OSHILESHWA 7
Uukwaniilwa waKalunga oshike?
1. Uukwaniilwa waKalunga oshike?
Oshike sha ningitha Jesus a kale o opalela okukala Omukwaniilwa? — MARKUS 1:40-42.
Uukwaniilwa waKalunga owo epangelo lyomegulu. Otawu ka hulitha po omapangelo agehe notawu ke shi ninga tashi wapa opo ehalo lyaKalunga li gwanithwe megulu nosho wo kombanda yevi. Onkundana kombinga yUukwaniilwa waKalunga ombwanawa lela! Masiku Uukwaniilwa waKalunga otawu ka gwanitha po ompumbwe yaantu yokukala ya hala epangelo ewanawa. Otali ka hanganitha aantu ayehe mboka ye li kombanda yevi. — Lesha Daniel 2:44; Mateus 6:9, 10; 24:14.
Uukwaniilwa owu na okukala wu na omukwaniilwa. Jehova okwa li a hogolola Omwana, Jesus Kristus, a ninge Omukwaniilwa gUukwaniilwa we. — Lesha Ehololo 11:15.
Tala okavidio Uukwaniilwa waKalunga oshike?
2. Omolwashike Jesus oye ta opalele okukala Omukwaniilwa?
Omwana gwaKalunga oye ta opalele okukala Omukwaniilwa molwaashoka oku na ohenda noku hole shoka shu uka. (Mateus 11:28-30) Oku na wo oonkondo dhokukwathela aantu molwaashoka ota ka pangela ombanda yevi okuza megulu. Sho a yumudhwa, okwa yi megulu e ta kuutumba a tegelela kolulyo lwaJehova. (Aahebeli 10:12, 13) Hugunina, Kalunga okwa li e mu pe oonkondo a tameke okupangela. — Lesha Daniel 7:13, 14.
3. Oolye taya ka pangela pamwe naJesus?
Ongundu yaantu mboka hayi ithanwa “aantu yaKalunga [“aayapuki,” NW]” otayi ka pangela pamwe naJesus megulu. (Daniel 7:27) Aayapostoli yaJesus aadhiginini oyo ya li ya hogololwa tango ye li aayapuki. Jehova ota tsikile okuhogolola aalumentu naakiintu aadhiginini ya ninge aayapuki. Ngaashi Jesus a yumudhilwe e na olutu lwopambepo, nayo ohaya yumudhwa ye na omalutu gopambepo ngele ya si. — Lesha Johannes 14:1-3; 1 Aakorinto 15:42-44.
Aantu yangapi taya yi megulu? Jesus okwe yi ithana “oshigunda oshishona.” (Lukas 12:32) Otaya ka kala ye li 144 000. Otaya ka pangela ombanda yevi pamwe naJesus. — Lesha Ehololo 14:1.
4. Oshike sha li sha ningwa po sho Jesus a tameke okupangela?
Uukwaniilwa waKalunga owa li wa tameke okupangela momumvo 1914. * Jesus sho a langekwa po e li Omukwaniilwa okwa li a longo oshilonga she shotango sho u umbile Satana noompwidhuli dhe kombanda yevi. Satana okwa geye noonkondo nokwa tameke okweeta uupyakadhi kombanda yevi. (Ehololo 12:7-10, 12) Okuza mpono omakemo gaantu kombanda yevi oga lundu pombanda noonkondo. Iinima ngaashi iita, oondjala, omikithi dhomikwawu, nomakakamo gomavi oyi li oshitopolwa ‘shendhindhiliko’ kutya masiku Uukwaniilwa otawu ka kala tawu wilike thiluthilu iinima ayihe kombanda yevi. — Lesha Lukas 21:7, 10, 11, 31.
5. Uukwaniilwa waKalunga owa pondola okuninga shike?
Uukwaniilwa waKalunga owu li nale tawu gongele ongundu onene yaantu ya za miigwana ayihe okupitila miilonga yokuuvitha mbyoka tayi longwa muuyuni awuhe. Aantu aaifupipiki ye li omamiliyona otaya ningi aapangelwa yaJesus. Uukwaniilwa waKalunga otawu ke ya gamena sho tawu ka hanagula po onkalelo ndjika tu li muyo ya kolokosha. Onkee ano, ayehe mboka ya hala okumona uuwanawa mUukwaniilwa waKalunga oye na okwiilonga okukala taya vulika kepangelo lyaJesus. — Lesha Ehololo 7:9, 14, 16, 17.
Pethimbo lyoomvula 1 000, Uukwaniilwa otawu ka gwanitha po elalakano lyaKalunga lyopetameko li na ko nasha naantu. Evi alihe otali ka ninga oparadisa. Konima yaashoka, Jesus ota ka shunitha Uukwaniilwa miikaha yaHe. (1 Aakorinto 15:24-26) Mbela opu na omuntu ngoka wa hala okulombwela kombinga yUukwaniilwa waKalunga? — Lesha Episalomi 37:10, 11, 29.
^ okat. 6 Opo wu mone uuyelele wa gwedhwa po kombinga yankene Ombiimbeli ya hunganeka shoka sha li tashi ka ningwa momumvo 1914, tala pepandja 215-218 membo Ombiimbeli otayi tu longo shike?
