Uuna Aakriste taya kambadhala okwiigamena, ohaye shi ningi metsokumwe nomakotampango gOmbiimbeli. Omayele taga landula, otage tu kwathele kaatu longithe oombistoli nosho wo oondjembo oonene nelalakano lyokwiigamena kaantu.

Omwenyo gwomuntu ogwa simana momeho gaJehova. Omupisalomi David okwa li e shi kutya Jehova oye “oluthithiya lwomwenyo.” (Eps. 36:9) Onkee ano, ngele Omukriste okwa hogolola okulongitha iinima yontumba i igamene nenge a gamene iiniwe ye, ota ka ninga ngaashi ta vulu, kaa dhipage omuntu nokaa kale e na ondjo yombinzi. — Deut. 22:8; Eps. 51:14.

Okulongitha iikondjitho yontumba otaku vulu okweetela omuntu a kale e na ondjo yombinzi. Mboka ye na oondjembo otashi vulika wo shi kale oshipu kuyo ya dhipage omuntu ombaadhilila nenge owina. * Shimwe ishewe, ngele omuponokeli okwa adhika nale a tila e ta mono omuntu e na ondjembo, shoka otashi vulu okunayipaleka onkalo notashi vulu okweetitha eso.

Sho Jesus a li a lombwele aalanduli ye ya kuthe omagongamwele gawo muusiku we wahugunina kombanda yevi, ka li ta popi kombinga yokwiigamena. (Luk. 22:36, 38) Pehala lyaashono, Jesus okwa li e ya lombwele ye ete omagongamwele gawo, opo e ya longe kutya kaye na oku ga longitha ya longe uukolokoshi kutya nduno oya adhike kongundu yaantu ya homata. (Luk. 22:52)  Konima sho Petrus a pweya mo egongamwele e te li yeluthile omumati gwomuyambi omukuluntu, Jesus okwe mu lombwele a ti: “Shuna mo egongamwele lyoye molumpangwa.” Opo nduno Jesus okwa popi oshili ya simana, ekotampango ndyoka tali wilike aalanduli ye nokunena, tali ti: “Ayehe mboka taa longitha egongamwele, oyo otaa ka sa kegongamwele.” — Mat. 26:51, 52.

Metsokumwe naMika 4:3, aapiya yaKalunga “otaa ka hambula omagonga gawo omatemo nomagongamwele gawo iimwitho.” Uukwatya mbuka wa yoolola mo Aakriste yashili, otawu tsu kumwe naashoka sha popiwa komuyapostoli Paulus, sho a ti: “Ngele ku na ngoka te mu ningile uuwinayi, inamu mu shunithila uuwinayi. . . . Ne yene kombinga yeni ningeni ashihe tamu shi vulu, mu kale nombili naantu ayehe.” (Rom. 12:17, 18) Nonando Paulus naye okwa li a piti moonkalo oondhigu odhindji, mwa kwatelwa ‘iiponga yaayugi,’ okwa kala metsokumwe noohapu dhe noka li a pititha komeho egameno lye, ihe omakotampango gOmbiimbeli. (2 Kor. 11:26) Okwa li i inekela muKalunga nosho wo muunongo mboka tawu adhika mOmbiimbeli, ano owino ndjoka yi “vule omatati golugodhi.” — Omuuv. 9:18.

Aakriste oya simaneka omwenyo shi vulithe iinima yopamaliko. Ombiimbeli otayi ti: “Okukalamwenyo kwomuntu kombanda yevi itaku lelepekwa kowindji weliko lye.” (Luk. 12:15) Aakriste ohaya ningi po shike, ngele oya popi momukalo gwombili nomuyugi ngoka a homata, ihe ina hala okupulakena? Ohaya kaleke momadhiladhilo ekotampango ndyoka li li moohapu dhaJesus, tali ti: “Inamu shunitha uuwinayi kungoka te mu ningile uuwinayi.” Otashi vulika nokuli tu mu ethe e tu kuthe shoka a hala. (Mat. 5:39, 40; Luk. 6:29) * Ngoka ogu li omukalo dhingi gwokwiigamena. Ngele otwa yanda “uuhalu wopantu okuhola mbyoka aantu taye yi tala,” e tatu kala twa tseyika tu li Oonzapo dhaJehova dhi na ombili, otashi vulika shi tu kwathele kaatu ponokelwe kaakolokoshi. — 1 Joh. 2:16; Omayel. 18:10.

Aakriste oya simaneka omaiyuvo gayalwe. (Rom. 14:21) Ngele opu na oshilyo shimwe megongalo shi na ondjembo yokwiigamena kaantu, otashi vulika shi kumithe aamwatate naamwameme nenge nokuli shi ya pundukithe. Nonando otu kale tu na uuthemba wokukala nondjembo, ohole ohayi tu inyengitha tu pitithe komeho uuwanawa wayalwe. — 1 Kor. 10:32, 33; 13:4, 5.

Aakriste ohaya kambadhala okutula po oshiholelwa oshiwanawa. (2 Kor. 4:2; 1 Pet. 5:2, 3) Ngele opu na Omukriste megongalo ngoka e na ondjembo yokwiigamena kaantu, nena oku na okupewa omayele kaakuluntugongalo. Ngele okwa tsikile okukala nayo nelalakano lyokwiigamena, kungawo ke li oshiholelwa oshiwanawa. Ita ka kala nokuli a gwana okupewa iinakugwanithwa yontumba nenge yi ikalekelwa megongalo. Shoka otashi longo nokAakriste mboka taya tsikile okulonga miilonga moka hamu longithwa oondjembo. Oshi li pandunge okukonga iilonga mbyoka ihaamu longithwa oondjembo. *

Omukriste oku na okuninga etokolo ye mwene nkene e na okwiigamena, okugamena aanegumbo lye nosho wo okuhogolola iilonga. Omakotampango gOmbiimbeli otagu ulike kutya Kalunga oku na uunongo noku tu hole. Onkee ano, uuna Omukriste ta ningi omatokolo, naga kale ga kankamena kOmbiimbeli. Omolwomakotampango ngoka, Aakriste mboka ya koka pambepo ohaya hogolola kaaya kale ye na oondjembo dhokwiigamena kaantu. Oye shi shi kutya ngele oya kala yi inekela muKalunga nokukala metsokumwe nomakotampango gOmbiimbeli, otaya ka kala ye na egameno lyashili notali kalelele. — Eps. 97:10; Omayel. 1:33; 2:6, 7.