MOLWAASHOKA otu li muuyuni wa piyagana, otu na okulonga nuudhiginini tu kale tu na ombili. Nonando otu kale tu na ombili, olundji ohatu nyengwa oku yi kaleka po. Oohapu dhaKalunga odha popi shike shoka tashi vulu oku tu kwathela tu kale tu na ombili yashili notayi kalelele? Ongiini tatu vulu wo okukwathela yalwe ye shi ninge?

Otwa pumbwa okukala twa gundjila pamadhiladhilo notu uvite twa gamenwa. Otwa pumbwa wo okukala nekwatathano ewanawa nayalwe. Ihe shoka sha simanenena, otwa pumbwa okupanga uukuume wopothingo naJehova. Ongiini tatu vulu oku shi ninga?

Uuna tatu vulika koompango dhaJehova nokomakotampango ge, otatu ulike kutya otwe mu inekela notwa halelela okukala tu na ekwatathano ewanawa naye. (Jer. 17:7, 8; Jak. 2:22, 23) Kungawo, ota ka hedha popepi natse note ke tu kwathela tu kale tu na ombili yokomutima. Jesaja 32:17 otayi ti: “Shaa ngoka ota ka longa shoka shu uka, otaku ka kala ombili, evululuko negameno sigo aluhe.” Otatu vulu okumona ombili yashili yokomutima, ngele otwa kala tatu vulika kuJehova tashi zi komutima. — Jes. 48:18, 19.

Ombepo ondjapuki ndjoka yi li omagano omandhindhilikwedhi ga za kuTate gwetu gwomegulu, nayo otayi vulu oku tu kwathela tu kale tu na ombili yashili. — Iil. 9:31.

Omuyapostoli Paulus okwa tumbula ombili yi li oshiyimati oshititatu ‘miiyimati yombepo.’ (Gal. 5:22, 23) Molwaashoka ombili yashili ohayi etithwa kombepo yaKalunga, otu na okweetha ombepo ondjapuki yi tu nwethe mo, opo tu mone ombili yashili. Natu taleni omikalo mbali, moka ombepo yaKalunga tayi vulu oku tu kwathela tu mone ombili yashili.

Omukalo gwotango: Otatu vulu okukala tu  na ombili, ngele otwa kala hatu lesha pandjigilile Oohapu dhaKalunga dha nwethwa mo. (Eps. 1:2, 3) Uuna tatu tedhatedha ketumwalaka lyOmbiimbeli, ombepo yaKalunga ohayi tu kwathele tu uve ko nkene Jehova ha tala ko iinima oyindji. Pashiholelwa, ohatu mono nkene omunambili aluhe nankene ombili ya simana kuye. Ngele tatu tula miilonga shoka twi ilonga mOmbiimbeli, otatu ka kala tu na ombili ya dhenga mbanda monkalamwenyo yetu. — Omayel. 3:1, 2.

Omukalo omutiyali: Otwa pumbwa okugalikana kuJehova e tu pe ombepo ye ondjapuki. (Luk. 11:13) Oku uvaneka kutya ngele otwa kongo ekwatho lye, ‘ombili ye, ndjoka yi vule uunongo auhe wopantu, otayi gamene oomwenyo dhetu nomadhiladhilo getu muKristus Jesus.’ (Fil. 4:6, 7) Uuna tatu galikana twi inekela mombepo yaKalunga, Kalunga ketu ote ke tu udhitha ombili yokomutima, ndjoka he yi pe owala mboka ye na ekwatathano ewanawa naye. — Rom. 15:13.

Ongiini yamwe ya tula miilonga omayele ngaka gopamanyolo, e taya ningi omalunduluko ngoka ga pumbiwa, opo ya kale ye na ombili tayi kalelele naJehova, nayo yene nosho wo nayalwe?

Megongalo lyopaKriste kunena omu na yamwe mboka ya li nale ‘aageyentu,’ ihe ngashingeyi ohaya dhiladhila pandjele, aanambili, aaidhidhimiki nohayu ungaunga nawa nayalwe. * (Omayel. 29:22) Ndhindhilika nkene shika sha ningilwa aauvithi yaali yUukwaniilwa, mboka ya li ya kwathelwa kaaya kale we haya geye mbala noya kale ye na ombili nayalwe.

Omumwatate David okwa li e na iikala iiwinayi, mbyoka ya li ya nwetha mo okupopya kwe. Manga ini iyapulila Kalunga, olundji okwa li ha ngwandjagula yalwe nokwa li hu ula nayi aantu yaandjawo. Mokweendela ko kwethimbo, David okwa mono kutya okwa pumbwa okulundulula nokwa ningi omunambili. Ombili okwe yi mono ngiini? Ota ti: “Onda tameke okutula miilonga omakotampango gOmbiimbeli monkalamwenyo yandje, naashoka oshe eta esimaneko pokati kandje naantu yaandjetu.”

Omumwameme Rachel, iikala ye oya li ya nwethwa mo keputuko lye. Ota ti: “Sigo onena ohandi kondjitha iikala yokugeya, molwaashoka  onda putukila muukwanegumbo waageyentu.” Oshike she mu kwathele a kale omunambili? Okwa yamukula a ti: “Okugalikana kuJehova nokukala nde mu inekela.”

Omumwatate David nomumwameme Rachel, oyamwe yomwaamboka yu ulika kutya otatu vulu okumona ombili, ngele otwa tula miilonga omakotampango gOmbiimbeli nokwiinekela mombepo yaKalunga yi tu kwathele. Osha yela kutya nonando otu li muuyuni wa kolokosha, otatu vulu okukala nombili yokomutima, ndjoka hayi eta elongelokumwe momaukwanegumbo nomokati kAakriste. Jehova ote tu ladhipike tu “kale nombili naantu ayehe.” (Rom. 12:18) Mbela shoka otashi vulika ngaa shili, nomauwanawa geni haga zi mokuninga oonkambadhala dhokupanga ombili?

Uuna tatu uvitha, kungawo otatu hiya aantu ya mone mo uuwanawa metumwalaka lyombili, ndyoka tali popi kombinga yUukwaniilwa waKalunga. (Jes. 9:6, 7; Mat. 24:14) Shinyanyudha, oyendji ohaya taamba ko etumwalaka lyetu. Oshizemo? Ihaya kala we yu uvite yaa na etegameno nenge ya geele mboka ye ya kundukidha. Pehala lyaashono, oye na ngashingeyi etegameno lyashili lyonakuyiwa noyi inyengithwa ya ‘lalakanene ombili, yo ye yi kondjele.’ — Eps. 34:14.

Haantu ayehe haya taamba ko etumwalaka lyetu, unene tuu oshikando shotango tayu uvithilwa. (Joh. 3:19) Nonando ongawo, ohatu kwathelwa kombepo yaKalunga, opo tu ya uvithile onkundana ombwanawa momukalo gwombili nogwesimaneko. Momukalo moka, otatu landula omalombwelo gaJesus kombinga yuukalele, ngoka ge li muMateus 10:11-13, taga ti: “Ngele tamu yi megumbo, kundii mo. Egumbo ndyoka ngele oli shi kwiinekelwa, ombili yeni nayi kale mo, ihe ngele kali shi kwiinekelwa, ombili yeni nayi mu galukile.” Uuna tatu landula omayele gaJesus, otatu vulu okushuna nombili yetu inaatu thigila omuntu uuwinayi washa, tu na etegameno kutya otatu vulu oku mu kwathela monakuyiwa.

Ohatu humitha komeho ombili, uuna tatu popi naakwanepangelo momukalo gwesimaneko, mwa kwatelwa naamboka tashi vulika ya pataneke iilonga yetu. Pashiholelwa, epangelo lyoshilongo shimwe shomuAfrika, olya li lye etha aakwanepangelo kaaye tu pitike tu tunge Iinyanga yetu yUukwaniilwa. Opo tu kandule po omukundu ngoka pambili, omumwatate gumwe ngoka a li omutumwa nale moshilongo shoka, okwa li a pulwa a ka talele po Omutumwakalelipo gwoshilongo shoka koLondona, moIngilanda. Okwa li te ke mu lombwela kombinga yiilonga yOonzapo dhaJehova yombili moshilongo shawo. Etalelopo ndyono olye eta oshizemo shini?

Omumwatate ngoka okwa ti: “Sho nda thiki mombelewa moka hamu thikilwa, omukiintu ngoka ha longo mo, okwa li a zala momukalo ngoka gwa ningitha ndje ndi thike pehulithodhiladhilo kutya oku na okukala ha popi elaka ndyoka ndi ilonga. Onkee ano, onde mu popitha melaka lye. Okwa haluka e ta pula ndje ta ti: ‘Elalakano lyoye lyokutalela po olyashike?’ Onde mu lombwele nombili kutya onda hala okumona Omutumwakalelipo. Omukiintu ngoka okwe mu dhengele, nokonima okwe ya e ta popitha ndje melaka lyomoshitopolwa. Konima yaashoka, okwa pulakene ndje nawa, sho tandi mu yelithile kombinga yiilonga yOonzapo.”

Molwaashono omumwatate okwa yelitha momukalo gwesimaneko, osha ningitha Omutumwakalelipo a kuthe mo momadhiladhilo ge iifundja mbyoka a lombwelwa nokaa kale we netaloko lya puka kombinga yiilonga yetu. Lwanima, epangelo lyoshilongo shoka shomuAfrika, olya pitike aamwatate ya tunge Iinyanga yUukwaniilwa. Shoka kasha li tuu sha nyanyudha aamwatate! Odhoshili kutya okuungaunga nayalwe nesimaneko, ohaku eta iizemo iiwanawa, mwa kwatelwa ombili.

Aapiya yaJehova kunena, ohaya nyanyukilwa ombili moparadisa yopambepo. Oto vulu okugwedha ko kombili ndjoka, sho to ningi oonkambadhala wu kale wu yi na monkalamwenyo. Shoka sha simanenena, Jehova ota ka kala wo e ku hokwa noto ka mona ombili ya gwana notayi kalelele, muuyuni we uupe. — 2 Pet. 3:13, 14.