Omuisraeli gwedhina Elkana okwa li e na aakulukadhi yaali, Hanna naPeninna. Ihe okwa li e hole Hanna unene. Peninna okwa li e na aanona oyendji nokwa kala ha sheke Hanna, molwaashoka ka li e na aanona. Omumvo kehe, Elkana okwa kala ha yi naanegumbo lye ya ka galikane ketsalihangano kuShilo. Oshikando shimwe sho ya li hono, okwa dhimbulula kutya omuholike gwe Hanna okwa yemata noonkondo. Okwa ti kuye: ‘Hanna, ino lila we. Ngame opo ndi li, ondi ku hole.’

Konima yethimbo Hanna okwa zi po puyo a ka galikane. Okwa lili noonkondo ta galikana Jehova e mu kwathele a mone okanona. Oku uvanekele Jehova a ti: ‘Jehova ngele owa pe ndje okanona okamati, otandi ke ku pe, ke ku longele okukalamwenyo kwako akuhe.’

Omuyambimukuluntu Eli, okwa mono Hanna ti inyengitha omilungu nokwa li e shi okwa kolwa. Hanna okwe mu yamukula a ti: ‘Aawe, inandi kolwa tatekulu. Ondi na uudhigu wa kwata miiti notandi wu lombwele Jehova megalikano.’ Eli sho a mono kutya shoka a popi kuHanna osha puka, okwa ti kuye: ‘Kalunga ne ku pe shoka wa hala.’ Hanna okwa pepelelwa e te ki ikalela. Inapu pita nomvula, Hanna okwa mono okamati e te ka luku Samuel. Hanna ka li tuu a nyanyukwa!

 Hanna ina dhimbwa shoka u uvanekele Jehova. Mbalambala sho a toyitha Samuel, okwe mu fala ketsalihangano a ka longele Jehova. Okwa lombwele Eli a ti: ‘Okamati haka oko nda li ndi indile Jehova megalikano. Otaka ka longela Jehova okukalamwenyo kwako akuhe.’ Elkana naHanna oya kala haya ka talela po Samuel omumvo kehe, noya kala haye mu faalele onguwo yokombanda. Jehova okwa pe ishewe Hanna aamati yatatu naakadhona yaali.