OSHIILONGOMWA 61
Oya tindi okwiinyongamena oshiyelekela
Konima sho omukwaniilwa Nebukadnezzar a yaguma kombinga yoshiyelekela, okwi iningile oshimenka shoshingoli. Okwe shi dhikithitha molushandja lwaDura. Okwi ithana aantu mboka ya simanenena moshilongo, mwa kwatelwa Shadrak, Meshak naAbednego, opo ye ye ya gongale komeho gasho. Okwe ya lombwele a ti: ‘Shampa tuu mu uvu ewi lyoombenda, lyuuharpa nolyuushandja, inyongameneni oshiyelekela! Kehe gumwe ngoka itee shi inyongamene, otu umbilwa meziko lya hanya.’ Mbela aalumentu yatatu Aahebeli oya li taye ki inyongamena oshiyelekela, nenge oya li taya ka kala aadhiginini kuJehova?
Opo ihe Nebukadnezzar okwa gandja elombwelo iihikomwa yi hikwe. Aantu ayehe oyi inyongamene oshiyelekela noku shi simaneka, kakele kaShadrak, Meshak naAbednego. Aalumentu yamwe oye shi mono. Oya ningi po shike? Oya lombwele omukwaniilwa ya ti: ‘Aalumentu mboka yatatu Aahebeli oya tindi okwiinyongamena oshiyelekela.’ Nebukadnezzar okwa tumu ya ka talwe nokwa ti kuyo: ‘Otandi mu pe natango ompito mu inyongamene oshiyelekela. Ngele itamu shi ningi, otandi ke mu umbila meziko lya hanya. Kapu na kalunga ta vulu oku mu hupitha miikaha yandje.’ Aalumentu Aahebeli oya yamukula ya ti: ‘Inatu pumbwa we ompito yimwe. Kalunga ketu ota vulu oku tu hupitha. Nonando ine shi ninga, Nkeyama, itatu ki inyongamena oshiyelekela shoye.’
Omukwaniilwa Nebukadnezzar okwa li a thita po kondjahi. Okwa lombwele aantu ye a ti: ‘Hanyekeni eziko li pupyale li vule shito luheyali!’ Opo nduno okwa lombwele aakwiita ye a ti: ‘Mangeni aalumentu mbaka, e tamu yu umbile meziko.’ Omulilo ogwa li gwa pupyala unene, naasho aakwiita ya hedha popepi oya lunguna po mbala. Aalumentu yatatu Aahebeli oya gwile meziko. Sho Nebukadnezzar a tala mo, okwa mono mo aalumentu yane taye endaenda, nonando omu umbilwa owala yatatu. Okwa haluka noonkondo nokwa pula aambala ye a ti: ‘Inatu umbila nani aalumentu yatatu meziko? Ondi wete mo aalumentu yane, ihe gumwe gwomuyo ota monika a fa omuyengeli.’
Nebukadnezzar okwa hedha popepi neziko lyomulilo, nokwi igidha a ti: “Aamati yaKalunga gwokombandambanda! Zii mo.” Aantu ayehe oya li ya kumwa, sho ya mono Shadrak, Meshak naAbednego taya zi meziko inaaya pya. Omalutu gawo kaga li ga pya, omafufu gawo kaga li ga yayuka, oonguwo dhawo kadha li dha pya nokaya li nokuli taya nika omulilo.
Nebukadnezzar okwa ti: ‘Kalunga kaShadrak, Meshak naAbednego omunene. Okwe ya tumine omuyengeli e ya hupithe. Kapu na kalunga a fa Kalunga kawo!’
Mbela nangoye owa tokola ngaa toko okukala omudhiginini kuJehova ngaashi aalumentu yatatu Aahebeli, kutya nduno owu li monkalo ya tya ngiini?
“[Jehova] Kalunga koye oye awike u na oku mu galikana noye awike u na oku mu longela.” — Mateus 4:10
