EGAMENO lini omusamane e na okupa omukulukadhi gwe? Aantu oyendji oya putudhwa yi itaalithwa kutya oshilonga shomusamane sha simanenena okukwathela uukwanegumbo we wu kale wa gamenwa pashimaliwa. Ihe nonando oongawo, aakulukadhi mboka ye na omaliko ogendji ohaya kala yu uvite inaaya gamenwa pamaiyuvo noye na uumbanda nokuli. Pashiholelwa, omukiintu gumwe Omuspania gwedhina Rosa, okwa popi kombinga yomulumentu ngoka e mu hokana, a ti: “Nale shampa e li naamboka kaaye shi yaandjawo okwa li ha kala omulumentu omwaanawa, ihe ngele e li megumbo okwa li e na onyanya.” Joy, ngoka a za koNigeria, ota ti: “Uuna itaandi tsu kumwe nomusamane gwandje, oha ti: ‘Owu na okuninga ashihe shoka tandi ku lombwele molwaashoka ngame omusamane gwoye.’”

Ongiini omulumentu e na okugwanitha po oshinakugwanithwa she e li omusamene momukalo gwopahole? Omusamane oku na okuninga shike opo a ninge egumbo lye li kale ehala ‘lyevululuko’ komukulukadhi gwe? — Rut 1:9, OB-1954.

Nonando omusamane nomukulukadhi oye thike pamwe momeho gaKalunga, Ombiimbeli otayi ti kutya kehe gumwe oku na onkandangala ndjoka ta dhana muukwanegumbo. Aaroma 7:2 otaya ti kutya omukiintu a hokanwa oku li kohi ‘yompango yomusamane gwe.’ (yelekanitha NW.) Ngaashi owala omahangano ogendji haga tula po mboka taye ga tonatele, Kalunga okwa tula po wo omusamane a kale omutse gwomukulukadhi gwe. (1 Aakorinto 11:3) Aasamane oye na okukwatela komeho momaukwanegumbo gawo.

Mu li aasamane, omu na okulongitha ngiini oonkondopangelo ndhoka mwa pewa kuKalunga? Ombiimbeli otayi ti: “Holeni aakiintu yeni, naanaa ngashika Kristus e hole egongalo lye.” (Aaefeso 5:25) Odhoshili kutya, nonando Jesus Kristus ka li a hokana, oshiholelwa she otashi vulu oku ku kwathela wu ninge omusamane e li nawa. Tala kutya owu na oku shi enda ngiini.

Jesus okwa li ha kongo oompito a hekeleke yalwe noku ya kwathela. Jesus okwa li u uvanekele mboka ya li taya thindilwa kongudhi noya gwililwa po komaupyakadhi gopaumwene, a ti: “Ileni kungame, . . . ongame notandi mu pe evululuko.” (Mateus 11:28, 29) Olundji okwa li ha pupaleke okumona iihuna kwawo kwopalutu nokwa li he ya pe etalaleko lyopambepo. Sho osho molwaashoka aantu oyendji oya li yu uvite ya hedha popepi naJesus, ye na uushili kutya okwa li ta ka pupaleka omitengi dhawo!

 Nkene aasamane taya vulu okuholela Jesus. Konga omikalo ndhoka to ka longitha wu kwathele omukulukadhi gwoye miilonga mbyoka e na okulonga. Aakulukadhi yamwe ohaya kala yu uvite ngaashi Rosa, ngoka a keme a ti: “Onda li owala omupika gwomusamane gwandje.” Mepingathano naashoka, omulumentu gwedhina Kweku, ngoka e na ondjokana tayi shi enditha nawa, ota ti: “Ohandi pula aluhe omukulukadhi gwandje kutya nandi mu kwathele ngiini niilonga. Molwaashoka ondi mu hole, ohandi katuka aluhe onkatu ndi mu kwathele miilonga yomegumbo.”

Jesus okwa li e na ondjaalela nolukeno. Omukiintu gumwe ohepele okwa li a monithwa iihuna kuupyakadhi wa kwata miiti wuukolele, uule woomvula 12. Sho u uvu kombinga yoonkondo dhaJesus dhokulonga iikumithalonga, “okwa ti: ‘Shampa tuu tandi gumu koonguwo dhe, nena otandi aluka.’” Okwa li e li mondjila. Okwe ya puJesus, e ta gumu konguwo ye, nokwa li a aluka nziya. Nonando yamwe mboka ya li po otashi vulika ya li ya thiki pehulithodhiladhilo kutya omukiintu ngoka okwa li e shi ningi momutse gwe mwene, Jesus okwa li e shi mono kutya omukiintu ngoka okwa halelela okwaaluka. * Okwe mu lombwele nombili, a ti: “Mumwandje, . . . aluka kuuvu woye.” Ka li owala a henuka oku mu sitha ohoni nenge oku mu ganda ihe okwa li e wete kutya omukiintu ote ehama. Kungawo oku ulike kutya ye omulumentu e li ngiini, ano omulumentu omunalukeno. —  Markus 5:25-34.

 Nkene aasamane taya vulu okuholela Jesus. Uuna omukulukadhi gwoye kuu uvite nawa, mu pa eitulomo lya gwedhwa po e to kala wi idhidhimika. Kambadhala okutala ko iinima ngaashi e yi tala ko nokuuva ko omainyengo ge. Pashiholelwa, Ricardo, ota ti: “Uuna nda ndhindhilike kutya omukulukadhi gwandje ota ningilwa nayi nokiinima iishona, ohandi ningi oonkambadhala dha gwedhwa po ndi yande okupopya iinima mbyoka tayi mu pimbilike.”

Jesus okwa li ha popi aluhe naalongwa ye. Jesus okwa li ha kundathana nookuume ke. Okwa ti: “Iinima ayihe mbyoka nde yi uva kuTate, onde yi mu lombwela.” (Johannes 15:15) Odhoshili kutya omathimbo gamwe Jesus okwa li ha kala a hala okwiikalela ta dhiladhila nota galikana. Ihe olundji okwa li ha lombwele aalongwa ye omaiyuvo ge gomuule. Ongulohi ndjoka ya tetekele okudhipagwa kwe onga omukolokoshi, okwa li e ya lombwele a manguluka kutya okwa li a sa ‘oluhodhi olunene.’ (Mateus 26:38) Nokuli nuuna ya ningi sha she mu yemateka, Jesus ka li nando e etha okupopya nookuume ke. —  Mateus 26:40, 41.

Nkene aasamane taya vulu okuholela Jesus. Kala ho lombwele omukulukadhi gwoye shoka shi li momadhiladhilo goye nomomutima gwoye. Omukulukadhi otashi vulika a nyenyete kutya omusamane gwe okwa fa kee na uupyakadhi wokupopya montaneho ihe megumbo oha kala owala a mwena. Kombinga yimwe, ndhindhilika shoka Ana ha kala u uvite uuna omusamane gwe e mu mbumbulile omutima gwe. Okwa ti: “Ohandi mono kutya oku hole ndje shili, nohandi kala ndu uvite ndi na ekwatathano lyopothingo naye.”

Henuka okuuvitha nayi omukulukadhi gwoye mokukala wa mwena. Omukiintu gumwe okwa ti: “Uuna omusamane gwandje a geela ndje, oha tindi okupopya nangame uule womasiku. Oha ningitha ndje ndi kale ndu uvite ondjo nondi tondike.” Ihe Edwin, oha kambadhala okulandula oshiholelwa shaJesus. Okwa ti: “Uuna nda geye, ihandi mu yamukula pethimbo ndyoka, ihe ohandi kongo ompito tayi opalele tu pongolole po uupyakadhi.”

Joy, ngoka a popiwa petameko, okwa mona omalunduluko ngoka omusamane gwe a ninga sho a tameke okukonakona Ombiimbeli nOonzapo dhaJehova. Joy okwa ti: “Okwa ninga omalunduluko nota ningi oonkambadhala a kale omusamane omunahole shi vule shito mokuholela Jesus.” Aaihokani omamiliyona otaya mono uuwanawa mekonakonombiimbeli lya faathana. Mbela ngoye ino hala okumona uuwanawa mekonakonombiimbeli ndyoka? Oto vulu okupula gumwe gwomOonzapo dhaJehova a konakone nangoye Ombiimbeli oshali..