1, 2. Ongiini einekelo lyetu hali kolekwa kokudhiladhila kombinga yehangano lyaJehova?

OSHI li oshikumithi okudhiladhila kutya otu li oshitopolwa shehangano enene. Omamoniko ngoka ga nyolwa muHesekiel ontopolwa 1 nosho wo muDaniel ontopolwa 7 otaga gandja uuyelele kombinga yaJehova ta longo opo elalakano lye li gwanithwe. Jesus oku li ta wilike oshitopolwa shokombanda yevi shehangano lyaJehova opo shu ukithe eitulomo kokuuvitha onkundana ombwanawa, kokusila oshimpwiyu pambepo mboka taya longo iilonga mbika nosho wo kokuhumitha komeho elongelokalunga lyashili lyaJehova. Shika itashi tu ningitha tuu tu kale tu na einekelo mehangano lyaJehova!—Mat. 24:45.

² Mbela tse paumwene otatu endele ngaa pamwe nehangano ndika ewanawa? Mbela uulaadhi wetu woshili otawu koko ngaa nenge otawu ende tawu kana po? Uuna tatu ipula omapulo ngoka, otashi vulika tu mone kutya otwa tameka okuvulwa nenge tu mone kutya katu na we uulaadhi ngaashi nale. Shoka otashi vulu okuningwa. Methelemumvo lyotango, omuyapostoli Paulus okwa li a kumagidha Aakriste ooyakwawo ya dhiladhile koshiholelwa shaJesus shuulaadhi. Paulus okwa li a popi kutya shika otashi ke ya kwathela kaaya ‘kanithe omukumo nokaaya hulile ondjilakati.’ (Heb. 12:3) Momukalo gwa faathana, sho twa konakona nuukeka oshitopolwa sha zi ko, shoka shu ulike shoka tashi longwa kehangano lyaJehova, oshi na okukala she tu kwathela noonkondo tu kale aluhe tu na uulaadhi nosho wo eidhidhimiko.

3. Otwa pumbwa okuninga shike opo kaatu vulwe, notatu ka konakona shike moshitopolwa shika?

³ Paulus okwa li u ulike kutya otwa pumbwa okuninga oshindji opo kaatu vulwe. Okwa li a popi kutya otwa li tatu ka kala twa pumbwa tu hwepopale ‘mokulonga uuwanawa.’ (Gal. 6:9) Ano, otwa pumbwa okukatuka oonkatu. Natu ka konakoneni iinima itano mbyoka tayi vulu oku tu kwathela tu kale twa kakatela uudhiginini wetu nokukala tatu endele pamwe nehangano lyaJehova. Opo nduno tatu vulu okutokola paumwene  ngele opu na iinima mbyoka tse yene nenge aanegumbo yetu ya pumbwa okugandja eitulomo lya gwana kuyo.

4. Omolwashike tatu vulu okutya okugongala pamwe okwa kala aluhe ku li oshitopolwa sha simana shelongelokalunga?

⁴ Okugongala pamwe okwa kala aluhe oshinima sha simanenena kaapiya yaJehova. Iishitwa yopambepo ohayi holoka koshipala shaJehova pethimbo lyu uthwa, megulu. (1 Aak. 22:19; Job 1:6; 2:1; Dan. 7:10) Oshigwana shaIsraeli shonale, osha li hashi gongala ‘opo shi uve, noshi ilonge.’ (Deut. 31:10-12) Aajuda yomethelemumvo lyotango oya li haya yi pandjigilile koosinaagoga ya ka leshe mOmanyolo. (Luk. 4:16; Iil. 15:21) Okuza nale Jehova okwa kala ta tsu omuthindo esimano lyokugongala pamwe nokwa li a tsikile okuninga ngaaka sigo egongalo lyopaKriste lya totwa, nokugongala pamwe hoka oku li natango oshitopolwa sha simanenena shelongelokalunga lyetu. Aakriste yashili ohaya ‘kwathathana mokuholathana nomokulongelathana uuwanawa.’ Otwa pumbwa okutsikila ‘okukumagidhathana, unene sho tu wete esiku [lyaJehova, NW] tali hedha popepi.’—Heb. 10:24, 25.

5. Ongiini tatu vulu okukumagidhathana pokugongala kwetu?

⁵ Omukalo gumwe gwa simana moka hatu kumagidhathana ogwo okukutha ombinga mokugongala kwetu kehe. Otatu vulu okuhokolola eitaalo lyetu montaneho uuna tatu gandja omayamukulo gomapulo ngoka ge li miileshomwa, mokuyelitha nkene enyolo tali vulu okutulwa miilonga, mokugandja oshimoniwa paufupi shoka tashi ulike kutya okutula miilonga omakotampango gOmbiimbeli oshinima shi li pandunge nenge omayamukulo galwe. (Eps. 22:22; 40:9) Osha yela kutya oto shi zimine kutya kashi na nduno mbudhi kutya otwa kala hatu yi kokugongala oomvula odhindji, ohashi kala natango tashi tu tsu omukumo uuna tatu pulakene komatyokosha gaamwatate naamwamene taga zi komutima, kutya nduno aagundjuka nenge aakokele.

6. Ongiini okugongala kehe haku tu kwathele tu kale twa tonata pambepo?

⁶ Omolwomatompelo galwe geni Kalunga ta tsu omuthindo okukala hatu gongala pamwe pandjigilile? Okugongala kehe nosho wo iigongi iishona niinene ohayi tu kwathele tu uvithe nuulaadhi notu idhidhimikile omapataneko nenge mboka tatu uvithile kaaye na ohokwe. (Iil. 4:23, 31) Oonkundathana dhopamanyolo ohadhi koleke eitaalo lyetu. (Iil. 15:32; Rom. 1:11, 12) Elongo nosho wo okutsaathana omukumo hoka hatu mono pokugongala ohaku tu kwathele tu mone enyanyu lyashili noku tu ‘hekeleka momasiku guudhigu.’ (Eps. 94:12, 13) Okomitiye yOkulonga yOlutuwiliki ohayi unganeke omalandulathano giikulya yopambepo agehe gokulonga oshigwana shaJehova muuyuni awuhe. Inatu pandula tuu omolwomasiloshimpwiyu ngoka twa tulilwa po tu tyapule elongo ndyoka pokugongala kehe oshiwike kehe!

7, 8. (a) Pokugongala kehe otu na okukala po omolwetompelo lini lya simanenena? (b) Okugongala kehe ohaku ku kwathele ngiini pambepo?

⁷ Kakele kuuwanawa mboka hatu mono paumwene, opu na wo etompelo limwe lya simanenena kutya omolwashike hatu yile kokugongala. Etompelo ndyoka olyo okulongela Jehova. (Lesha Episalomi 95:6.) Kawu shi tuu uuthembahenda uunene kutse okuhambelela Kalunga ketu omwaanawa! (Kol. 3:16) Jehova okwa gwana okulongelwa kutse pandjigilile mokukala hatu kala pokugongala nokukutha ombinga muko. (Eh. 4:11) Osho molwaashoka tatu kumagidhwa ‘kaatu ethe po okugongala pamwe, ngaashi yamwe haa ningi!’—Heb. 10:25.

⁸ Mbela otwa tala ko ngaa okugongala kwetu kwopaKriste ku li esiloshimpwiyu lyoku tu kwathela tu idhidhimike sigo Jehova a hanagula po onkalelo ndjika yiinima ya kolokosha? Ngele osho, okugongala kehe otaku ka kala shimwe ‘shomiinima mbyoka yi na oshilonga’ shoka tu na okukongela ethimbo moonkalamwenyo dhetu dhi na omaipyakidhilo. (Fil. 1:10) Ano inapu kala nando osha tashi tu ningitha tu hunuthe ompito yokukala pamwe naamwatate mokulongela Jehova kakele owala ngele pu na sha sha kwata miiti.

9. Otu shi shi ngiini kutya iilonga yokuuvitha oya simana?

⁹ Okukala tatu kutha ombinga pakuudha miilonga yokuuvitha ohaku tu kwathele wo tu endele pamwe nehangano lyaJehova. Jesus okwa li a tameke iilonga mbika sho a li kombanda yevi. (Mat. 28:19, 20) Okuza mpoka, ehangano alihe lyaJehova olya kala lyu ukitha eitulomo kiilonga yUukwaniilwa yokuuvitha noyokuninga aantu aalongwa. Iimoniwa oyindji kunena otayi gandja uunzapo kutya aayengeli otaya ambidhidha iilonga yetu notaye tu wilike tu ye kwaamboka “ye na iikala iiwanawa kombinga yomwenyo gwaaluhe.” (Iil. 13:48, NW; Eh. 14:6, 7) Oshitopolwa shokombanda yevi shehangano lyaJehova oshi li pehala noshu unganekwa shi ambidhidhe iilonga mbika ya simanenena. Mbela monkalamwenyo yoye owu ukitha ngaa eitulomo lyoye kuukalele?

10. (a) Gandja oshiholelwa shankene tatu vulu okukala tu na uupenda moshili. (b) Uukalele owe ku kwathela ngiini kuu vulwe?

¹⁰ Okukala aalaadhi muukalele ohaku tu kwathele tu kale aapenda moshili. Tala kwaashoka sha popiwa kuMitchel, ngoka a kala omukuluntugongalo ethimbo ele noku li omukokolindjila. Okwa ti: “Ondi hole okulombwela aantu kombinga yoshili. Ohandi dhiladhila kombinga yoshitopolwa oshipe mOshungolangelo nenge mo-Awake! e tandi kuminwa uunongo, omayele nosho wo uuyelele mboka hawu kala mo wu li nawa nowu li pandjele. Ohandi kala nda hala okuya muukalele ndi ka tale kutya aantu otayi ki inyenga ngiini, nankene ndi na okupendutha ohokwe yawo. Uukalele  ohawu kwathele ndje ndi kale itaandi tengauka. Ohandi kambadhala ndi ninge iinima yilwe pethimbo mpoka itaayi yi moshipala uukalele wandje.” Sha faathana, ngele otwa kala twi ipyakidhila miilonga yetu iiyapuki otashi ke tu kwathela tu kale twa dhiginina oshili momasiku ngaka gahugunina.—Lesha 1 Aakorinto 15:58.

11. Omolwashike tu na okukala hatu li iikulya ayihe yopambepo mbyoka hatu pewa kuJehova?

¹¹ Jehova okwe tu pa ofulundundu yiikulya yopambepo mbyoka tayi adhika miileshomwa opo yi tu pe oonkondo. Nopwaahe na omalimbililo, owu na okukala to dhimbulukwa ethimbo ndyoka wa li wa lesha oshileshomwa e to popi to ti: ‘Shika osho nda kala nale nda pumbwa!’ Jehova okwa fa owala ongame e shi nyolela!’ Shoka kashi shi oshikumithi. Jehova ohe tu longo noku tu pukulula okupitila momasiloshimpwiyu ngaka. Okwa li a ti: “Otandi ku ulukile ondjila ndjo u na okulandula.” (Eps. 32:8) Mbela ohatu ningi ngaa oonkambadhala tu lye iikulya ayihe yopambepo mbyoka hatu pewa nokutedhatedha kuyo? Okuninga ngaaka otaku ke tu kwathela tu tsikile okwiimika iiyimati tse kaatu se pambepo momasiku ngaka gahugunina omadhigu.—Lesha Episalomi 1:1-3; 35:28; 119:97.

12. Oshike tashi tu kwathele tu kale twa lenga iikulya yetu yopambepo?

¹² Otashi ka kala shi li nawa kutse tu dhiladhile kiilonga mbyoka ya kwatelwa mokushilipaleka kutya ohatu mono pandjigilile iikulya mbika yopambepo. Okomitiye yOkunyola yOlutuwiliki ohayi tonatele iilonga yokuninga omapekapeko, yokunyola, yokuleshulula, yokugoholola omathano ngoka haga yi miileshomwa, noyokutoloka iileshomwa yetu mbyoka hayi nyanyangidhwa nosho wo iinima mbyoka hayi tulwa kepandja lyetu lyokOintaneta. Iitayimbelewa mbyoka hayi pilinta ohayi tumu iileshomwa komagongalo gopopepi nogokokule. Iilonga ayihe mbika ohayi longwa nelalakano lyashike? Opo oshigwana shaJehova shi kale sha paluka pambepo. (Jes. 65:13) Natu kale hatu li twi itula mo iikulya ayihe yopambepo mbyoka hatu mono okupitila mehangano lyaJehova.—Eps. 119:27.

13, 14. Oolye taya ambidhidha omalongekidho gaJehova megulu, nongiini tatu vulu okuninga sha faathana kombanda yevi?

¹³ Memoniko ndyoka omuyapostoli Johannes a li a pewa, okwa li a mono Jesus a kayila okakambe okatokele a ka kondjithe mboka ya tukulila Jehova oshipotha. (Eh. 19:11-15) Itashi koleke tuu eitaalo lyetu okutseya kutya konima yaJesus okwa li ku na aayengeli aadhiginini nokwa li pamwe naagwayekwa mboka ya sinda uuyuni, noya pewa nale ondjambi yawo yomegulu! (Eh. 2:26, 27) Shoka kashi shi tuu oshiholelwa sha dhenga mbanda shokwaambidhidha omalongekidho gaJehova!

¹⁴ Sha faathana, ongundu onene ohayi ambidhidha iilonga yaamwahe yaKristus aagwayekwa mboka ye li natango kombanda yevi notaya kwatele komeho mehangano kunena. (Lesha Sakaria 8:23.) Ongiini kehe gumwe ta vulu okuulika kutya ota ambidhidha omalongekidho gaJehova? Omukalo gumwe, omokuvulika kwaamboka taya wilike megongalo. (Heb. 13:7, 17) Shoka ohashi tamekele megongalo lyetu. Mbela shoka hatu popi ohashi ningitha ngaa yalwe ya kale ya simaneka aakuluntugongalo nosho wo ondondo yawo yokutonatela? Mbela ohatu ladhipike ngaa aanona yetu ya kale ya simaneka aalumentu mbaka aadhiginini nokuya kuyo ya ka pewe omayele gopamanyolo? Natango, mbela ohatu kundathana ngaa naanegumbo lyetu nkene tatu vulu okulongitha iimaliwa yetu tu ambidhidhe iilonga yokuuvitha muuyuni auhe? (Omayel. 3:9; 1 Kor. 16:2; 2 Kor. 8:12) Mbela otwa tala ko ngaa uuthembahenda wokukaleka Oshinyanga shUukwaniilwa monkalo ombwanawa ku li oshinima sha simana? Ombepo yaJehova ohayi kala tayi longo nawa megongalo moka mu na esimaneko lya tya ngaaka nosho wo uukumwe. Okupitila mombepo ndjoka ohatu mono aluhe ekwatho opo kaatu vulwe momasiku ngaka gahugunina.—Jes. 40:29-31.

15. Omolwashike tu na okukondja aluhe opo tu kale metsokumwe nelalakano enene lyaJehova?

¹⁵ Hugunina, opo tu kale tu na eidhidhimiko notu kale tatu endele pamwe nehangano lyaJehova, otu na okukaleka aluhe oonkalamwenyo dhetu metsokumwe netumwalaka ndyoka hatu uvithile yalwe ‘mokwiilonga okutseya shoka sho opalela Omuwa.’ (Ef. 5:10, 11) Omolwokwaagwanenena kwetu nosho wo oonkambadhala dhaSatana nosho wo uuyuni mbuka wa kolokosha, ohatu kala aluhe tatu kondjo nomanwethomo omawinayi moonkalamwenyo dhetu. Yamwe yomune aamwatate naamwameme aaholike kehe esiku otamu kondjo nuudhigu opo mu kaleke po ekwatathano lyeni naJehova. Jehova oku mu hole noonkondo molwaashoka otamu ningi oonkambadhala dha tya ngaaka. Inamu teka omukumo! Okukaleka oonkalamwenyo dhetu metsokumwe nelalakano lyaJehova, otaku ke tu etela enyanyu olindji notatu ka kala tu na uushili kutya elongelokalunga lyetu kali shi osima yowala.—1 Kor. 9:24-27.

16, 17. (a) Otu na okuninga shike ngele otwa yono sha kwata miiti? (b) Uuwanawa wuni tatu mono moshiholelwa shaAnne?

¹⁶ Mbela otu na okuninga shike ngele otwa yono sha kwata miiti? Konga ekwatho nziya. Ngele owa holeke epuko lyoye oto ka nayipika owala onkalo. Dhimbulukwa, David okwa li a popi kutya sho a li a mwenena omayono ge, ‘okwa li a pu po kokulila esiku kehe.’ (Eps. 32:3) Eeno, okuholeka omayono getu ngoka twa ninga meholamo otaku tu lolodha owala pamaiyuvo nopambepo, ihe ‘ngoka te ga hempulula note ga etha, oye ta silwa ohenda.’—Omayel. 28:13.

¹⁷ Dhiladhila koshiholelwa shaAnne. * Sho Anne a li ti ihilile poomvula 20 okwa li omukokolindjila gwondjigilile. Ihe okwa li a tameke okukala e na onkalamwenyo yopaali. Shika osha li she mu gumu noonkondo. Okwa ti: “Onda li owala ndi na eiyuvo tali nyenyetele ndje. Kanda li ndi na enyanyu lyasha nonda li nda polimana kehe ethimbo.” Okwa li a ningi po shike mbela? Okwa popi kutya esiku limwe pokugongala opwa li pwa kundathanwa Jakob 5:14, 15. Anne okwa li a dhimbulula kutya okwa pumbwa ekwatho nokwa li a yi kaakuluntugongalo ye ke mu kwathele. Sho a li ta dhiladhila kwaashoka sha li sha ningwa po, okwa popi a ti: “Omanyolo ngoka oga fa oopela ndhoka twe dhi nyolelwa kuJehova opo dhi tu aludhe pambepo. Ihashi kala oshipu okunina oopela, ihe ohadhi aludha. Onda li nda tula miilonga omayele ngoka taga adhika momanyolo ngoka, noga li ga longo.” Ngashingeyi opwa pita oomvula dhontumba, naAnne oku li ta longele Jehova nuulaadhi e na eiyuvo lya yela noku na oonkondo oompe.

18. Otu na okukala twa tokola toko okuninga shike?

¹⁸ Kashi shi tuu uuthembahenda okukala momasiku ngaka gahugunina nokukala oshitopolwa shehangano lyaJehova ewanawa kaaku na we! Natu kale twa tokola toko tu kale aluhe twa lenga shoka tu na. Natu longele kumwe tu li iilyo yegumbo limwe tu kale hatu kala pokugongala pandjigilile tu longele Jehova pamwe negongalo lyetu, tu konge nuudhiginini mboka ye na omitima omiwanawa moshitopolwa shetu nokukala hatu nyanyukilwa okulya pandjigilile iikulya yetu yopambepo mbyoka hatu pewa. Natu kale wo hatu ambidhidha mboka taya wilike nokukaleka oonkalamwenyo dhetu metsokumwe netumwalaka ndyoka tu na. Ngele otwa ningi ngaaka, itatu ka kala owala tatu endele pamwe nehangano lyaJehova ihe itatu ka vulwa wo nando okulonga uuwanawa.