MOMUMVO 49 E.N, Petrus, Jakob nosho wo Johannes mboka ya li “aawiliki,” nenge tu tye mboka ya li taya monika ya fa oyo oongudhi dhegongalo, oya li ya pe omuyapostoli Paulus nosho wo omulongi pamwe naye Barnabas oshinakugwanithwa. Sho ya li taya uvithile aantu yomiigwana oya li ye na okukaleka momadhiladhilo Aakriste mboka ya hepa. (Gal. 2:9, 10) Mbela oshinakugwanithwa shika osha li sha gwanithwa po ngiini?

Oontumwafo ndhoka Paulus a nyola otadhi popi nkene a li a u ungaunga noshinima shoka. Pashiholelwa, okwa li a nyolele Aakriste yomuKorinto a ti: “Kombinga yegongelo lyiimaliwa yokukwatha aantu yaKalunga yomuJudea, one omu na okuninga shoka nda lombwele omagongalo gomuGalatia. Mesiku lyotango lyoshiwike kehe, kehe gumwe gwomune na yoolole iimaliwa yasha pakulikola kwe e te yi pungula, opo kwaa ka kale we ompumbwe yokugongela iimaliwa, uuna tandi ke ya. Ngele nde ya, otandi ka tuma aalumentu yamwe mboka mwe ya zimina, ya ye noontumwafo dhomayelithilo, ya fale omagano geni kuJerusalem.” — 1 Kor. 16:1-3.

Montumwafo ye ontiyali ndjoka a li a nyolele Aakorinto, Paulus okwa li a popi elalakano lyokugongela iimaliwa. Elalakano ndyoka olya li kutya ‘uuna taya ka adhika koluhepo yo ye na oshindji, otaya ka kwatha mboka ye li moluhepo.’ — 2 Kor. 8:12-15.

Sho Paulus a nyolele Aakriste yomuRoma lwomomumvo 56 E.N., iimaliwa mbyoka oya li pokugwana. Okwa ti: “Otandi ka pita kuJerusalem, ndi fale omagano ngoka ga pewa aantu yaKalunga yaankoka. Oshoka omagongalo agehe gomuMakedonia nogomuGreka oga tokola, ga umbe ongalo yokukwatha oohepele dhomaantu yaKalunga muJerusalem.” (Rom. 15:25, 26) Paulus okwa li a gwanitha po oshilonga she molwaashoka konima sho a galukile kuJerusalem, naasho a tulwa mondjedhililo manga e li moka okwa lombwele omupangeli gwaRoma Feliks a ti: ‘Onde ya okweetela aantu yoshigwana shetu omagano giimaliwa nokuyambela Kalunga omayambo.’ — Iil. 24:17.

Ombepo ndjoka ya li yi niwe kAakriste yomethelemumvo lyotango oyi iwetikile mwaashoka Paulus a li popi kombinga yAakriste yokuMakedonia. Okwa popi kutya oya li yi “indile noya pula ya pewe ompito yokukwatha.” Omuyapostoli okwa li a ladhipike Aakorinto ya landule oshiholelwa shoka. Okwa ti: “Kehe gumwe na gandje, ngaashi eiyuvo lye tali mu lombwele, hanokungungutula nenge kethiminiko. Oshoka Kalunga oku hole ngoka ta gandja nenyanyu.” Oshike sha li sha hwahwameke ombepo yokugandja momagongalo ngoka? Omagongalo ngoka kaga li ge shi ningi owala nelalakano ‘ga kuthe po oluhepo lwaantu yaKalunga, ihe oge etele wo Kalunga omapandulo ogendji.’ (2 Kor. 8:4; 9:7, 12) Uuna natse tatu gandja otu na oku shi ninga nelalakano lya faathana. Jehova ote ke tu yambeka ngele otu na ombepo ndjoka ombwanawa noyokukala kaatu ihole tse yene. Oshili oyo kutya eyambeko lye ohali yambapaleke. — Omayel. 10:22.

Ngaashi owala pethimbo lyomuyapostoli Paulus, oyendji kunena ohaya “pungula” oshimaliwa nenge ya tokole kutya otaya kala haya tula iimaliwa yi thike peni mokaketha kegongalo hoka ka nyolwa “Omayambidhidho gIilonga yomUuyuni Auhe.” (1 Kor. 16:2) Omwedhi kehe, omagongalo ohaga tumine iimaliwa mbyoka koshitayimbelewa shOonzapo dhaJehova shoka hashi tonatele iilonga moshilongo shawo. Oto vulu wo okutumina omayambidhidho goye shu ukilila kedhina lyopaveta lyehangano lyOonzapo dhaJehova ndyoka hali longithwa moshilongo moka wu li. Ngele edhina ndyoka ku li shi, ninga ekwatathano noshitayimbelewa shoka hashi tonatele iilonga moshilongo sheni. Oondjukithi dhiitayimbelewa otadhi adhika ko-www.mr1310.com. Omayambidhidho ngoka to vulu okutuma shu ukilila ongaashi ngaka taga landula mpaka:

OMAYAMBIDHIDHO NGOKA TAGA VULU OKUTUMWA GOGENEGENE

• Iimaliwa koomuma, iikwamalyenge nenge iinima yilwe yongushu.
• Yi tuma pamwe nontumwafo ndjoka tayi ulike kutya iimaliwa nenge iinima mbyoka oyi li omayambidhidho.

OKUGANDJA KWA LONGEKIDHWA

Kakele komagano gopashimaliwa niinima yilwe yongushu, opu na omagano galwe omuntu ta vulu okugandja a ambidhidhe iilonga yUukwaniilwa muuyuni auhe. Omagano ngoka oga kwatela mo iinima mbyoka ya popiwa pevi. Kutya nduno owa hala okulongitha omukalo gumwe nenge omikalo dhontumba, kwatathana noshitayimbelewa shoka hashi tonatele iilonga moshilongo sheni, opo wu mone kutya omikalo dhini hadhi longo moshilongo sheni. Molwaashoka iinima yopaveta nosho wo oompango dhi na ko nasha niifendela odha yooloka miilongo niilongo, oshi li nawa wu pule omayele kwaamboka ye shi iinima mbyoka omanga inoo tokola kutya oto longitha omukalo guni.

Omakwashilipaleko: Oto vulu okugandja edhina lyopaveta ndyoka hali longithwa kehangano lyOonzapo dhaJehova moshilongo sheni, opo ehangano li thigulule omakwashilipaleko goye nenge openzela yoye.

Uumbo wombaanga: Oto vulu okupula ombaanga, opo iimaliwa yoye mbyoka yi li kokambo koye nenge yopenzela nenge mbyoka wa pungulitha uule wethimbo lyontumba, yi thigululwe po kehangano lyOonzapo dhaJehova tayi tulwa kedhina lyopaveta ndyoka hadhi longitha, shi ikolelela komilandu dhoombaanga moshilongo sheni.

Iipambuliko nomikuli ndhoka omuntu i indilwa komahangano gontumba nenge kepangelo (stocks and bonds): Oto vulu wu nyole sha yela kutya ngele wa si iinima mbyoka nayi gandjwe kehangano lyOonzapo dhaJehova tayi tulwa kedhina lyopaveta ndyoka hadhi longitha moshilongo sheni.

Etungo nenge evi: Omaliko ngoka otaga vulu okugandjwa gogenegene ge li omagano, nenge ngele ehala lyokukala otali vulu okunyolithwa kedhina lyopaveta ndyoka hali longithwa kehangano lyOonzapo dhaJehova, nonando omugandji otashi vulika omo ta kala mehala moka manga e li momwenyo.

Omatestamendi noondokumende dhilwe dhopaveta dhi na ko nasha netopolo lyomaliko (wills and trusts): Oto vulu okunyola edhina ndyoka hali longithwa kehangano lyOonzapo dhaJehova moshilongo sheni, opo ehangano li thigulule po omaliko nenge iimaliwa yoye nenge li mone uuwanawa wontumba. Ngele to longitha omukalo nguka ehangano otashi vulika li mone uuwanawa wontumba wu na ko nasha nokunanwa iifendela.

Opo wu mone uuyelele owundji, oto vulu okukwatathana nOmbelewa yi na ko nasha nIimaliwa (Accounting Office) to nyolele kondjukithi nenge wu dhengele kongodhi ndjoka yi li pevi, nenge wu kwatathane noshitayimbelewa shoka hashi tonatele iilonga moshilongo sheni.