1, 2. (a) Iinima yini tayi ulike kutya megongalo lyaKolossa lyomethelemumvo lyotango omwa li mwi iteyele ombepo yetopoko? (b) Aamwatate megongalo lyaKolossa oya li ya pewa omayele geni ngoka tage ya kwathele ya kale ya kola meitaalo?

MEGONGALO lyaKolossa lyomethelemumvo lyotango, omwa li mwi iteyele ombepo yetopoko. Yamwe oya li taya hwahwameke aantu ya kale ya kakatela kOmpango yaMoses. Yalwe oya li taya humitha komeho omalongo guufilosofi goshipagani, ngoka ga li taga keelele aantu ya kale tayi isile yo yene oshimpwiyu. Paulus okwa li a nyolele Aakolossa ontumwafo tayi ya tsu omukumo ndjoka tayi ya londodha ya angale omalongo ngoka giifundja. Okwa nyola a ti: “Kotokeni ano, mwaa yulwe nando okomuntu nomalongo guunongo wopantu nomafundjaleko gaa fele. Ogo ogi ikwatelela komithigululwakalo dhaantu noga za moombepo ndhoka tadhi pangele mewangandjo, ihe ne kaleni muKristus.” —  Kol. 2:8.

² Aakriste aagwayekwa megongalo ndyoka oya li ye na okukala aluhe ye li uupathi ya takamitha. Ngele oya landula ‘omalongo guunongo wopantu,’ nenge tu tye guuyuni, nena otaya ka pilamena ehupitho ndyoka Jehova te ke ya pa. (Kol. 2:20-23) Paulus okwa li e ya ladhipike, opo ya vule okukaleka po ekwatathano lyawo naKalunga ndyoka li na ondilo. Okwe ya nyolele a ti: ‘Dhiladhileni aluhe iinima yaahwiyaka yopombanda, haambika yopevi.’ (Kol. 3:2) Osha yela kutya  aamwahe yaKristus oya li ye na okukaleka momadhiladhilo gawo etegameno ndyoka ye na lyoku ka kala nomwenyo sigo aluhe. Etegameno ndyoka oye li “pungulilwa nawa megulu.” —  Kol. 1:4, 5.

3. (a) Aakriste aagwayekwa ohaya kaleke etegameno lini momadhiladhilo gawo? (b) Omapulo geni tatu ka kundathana moshitopolwa shino?

³ Aakriste aagwayekwa mboka ye li kombanda yevi kunena, nayo ohaya kaleke momadhiladhilo iinima yUukwaniilwa waKalunga womegulu nosho wo etegameno lyawo ye li ‘aathigululi pamwe naKristus.’ (Rom. 8:14-17, OB-1954) Ongiini kombinga yAakriste mboka ye na etegameno lyoku ka kala nomwenyo kombanda yevi? Mbela oohapu dhaPaulus otadhi longo nokuyo? Omomukalo guni ‘oonzi dhilwe’ tadhi vulu okukaleka momadhiladhilo ‘iinima yopombanda?’ (Joh. 10:16) Abraham naMoses oya li ya piti moonkalo oondhigu. Ihe nonando ongawo, oya li neitaalo lya kola, noya kaleke aluhe iinima yopombanda momadhiladhilo gawo. Uuwanawa wuni tatu ka mona uuna tatu landula oshiholelwa shawo?

4. Oonzi dhilwe otadhi vulu ngiini okukaleka aluhe momadhiladhilo gadho iinima yopombanda?

⁴ Oonzi dhilwe odhi na etegameno lyoku ka kala nomwenyo kombanda yevi. Ihe nadho ohadhi kaleke iinima yopombanda momadhiladhilo. Ngiini mbela? Omokupititha komeho Jehova Kalunga nosho wo iinima yUukwaniilwa monkalamwenyo yadho. (Luk. 10:25-27) Uuna tatu shi ningi, ohatu ulike kutya otatu landula oshiholelwa shaKristus. (1 Pet. 2:21) Kunena natse ohatu iyadha moonkalo dha fa ndhoka mwa li Aakriste yomethelemumvo lyotango. Iinima mbyoka tayi dhana onkandangala muuyuni waSatana, ngaashi omalongo giifundja, uunongo wopantu nohole yokuhola omaliko, ohayi tu nwetha mo nuupu. (Lesha 2 Aakorinto 10:5.) Otu na okulandula oshiholelwa shaJesus. Otwa pumbwa okukala tu li uupathi twa takamitha, opo kaatu gwile moonkalo ndhoka tadhi vulu okuyona po ekwatathano lyetu naKalunga.

5. Omapulo geni tatu vulu okwiipula, opo tu tale ngele otatu lalakanene iinima yopamaliko?

⁵ Mbela ohole yokuhola omaliko oya nwetha mo onkalamwenyo yoye? Iinima mbyoka tu hole, olundji ohayi imonikila mokudhiladhila kwetu nomwaashoka hatu ningi. Jesus okwa ti: “Nkoka ku na eliko lyoye, oko ku na nomwenyo gwoye wo.” (Mat. 6:21) Olundji omitima dhetu ohadhi kala tadhi tu hekaheka. Opo tu shi mone otwa pumbwa okwiikonakona omathimbo nomathimbo. Ipula to ti: ‘Ethimbo li thike peni handi kala tandi dhiladhila iimaliwa? Mbela ethimbo lyandje olindji ohali pwile owala mokudhiladhila iinima yopangeshefa, nenge munkene ndi na okulikola iimaliwa oyindji? Mbela ohandi kala tandi dhiladhila owala onkalamwenyo yuuzeko? Mbela onda pititha ngaa iinima yopambepo komeho monkalamwenyo yandje? (Mat. 6:22) Jesus okwa ti kutya “inamu ilikolela omaliko kombanda yevi.” Mboka taya lalakanene iinima yopamaliko monkalamwenyo yawo, otaya tula uupambepo wawo moshiponga. —  Mat. 6:19, 20, 24.

6. Oshike tashi ke tu kwathela tu sindane molugodhi lwokukondjitha iinima yopanyama?

⁶ Molwashoka inatu gwanenena, oshipu kutse okuninga omapuko. (Lesha Aaroma 7:21-25.) Otu na okweetha ombepo yaKalunga yi longe mutse. Ngele itatu shi ningi otashi vulika tu iyethele ‘mokulonga iilonga yomomilema.’ Iilonga mbyoka ongaashi, ‘uufukedhi, uunkolwi, uuholume nuukeeneidhiliko.’ (Rom. 13:12, 13) Opo tu sindane molugodhi moka tu li lwokukondjitha ‘iinima mbika yopevi,’ sha hala okutya, iinima mbyoka onyama hayi kala ya hokwa, otu na aluhe okukaleka momadhiladhilo getu iinima yopombanda. Otu na okukambadhala twa mana mo, opo tu sindane. Omuyapostoli Paulus okwa ti: “Onda kolondeke olutu lwandje noku lu dhenga, ndi lu vulikithe.” (1 Kor. 9:27) Ngele otwa hala okukala methigathano lyoku ka mona omwenyo gwaaluhe, otwa pumbwa eipangelo. Ngashingeyi natu ka taleni shoka aalumentu yaali aadhiginini  mboka ya li ko nale ya ningi, opo ya kale ya “hokiwa kuKalunga.” —  Heb. 11:6.

7, 8. (a) Abraham naSara oya li ya taalelwa kuupyakadhi wuni? (b) Abraham okwa kala aluhe ha dhiladhila kiinima yini?

⁷ Jehova okwa li a pula Abraham noyaandjawo ya tembukile kuKaanan. Abraham okwa ningi ngaashi a lombwelwa. Jehova okwa ningi ehangano naAbraham, molwaashoka okwa li e na eitaalo noha vulika kuye. Jehova okwa ti: “Otandi ke ku pa oluvalo olwindji, olwo notalu ka ninga oshigwana oshinene. Otandi ku yambeke.” (Gen. 12:2) Ihe tatekulululwa Abraham nomukadhi Sara oya kala inaaya mona oluvalo ethimbo nuule. Mbela Jehova okwa li a dhimbwa shoka e mu uvanekela? Aawe. Abraham nooyandjawo oya li ya thigi po egumbo lyawo naakwanezimo yawo muUr, oshilando oshiyamba sha li muMesopotamia. Oya li ye ende oshinano shookilometa 1 600, opo ya thike muKaanan. Oya kala momatsali, oya li ya si ondjala noya kala nokuponokelwa kaayugi. (Gen. 12:5, 10; 13:18; 14:10-16) Osha yela kutya onkalo muKaanan kaya li ompu. Ihe nonando ongawo, muAbraham nooyandjawo kamu na siku mwi ile edhiladhilo lyokushuna kuUr. —  Lesha Aahebeli 11:8-12, 15.

⁸ Pehala lyokukala aluhe ta dhiladhila ‘iinima mbika yopevi,’ Abraham okwa kala “i itaala muJehova.” (Gen. 15:6, NW) Abraham okwa kala ha dhiladhila iinima yopombanda mokugandja eitulomo kwaashoka Kalunga e mu uvanekela. Oshizemo osha li shini? Abraham okwa li a lalekwa nuuyamba kuKalunga Omukombandambanda sho e mu holokele noku mu lombwela ta ti: “‘Tala kegulu, u yalule oonyothi; osho to ka kala u na oluvalo olwindji lu thike pudho.’” (Gen. 15:5) Oohapu ndhoka odha li dha shilipaleke Abraham kutya Jehova ina dhimbwa shoka e mu uvanekela. Ethimbo kehe Abraham ta tala kegulu, osha li hashi mu dhimbulukitha euvaneko lyaJehova kutya oluvalo lwe otalu ka kala lu thike poonyothi dhokegulu. Ethimbo sho lya thikana, Abraham okwa vala omumati, ngaashi owala Jehova e shi uvaneka. —  Gen. 21:1, 2.

9. Oshiholelwa shaAbraham otashi tu ladhipike ngiini tu kale twi ipyakidhila niilonga yaKalunga?

⁹ Abraham okwa li a tegelela omauvaneko gaKalunga ga gwanithwe. Ngaashi Abraham, natse otwa tegelela ga gwanithwe kunena. (2 Pet. 3:13) Ngele otwa kala ihaatu dhiladhila aluhe iinima yopombanda, otatu ka mona omauvaneko ngoka itaaga gwanithwa nziya. Shoka otashi vulu okunkundipaleka ekwatathano lyetu naKalunga. Mbela owa ningile ngaa nale omaiyambo monakuziwa, opo wu vule okukutha uukokolindjila nenge wu tamunune mo uukalele woye momikalo dhi ili nodhi ili? Ngele owe shi ninga, owu shi okupupulwa kombunda. Ngashingeyi oho ningi shike? Dhimbulukwa kutya Abraham okwa kala ta dhiladhila owala “oshilando shoka shi na omikanka dha kolelela.” (Heb. 11:10) Okwa li “itaale Kalunga, nomolweitaalo ndika Kalunga okwe mu tala ihe omuyuuki.” —  Rom. 4:3.

10. Moses okwa kala nonkalamwenyo ya tya ngiini okuza kuugundjuka we?

¹⁰ Moses okwa li gumwe gwomaalumentu mboka haya dhiladhila aluhe iinima yopombanda. Okwa li a “longwa uunongo auhe wAaegipiti” sho e li omugundjuka. Moses okwa li a longekeka. Okwa li ha kala nokuli muuwa waFarao, pethimbo ndyoka Egipiti oye a li epangelo enankondo muuyuni. Omolwelongo ndyoka a mona, Moses okwa “ningi omuntu omunene mokupopya nomokulonga.” (Iil. 7:22) Omolwelongo ndyoka okwa li ta vulu okwiiningila edhina muEgipiti. Ihe okulonga ehalo lyaKalunga oko kwa kala kwa simanenena kuye.

11, 12. Moses okwa li a lenga elongo lini, notu shi shi ngiini?

¹¹ Moses okwa li a longwa kuyina, Jokebed, kombinga yaKalunga kaIsraeli manga e li omushona. Moses okwa li a lenga ontseyo yokutseya Jehova, nokwa li e yi tala ko yi vulithe puuyamba woludhi kehe. Onkee ano, ka li e na ko nasha  noompito ndhoka a li ta ka mona, sho e li muuwa waFarao. (Lesha Aahebeli 11:24-27.) Elongo lyopambepo nosho wo eitaalo lye muJehova, oyo ya li ya ningitha Moses a kale ha dhiladhila aluhe iinima yopombanda.

¹² Elongo ndyoka Moses a li e na olya li lya dhenga mbanda pethimbo lyawo. Mbela okwa li e li longitha a humithe komeho eithano lye muEgipiti, i iningile edhina, nenge i imonene iinima yopamaliko? Hasho nando. Okwa ningi shike? Ombiimbeli otayi ti: ‘Okwa tindi kutya ye ke shi omuna gwomukadhona omuna gwaFarao. Oye okwa hogolola po okuhepekwa pamwe naantu yaKalunga ye ina zimina uutoye wuulunde wokathimbo kowala.’ Osha yela kutya Moses okwa li a longitha elongo lyopambepo a humithe komeho elalakano lyaJehova.

13, 14. (a) Oshike sha li sha kwathele Moses a kale a gwana okupewa oshinakugwanithwa shoka Jehova a li e mu halela? (b) Ngaashi Moses, natse otwa pumbwa okuninga shike?

¹³ Moses okwa li e hole Jehova noonkondo nosho wo oshigwana she. Sho e na omimvo 40, okwa li ta dhiladhila kutya ota vulu okumangulula oshigwana shaKalunga muupika waEgipiti. (Iil. 7:23-25) Ihe Jehova okwa li e shi wete kutya Moses okwa pumbwa edheulo lyontumba natango. Okwa li a pumbwa eifupipiko, eidhidhimiko, uunambili nosho wo eipangelomwene. (Omayel. 15:33) Okwa li a pumbwa edheulo ndyoka tali mu kwathele e ki idhidhimikile omamakelo nosho wo omaudhigu ngoka taga ka kala ge mu taalela komeho. Onkee ano, Moses okwa li e na natango okulitha oonzi omimvo 40, opo a mone edheulo lya pumbiwa a kokeke uukwatya mboka wopakalunga.

¹⁴ Osha yela kutya Moses okwa li i ilongo oshiilongomwa sha simana sho e li omusita gwoonzi. Omolwashike tatu tile ngawo? Ombiimbeli otayi ti kutya Moses okwa ningi “omulumentu omwiifupipiki e vule aantu ayehe kombanda yevi.” (Num. 12:3) Okwa li ilongo eifupipiko ndyoka lya li lye mu kwathele u ungaunge neidhidhimiko naantu yomaukwatya gi ili nogi ili, noku ya kwathela nomaupyakadhi ngoka ye na. (Eks. 18:26) Otashi vulika natse twa pumbwa okukokeka omaukwatya gopambepo ngoka tage ke tu kwathela tu pite “muudhigu uunene,” opo tu ye muuyuni uupe waKalunga. (Eh. 7:14, NW) Mbela otu na ngaa ombili naayehe, mwa kwatelwa naantu mboka aadhigu nenge haya geye nziya noonkondo? Omuyapostoli Petrus okwa li a kumagidha ooitaali ooyakwawo a ti: “Simanekeni aantu ayehe, holeni ooitaali ooyakweni.” (1 Pet. 2:17) Atuheni natu tuleni miilonga oohapu ndhoka.

15, 16. (a) Omolwashike sha simanenena tu kale aluhe hatu dhiladhila iinima mbyoka yu uka? (b) Omolwashike sha simana Aakriste ya kale ye na omikalo omiwanawa?

¹⁵ Otu li ‘momathimbo omadhigu’ okukaliwa mugo. (2 Tim. 3:1) Onkee ano, opo tu kale twa tonata pambepo, otwa pumbwa okukala aluhe hatu dhiladhila iinima mbyoka yu uka. (1 Tes. 5:6-9) Opu na omikalo ndatu nkene tatu vulu oku shi ninga monkalamwenyo yetu.

¹⁶ Gwotango, okukala tu na Omikalo omiwanawa: Omuyapostoli Petrus okwa popya kutya okukala tu na omikalo omiwanawa oshinima sha simana. Okwa ti: “Kaleni wo mu na omikalo omiwanawa mokati kaapagani, opo . . . ya dhimbulule iilonga yeni iiwanawa noya ka hambelele Kalunga mesiku ndyoka te ke ya.” (1 Pet. 2:12) Omikalo dhetu odhi na okukala omiwanawa uuna tu li megumbo, kiilonga, kosikola, tatu dhana nenge muukalele. Eihumbato lyetu oli na aluhe okusimanekitha Jehova. Odhoshili kutya aantu inatu gwanenena otu na egamo lyokuninga omapuko. (Rom. 3:23) Ihe otatu vulu okusindana molugodhi lwetu moka tu li lwokukondjitha onyama yetu ndjoka inaayi gwanenena. Timoteus gwotango 6:12 ota kumagidha kehe gumwe gwomutse ta ti: “Matuka methigathano ewanawa lyeitaalo.”

17. Ongiini tatu vulu okuholela iikala yopamadhiladhilo ya fa yaJesus? (Tala kethano lyopetameko.)

¹⁷ Omukalo omutiyali, iikala yetu: Omikalo omiwanawa nosho wo iikala iiwanawa ekuvu nela. Omuyapostoli Paulus okwa ti: “Okukala kweni naku kale kwa fa kwaJesus  Kristus.” (Fil. 2:5) Jesus okwa li e na iikala ya tya ngiini? Okwa li omwiifupipiki. Eifupipiko olya li lye mu inyengitha a ninge omaiyambo muukalele we. Okwa kala aluhe hi ipula nkene e na okuthikitha kaantu yalwe onkundana ombwanawa yUukwaniilwa waKalunga. (Mark. 1:38; 13:10). Jesus okwa li a tala ko Oohapu dhaKalunga kutya odhi na oonkondo oonene. (Joh. 7:16; 8:28) Okwe dhi konakona nuukeka, opo a vule okutotha mudho, oku dhi popila noku dhi fatulula. Ngele otwa kala aaifupipiki, aalaadhi muukalele nomoku konakona Ombiimbeli paumwene, otatu ka kala tu na omadhiladhilo ga fa gaKristus.

18. Ongiini tatu vulu okukwathela yalwe okupitila miilonga yaJehova?

¹⁸ Omukalo omutitatu, okukwathela yalwe: Jehova okwa hala opo “kehe shimwe megulu nokombanda yevi nomohi shi tse oongolo medhina lyaJesus.” (Fil. 2:9-11) Nonando Jesus oku na ondondo ya shigilila ko meshito alihe, oha vulika kuHe nehalo ewanawa. Onkee ano, natse sho tu na okuninga. (1 Kor. 15:28) Otatu shi ningi ngiini mbela? Otu na okukwathela yalwe okupitila miilonga yokuuvitha mbyoka twa lombwelwa tu longe. Otwa lombwelwa taku ti: “Ka ningeni aantu ayehe aalongwa yandje.” (Mat. 28:19) Otwa hala ishewe tu tule miilonga oohapu ndhoka tadhi ti: “Natu ningileni kehe gumwe uuwanawa.” Shika otu na oku shi ningila aantu yalwe nosho wo aamwatate naamwameme. —  Gal. 6:10.

19. Otu na okukala twa tokola toko okuninga shike?

¹⁹ Jehova ohe tu dhimbulukitha tu kala hatu dhiladhila aluhe iinima yopombanda. Mbela katu na okukala nolupandu sho he shi ningi? Onkee ano, “natu matukeni twa mana mo methigathano ndyoka li li komeho getu” sigo twa thiki kethikilo. (Heb. 12:1) Atuheni natu longeleni Tate yetu gwomegulu “nomwenyo aguhe.” Ngele tatu shi ningi, nena ote ke tu pa ondjambi onene. —  Kol. 3:23, 24.