid ogwa li moshiponga, molwaashoka omwanamati Absalom okwa li a tokola toko e mu dhipage, opo a ninge omukwaniilwa. (2 Sam. 15:12, 13) Onkee ano David okwa li a pumbwa okuza mo nziya muJerusalem. Okwa ithana aapiya ye e ta ti kuyo: “Natu zeni po mbala, ngele otwa hala okufadhuka po Absalom.” (2 Sam. 15:14) Sho ya li taya yi, David okwa mono kutya gumwe okwa pumbwa okuthigala muJerusalem, opo a kale te mu lombwele shoka Absalom ta dhiladhila okuninga. Onkee ano okwa lombwele Sadok nosho wo aayambi yalwe ya shune moshilando, opo ya kale taye mu tseyithile shoka tashi ningwa po. (Lesha 2 Samuel 15:27-29.) Oya li ye na okukala ya kotoka, sho taye shi ningi. Shoka David a lombwele aayambi ya ninge osha li sha nika oshiponga, nosha li nokuli tashi  vulu okufaalela oomwenyo dhawo. Absalom okwa li omukolokoshi, e na onkone, i ihole mwene nokwa kengelele he. Andola okwa uvile kutya Sadok naayambi ooyakwawo otaye mu ndaadha, opo ya gamene David, ando okwe ya ningile shike?

10. Sadok nosho wo mboka ya li pamwe naye oya li ya gamene ngiini David?

¹⁰ David okwe ya po nompangela yimwe ndjoka ya li ya kwatela mo Sadok nosho wo Hushai, kuume kaDavid kopothingo. (2 Sam. 15:32-37) Konima yompangela ndjoka, Hushai okwiiningitha a fa a gama kuAbsalom, nokwe mu pe omayele gankene e na okuponokela David, shoka sha li tashi ka pa David ompito a ilongekidhile olugodhi. Opo nduno Hushai okwa li a lombwele Sadok naAbiatar ompangela ndjoka. (2 Sam. 17:8-16) Aalumentu mboka yaali oya li ya vulu okutumina David etumwalaka kombinga yompangela yaAbsalom. (2 Sam. 17:17) Kekwatho lyaJehova, Sadok nosho wo aayambi ooyakwawo oya dhana onkandangala ya simana, mokugamena omwenyo gwaDavid. — 2 Sam. 17:21, 22.

11. Ongiini tatu vulu okuholela uulaadhi waSadok, uuna tatu kwathele aamwatate?

¹¹ Ongiini tatu vulu okukala tu na uulaadhi ngaashi waSadok, moonkalo dha nika oshiponga, uuna twa pulwa tu ka kwathele aamwatate? (1) Landula omalombwelo. Moonkalo dha tya ngaaka, osha simana okukala twa hangana. Vulika komalombwelo ngoka to pewa okuza koshitayimbelewa sheni. (Heb. 13:17) Aakuluntugongalo oya pumbwa okukala aluhe haya talulula omalombwelo kombinga yiiponga mbyoka tashi vulika yi holeke moshitopolwa shawo nosho wo uuyelele mboka hawu zi kehangano, opo ya tseye shoka ye na okuninga, uuna pwa holoka oshiponga sha sha. (1 Kor. 14:33, 40) (2) Kala omulaadhi nowa kotoka. (Omayel. 22:3) Longitha oondunge dhokuyoolola. Yanda okutula omwenyo gwoye moshiponga inaashi pumbiwa. (3) Inekela Jehova. Dhimbulukwa kutya Jehova oku na ko nasha lela nonkalonawa yoye nosho wo yaamwaho. Ota vulu oku ku kwathela wu ambidhidhe aamwaho kaapu na okutula omwenyo gwoye moshiponga.

12-13. Kiimoniwa yaViktor naVitalii, owa ilongo ko shike? (Tala wo ethano.)

 ¹² Natu taleni koshiholelwa shaamwatate yaali aadhiginini Viktor naVitalii, mboka ya li haya faalele ooitaali ooyakwawo iikulya nomeya moUkraine. Viktor okwa ti: “Otwa li hatu ka konga iikulya kehe pamwe. Olundji otwa li hatu uvu omitopelo dhoondjembo popepi natse. Omumwatate gumwe okwa li a gandja iikulya okuza mositola ye. Iikulya mbyoka oya li ya kwathele aauvithi oyendji ya hupe uule wethimbo lyontumba. Esiku limwe sho tatu pakele iinima mololi yetu, oshikuti shimwe osha dhenge pehala li li oometa 20 lwaampono, okuza mpoka twa li.” Esiku ndyoka alihe onda li tandi indile Jehova a pe ndje uulaadhi, mboka nda pumbwa, opo ndi tsikile okukwathela aauvithi.”

¹³ Vitalii ota ti: “Otwa li lela twa pumbwa uulaadhi. Olweendo lwotango olwa li lwe tu pula oowili 12. Ondjila ayihe onda li te galikana kuJehova.” Vitalii okwa li omulaadhi, ihe okwa li wo e na okukala a kotoka. Okwa gwedha ko a ti: “Onda pula Jehova a pe ndje uunongo nondi kale ndi ifupipika. Onda kala wo handi hingi moondjila ndhoka dha pitikwa kepangelo. Eitaalo lyandje olya li wo lya kolo sho nda mono aamwatate naamwameme taya longele kumwe. Oya kutha mo omainda mondjila e taya tula iikulya, oonguwo niinima yilwe ya simana mololi, noye tu pe iikulya nehala lyokuvululukilwa.”

KALA OMUDHIGININI KUJEHOVA

14. Uuna gumwe ngoka tu hole a kala we kee shi omudhiginini kuJehova, ohashi tu gumu ngiini?

¹⁴ Ohashi tu teya omukumo noonkondo, uuna gumwe megumbo nenge kuume kopothingo a thiga po Jehova. (Eps. 78:40; Omayel. 24:10) Ohashi kala oshidhigu okwiidhidhimikila onkalo ya tya ngaaka, ngele omuntu ngoka otwa li tu na ekwatathano lya kola naye. Ngele owa li monkalo ya tya ngawo, oshiholelwa shaSadok shuudhiginini otashi vulu oku ku tsa omukumo.

15. Omolwashike Sadok a li a pumbwa okukala omulaadhi, opo a kale omudhiginini kuJehova? (1 Aakwaniilwa 1:5-8)

¹⁵ Sadok okwa li a tsikile okukala omudhiginini kuJehova, sho kuume ke kopothingo Abiatar a hogolola kaa kale we omudhiginini kuJehova. Shika osha ningwa pehulilo lyokupangela kwaDavid. Sho David a li a lala mombete ye nokuli pokusa, omwanamati Adonia, okwa li a kambadhala oku mu umba ko koshipundi shoka Jehova a li a uvanekela Salomo. (1 Ondjal. 22:9, 10) Abiatar okwa li a hogolola okuyambidhidha Adonia. (Lesha 1 Aakwaniilwa 1:5-8) Sho Abiatar a ningi ngawo, ina kala owala kee shi omudhiginini kuDavid, ihe nokuJehova wo. Dhiladhila owala nkene Sadok a li a yemata nokwa teka omukumo! Uule womimvo dhi vulithe 40, ye naAbiatar oya kala taya longele pamwe ye li aayambi. (2 Sam. 8:17) Pompito yimwe oya li ya tonatele “oshikethahangano [“shaKalunga kashili,” NW].” (2 Sam. 15:29) Petameko, aalumentu mbaka yaali oya li haya ambidhidha David, sho a li omukwaniilwa, noya li ya longo oshindji miilonga yaJehova. — 2 Sam. 19:11-14.

16. Oshike tashi vulika sha kwathele Sadok a kale omudhiginini?

¹⁶ Sadok okwa kala omudhiginini kuJehova, nonando Abiatar okwa etha po Jehova. David okwa li e shi kutya ota vulu okukala a inekela aluhe Sadok. Sho iineya yaAdonia ya hololwa, David okwa hogolola Sadok, Natan naBenaia, ya gwayeke Salomo a ninge omukwaniilwa. (1 Aak. 1:32-34) Sadok otashi vulika a li a tsuwa omukumo koshiholelwa shaNatan nosho wo shaalongeli yalwe yaJehova, mboka ya li wo aadhiginini Kuye noya li haya ambidhidha Omukwaniilwa David. (1 Aak. 1:38, 39) Sho Salomo a ningi omukwaniilwa, okwa “tula omuyambi Sadok peha lyaAbiatar.” — 1 Aak. 2:35.

17. Ongiini to vulu holela Sadok, ngele gumwe ngoka wu hole okwa kala we kee shi omudhiginini kuJehova?

¹⁷ Ongiini to vulu okuholela Sadok? Ngele gumwe ngoka wu hole okwa thigi po Jehova, ngoye  ulukila Jehova kutya owa hala okukala omudhiginini kuye. (Jos. 24:15) Ote ke ku pa oonkondo nuulaadhi mboka wa pumbwa, opo wu ninge shoka shi li mondjila. Inekela muJehova, mokugalikana kuye, nomokukala wu na ekwatathano ewanawa nooitaali ooyakweni aadhiginini. Jehova okwa lenga uudhiginini woye note ke ku pa ondjambi. — 2 Sam. 22:26.

18. Owa ilongo shike koshiholelwa shaMarco naSidse?

¹⁸ Natu taleni koshiholelwa shaMarco nomukadhi Sidse, mboka oyanakadhona yaali aakuluntu ya thigi po oshili. Marco ota ti: “Esiku uuna aamwoye taya valwa, omuntu oho kala wa nyanyukwa noonkondo. Oho ningi kehe shimwe to vulu, opo wu ya gamene kukehe shoka tashi vulu oku ya etela oshiponga. Onkee ano uuna ya thigi po Jehova, oho kala wa dhengwa pomutima noonkondo.” Okwa tsikile ko ta ti: “Ihe nonando ongawo, Jehova okwe tu kwathela tu idhidhimike. Okwa kala aluhe nokushilipaleka kutya uuna nda gwilililwa po, nekulu lyandje ota tsu ndje omukumo, nuuna nekulu lyandje a gwililwa po, otandi mu tsu omukumo.” Sidse okwa ti wo: “Andola Jehova ka li e tu pa oonkondo ndhoka twa li twa pumbwa, ando inatu vula okwiidhidhimika. Onda kala tandi ipe uusama kutya epuko olyandje, onkee onda li nda lombwele Jehova nkene ndi uvite. Konima owala sho nda galikana, omumwameme gumwe, ngoka pwa pita omimvo odhindji inaandi mu mona, okwe ya kungame e ta tula iikaha ye komapepe gandje, nokwa tala ndje momeho, ta ti: ‘Sidse, dhimbulukwa kutya epuko kali shi lyoye!’ Kekwatho lyaJehova, onda vula okukaleka po enyanyu lyandje sho tandi mu longele.”

19. Owa tokola toko okuninga shike?

¹⁹ Jehova okwa hala aalongeli ye ayehe ya kale aalaadhi, ngaashi Sadok. (2 Tim. 1:7) Ihe nonando ongawo, ina hala tu kale twa inekela moonkondo dhetu yene. Okwa hala tu kale twe mu inekela. Onkee ano ngele owa iyadha wu li monkalo moka wa pumbwa ekwatho, pula Jehova. Oto vulu okukala nuushili kutya ote ke ku kwathela wu kale omulaadhi ngaashi Sadok. — 1 Pet. 5:10.