Hulda okwa adha elalakano lye
NGELE omimvo dhontumba dha pita owa li wa talele po okantuntu Sangir Besar, moIndonesia, otashi vulika wa li wa mono aamwameme yatatu Aakriste komunkulo gwefuta. Oya tseyika nawa kokantuntu hoka, oshoka ohaya uvithile aantu yako, taye ya kwathele ya uve ko Ombiimbeli. Ihe pompito ndjoka oya li taya longo oshilonga shilwe shi ili.
Okantuntu kaSangir Besar kuumbangalantu waIndonesia
Tango, sho ya li taya endaenda momeya, oya mono mo omamanya omadhigu, e taye ga eta komunkulo gwefuta. Omamanya gamwe oga li omanene ge thike petanga lyokoompadhi. Olutiyali, aakiintu mboka oya li ya kuutumba kiipundi iishona yiiti, e taya longitha oohamala ya tatagule omamanya ngoka, ga ninge uupambu uushona wu vulike keyi lyondjuhwa. Konima yaashono, oya tula uupambu womamanya momayemele goshipulastika noku ga humbata po sigo okokafuleta kawo ke li pombanda moka haya kala. Opo nduno, uumanya mboka oye wu tula mooshako oonene ndhoka dha li tadhi vulu okulondekwa momaloli, ga ka longithwe okulonga oondjila.
Hulda, ta gongele omamanya komunkulo gwefuta
Gumwe gwomuyo okwa li Hulda. Onkalo ye oya li ye mu pitike a longe iilonga mbyoka ethimbo ele e vulithe yakwawo. Okwa li ha longitha po iimaliwa ye ayihe mbyoka ha mono okufuta oompumbwe dhakehe siku dhoyaandjawo. Ihe pompito ndjono, okwa li a hala oku yi longitha moshinima shimwe shi ili. Okwa li a hala okatableta, opo a vule okukala ha yi kopolohalama yo-JW Library®. Hulda okwa li e shi kutya uuvidio niinima yilwe mbyoka yi li kopolohalama ndjoka, otayi ke mu kwathela mokuuvithila yalwe, mokukonakona nomokuuva ko Ombiimbeli.
Hulda okwa li a longo oowili mbali ongula kehe uule womwedhi netata, ta tatula uumanya owundji, opo a udhithe oshikoto shololi oshishona. Lwahugunina, okwa li a mono iimaliwa ya gwana okulanda okatableta.
Hulda nokatableta ke
Hulda okwa ti: “Nonando onda li nda vulwa palutu nonda shasha kokutatula omamanya, nziya onda dhimbwa uuwehame awuhe mboka, molwaashoka onda li tandi vulu okulongitha okatableta kandje okape, ndi vule oku shi pondola miilonga yokuuvitha nosho wo okwiilongekidhila nuupu okugongala kwopaKriste.” Okwa ti wo kutya okatableta oke mu kwathela petameko lyomukithi gwekomba, molwaashoka okugongala akuhe kwegongalo okwa li haku ningwa okupitila miikwaelektronika. Otwa nyanyukwa pamwe naHulda, sho a adha elalakano lye.
