Ngele tu li nooitaali ooyakwetu, ohatu kala tu uvite ngaashi omukwaniilwa David ngoka a ti: “Osho opala sho opalelela aantu ayehe ngele taa kala ye [holathane] ngaashi aamwayinathana.” (Episalomi 133:1) Uukumwe wetu ihawu ya po owala ngeya, ihe kehe gumwe gwomutse oha dhana onkandangala moku wu kaleka po.

1. Oshike oshindhindhilikwedhi mokati koshigwana shaKalunga?

Ngele owa ka gongala kegongalo lyOonzapo dhaJehova, koshilongo shilwe, otashi vulika wu kale kuu uvite ko elaka ndyoka tali popiwa. Ihe nando ongawo, oto ka kala wu uvite wa manguluka nowa taambiwa ko. Omolwashike mbela? Omolwaashoka ohatu konakona Ombiimbeli tatu longitha iileshomwa ya faathana muuyuni awuhe. Ohatu ningi wo oonkambadhala tu ulukilathane ohole. Kutya nduno ohatu kala peni, atuhe ohatu longele Jehova tu “na edhiladhilo limwe nelalakano limwe.” — 1 Aakorinto 1:10.

2. Oshike to vulu okuninga, opo wu kaleke po uukumwe?

Ombiimbeli otayi ti: “Holathaneni ano lelalela nomwenyo aguhe.” (1 Petrus 1:22) Ongiini tatu vulu okutula miilonga omayele ngoka? Pehala lyokukala to gandja eitulomo komapuko gayalwe, kala ho tala komaukwatya gawo omawanawa. Ino kala owala ho endathana naamboka ye hole iinima mbyoka wu hole, ihe ninga wo oonkambadhala wu pange uukuume naamwatate naamwameme yomomaputuko gi ili nogi ili. Otwa pumbwa wo okulonga nuudhiginini, opo tu vudhe mo iikala yokatongo mbyoka tashi vulika tu na momitima dhetu. — Lesha 1 Petrus 2:17. a

3. Oto ka ninga po shike ngele kamu uvitathane nOmukriste omukweni?

Otwa hangana, nonando inatu gwanenena. Omathimbo gamwe ohatu uvitha nayi yakwetu nenge nokuli oyo ye tu yemateke. Oohapu dhaKalunga otadhi tu lombwele tu “dhiminathanii po oondjo ethimbo kehe, . . . naanaa, ngashika Omuwa e mu dhimine po.” (Lesha Aakolossa 3:13.) Ohatu uvitha Jehova nayi iikando oyindji, ihe nonando ongawo, ohe tu dhimine po. Onkee ano, okwa tegelela wo natse tu kale hatu dhimine po aamwatate naamwameme. Ngele owa mono kutya owu uvitha nayi gumwe, ninga oonkambadhala wu kandule po uupyakadhi mboka. — Lesha Mateus 5:23, 24. b

 ILONGA OSHINDJI

4. Kondjitha iikala yokatongo

Otu na okukala tu hole aamwatate naamwameme ayehe. Ihe otashi vulika shi kale oshidhigu okutaamba ko mboka ya yooloka ko kutse. Oshike tashi vulu oku tu kwathela? Lesha Iilonga 10:34, 35, e tamu kundathana omapulo taga landula:

• Jehova oha taamba ko aantu yomiigwana ayihe ye li Oonzapo dhe. Ongiini to vulu okuholela Jehova uuna to ungaunga naamboka ya za momaputuko gi ili?

• Iikala yokatongo yini aantu momudhingoloko gweni ye na, wa hala okuyanda?

Lesha 2 Aakorinto 6:11-13, e tamu kundathana epulo tali landula:

• Ongiini to vulu okukala wu hole aamwatate naamwameme mboka ya za momaputuko gi ili nogi ili?

5. Kala ho dhimine po nehalo ewanawa nokukaleka po ombili

Jehova ohe tu dhimine po nehalo ewanawa, nonando tse inatu pumbwa oku mu dhimina po. Lesha Episalomi 86:5, e tamu kundathana omapulo taga landula:

• Jehova ohe tu dhimine po shi thike peni?

• Mbela owa pandula ngaa sho he ku dhimine po?

• Oonkalo dhini tadhi vulu oku shi ninga oshidhigu kutse tu pange ombili nayalwe?

Ongiini tatu vulu okuholela Jehova, ngele otwa hala okukala twa hangana naamwatate naamwameme? Lesha Omayeletumbulo 19:11, e tamu kundathana epulo tali landula:

• Ngele gumwe okwe ku uvitha nayi nenge e ku yemateke, oto ka ninga po shike, wu hwepopaleke onkalo?

 Omathimbo gamwe ohatu yemateke ooyakwetu. Otu na okuninga po shike ngele otwi iyadha twe shi ninga? Dhana OKAVIDIO, e tamu kundathana epulo tali landula.

• Ngaashi twa mono mokavidio, omumwameme okwa li a ningi po shike, opo a pange ombili namukwawo?

 OWI ILONGO SHIKE?

Oto vulu okuhumitha komeho uukumwe megongalo, mokukala ho dhimine po yalwe nokuulukila aamwatate naamwameme ayehe ohole.

Omapulo geendululo

• Ongiini to vulu okweetha po okatongo?

• Oto ka ninga po shike ngele owi iyadha kaamu uvitathane nOmukriste omukweni?

• Omolwashike wa hala okulandula oshiholelwa shaJehova shokudhimina po yalwe?