PaJohannes 8:12-59
8 12 Opo nduno Jesus okwe ya lombwele ishewe ta ti: “Ongame uuyelele wuuyuni. Kehe ngoka ta landula ndje ita ka enda nando momilema, ihe ota ka mona uuyelele, mboka tawu gandja omwenyo.”
13 Onkee ano Aafarisayi oya ti kuye: “Oho gandja uumbangi kombinga yoye mwene; uumbangi woye kawu shi woshili.”
14 Jesus okwe ya yamukula ta ti: “Nonando ohandi gandja uumbangi kombinga yandje mwene, uumbangi wandje owoshili, molwaashoka ondi shi mpoka nda za naampoka tandi yi. Ihe ne kamu shi kutya onda za peni naampoka tandi yi.
15 Ne ohamu pangula pataloko lyopantu.* Ihe ngame ihandi pangula nando omuntu;
16 nongele tandi pangula, ohandi pangula paushili, molwaashoka kandi li ongame awike, ihe Tate, ngoka a tuma ndje, oku li pamwe nangame.
17 Shimwe ishewe, mOmpango yeni omwa nyolwa taku ti: ‘Uumbangi wa gandjwa kaantu yaali owoshili.’
18 Ngame ohandi gandja uumbangi kombinga yandje mwene, naTate, ngoka a tuma ndje, oha gandja uumbangi kombinga yandje.”
19 Opo nduno oya ti: “Ho oku li peni?” Jesus okwe ya yamukula ta ti: “Kamu shi ndje, naTate kamu mu shi. Andola omwa li mu shi ndje, ando naTate omu mu shi wo.”
20 Oohapu ndhoka okwe dhi popi, manga a li ta longo aantu motempeli e li mehala moka hamu kala iiketha yomayambidhidho. Ihe kapwa li nando ogumwe e mu kwata po, oshoka ethimbo lye kalya li lya thika natango.
21 Onkee ano okwa ti kuyo ishewe: “Otandi yi, notamu ka konga ndje. Ihe otamu sile muulunde weni. Hoka tandi yi, itamu vulu okuya ko.”
22 Opo ihe Aajuda oya tameke taya ti: “Ite ki idhipaga ndishi? Molwaashoka ota ti: ‘Hoka tandi yi, itamu vulu okuya ko.’”
23 Opo nduno Jesus okwa ti ishewe kuyo: “Ne oyokevi; ngame onda za pombanda. Ne oyomuuyuni mbuka; ngame kandi shi gwomuuyuni mbuka;
24 nomolwaashono nde mu lombwele kutya: Otamu sile muulunde weni. Oshoka ngele inamu itaala kutya ongame ngoka a li e na okuya, otamu sile muulunde weni.”
25 Onkee ano oya tameke oku mu pula taya ti: “Ongoye lye?” Jesus okwe ya yamukula ta ti: “Otashi kwatha shike sho tandi popi nane, ihe kamu uvite ko?
26 Ondi na iinima oyindji okupopya kombinga yeni nokupangula. Ngoka a tuma ndje oha popi oshili, naashihe shoka nda uva kuye, otandi shi lombwele uuyuni.”
27 Inaye shi ndhindhilika kutya okwa li te ya lombwele kombinga yaHe.
28 Opo nduno Jesus okwa ti: “Uuna mwa endjeleleke Omuna gwomuntu pombanda, otamu ka tseya kutya ongame ngoka a li e na okuya, nosho wo kutya ihandi longo sha pahalo lyandje. Ihe ohandi popi owala iinima mbyoka Tate a longa ndje.
29 Ngoka a tuma ndje oku li pamwe nangame. Ina ekelahi ndje, molwaashoka ohandi longo aluhe shoka tashi mu nyanyudha.”
30 Sho a popi iinima mbyoka, oyendji oye mu itaale.
31 Opo ihe Jesus okwa lombwele Aajuda mboka ye mu itaala ta ti: “Ngele omwa dhiginine oohapu dhandje, one aalongwa yandje yashili,
32 notamu ka tseya oshili, noshili otayi ke mu mangulula.”
33 Yamwe oya ti kuye: “Tse oluvalo lwaAbraham, nokatu na siku twa li aapika yomuntu. Omolwashike nduno to ti: ‘Otamu ka mangululwa’?”
34 Jesus okwe ya yamukula ta ti: “Oshili tandi mu lombwele, kehe ngoka ta longo uulunde omupika guulunde.
35 Shimwe ishewe, omupika iha kala megumbo lyamwene gwe sigo aluhe; ihe omwanamati gwamwene gwe ota kala mo sigo aluhe.
36 Onkee ano ngele Omwana okwe mu mangulula, otamu ka kala mwa manguluka shili.
37 Ondi shi kutya ne oluvalo lwaAbraham, ihe omwa hala okudhipaga ndje, molwaashoka inamu taamba ko oohapu dhandje.
38 Ohandi popi iinima, mbyoka nda mona, manga nda li puTate, ihe ne ohamu ningi iinima, mbyoka mwa uva kuho.”
39 Oye mu yamukula ya ti: “Tse tate, oAbraham.” Jesus okwa ti kuyo: “Andola ne omwa li oyana yaAbraham, ando ohamu longo iilonga mbyoka a longele.
40 Ihe ngashingeyi omwa hala okudhipaga ndje, ngame ngoka nde mu lombwela oshili ndjoka nda uva okuza kuKalunga. Abraham andola ita ningi oshinima sha tya ngaaka.
41 Ne otamu longo iilonga yaho yeni.” Oya ti kuye: “Tse inatu valwa okupitila momilalo dha nyata.* Tse otu na Tate gumwe awike, Kalunga.”
42 Jesus okwa ti kuyo: “Andola Kalunga okwa li Ho yeni, ando omu hole ndje, oshoka onda za kuKalunga, nondi li mpaka omolwe. Inandi ya pahalo lyandje mwene, ihe oye a tuma ndje.
43 Omolwashike inaamu hala okuuva ko shoka tandi popi? Omolwaashoka ne itamu vulu okupulakena koohapu dhandje.
44 Ne omu na ho yeni Ondiyapoli, nomwa hala okulonga ehalo lyaho. Ye omudhipagi okuza petameko,* noina dhiginina oshili, molwaashoka muye kamu na oshili. Uuna ta popi iifundja, ota popi shoka shi li muye, molwaashoka ye omufundja nahe yiifundja.
45 Ihe molwaashoka ngame ohandi mu lombwele oshili, inamu hala okwiitaala ndje.
46 Olye gwomune ta vulu okutya ngame omulunde? Ngele ohandi popi oshili, omolwashike inaamu hala okwiitaala ndje?
47 Mboka yaKalunga ohaya pulakene kOohapu dhaKalunga. Ihe ne ihamu pulakene, molwaashoka kamu shi yaKalunga.”
48 Aajuda oye mu yamukula ya ti: “Katu li mondjila sho tatu ti, ‘Ngoye Omusamaria, nowu niwe kondemoni’?”
49 Jesus okwe ya yamukula a ti: “Kandi na ondemoni, nohandi simaneke Tate, ihe ne omwa dhina ndje.
50 Ngame itandi ikongele esimano, ihe opu na ngoka a hala oku li pa ndje, noye ta tokola kutya olye a gwana oku li pewa.
51 Oshili tandi mu lombwele, kehe ngoka ta vulika koohapu dhandje ita ka sa nando.”
52 Aajuda oya ti kuye: “Ngashingeyi otu shi lela kutya owu na ondemoni. Abraham okwa sa nosho wo aahunganeki, ihe ngoye oto ti, ‘Kehe ngoka ta vulika koohapu dhandje ita ka sa nando.’
53 Mbela ngoye owu vule tate Abraham ngoka a sa nale? Aahunganeki nayo oya sa nale. Mbela oto dhiladhila kutya ongoye lye?”
54 Jesus okwa yamukula a ti: “Ngele ohandi isimaneke ngame mwene, nena esimano lyandje itali ti sha. Tate oye ta simanekitha ndje, ngoka hamu ti oKalunga keni.
55 Ne kamu mu shi, ihe ngame ondi mu shi. Nongele onda ti kandi mu shi, otandi ningi omufundja nde mu fa. Ihe ngame ondi mu shi, nohandi vulika koohapu dhe.
56 Ho Abraham okwa li a tegelela nondjuulukwe okumona esiku ndyoka tandi ya. Esiku ndyoka okwe li mona, nokwa li a nyanyukwa.”
57 Opo nduno Aajuda oya ti kuye: “Ngoye ku na natango omimvo 50, ihe oto ti owa mona Abraham?”
58 Jesus okwa ti kuyo: “Oshili tandi mu lombwele, manga Abraham inaa valwa, ngame oko nda kala nale.”
59 Onkee ano oya kutha omamanya, ye mu dhenge, ihe Jesus okwa holama nokwa zi mo motempeli.
Omanyolo gopevi
^ Nenge “panyama.”
^ MOshigreka, porneia. Tala Omafatululo giitya.
^ Nenge “nkene a za.”
