paMarkus 1:1-45
-
Johannes Omuninginithi ta uvitha (1-8)
-
Jesus ta ninginithwa (9-11)
-
Jesus ta makelwa kuSatana (12, 13)
-
Jesus ta tameke okuuvitha muGalilea (14, 15)
-
Aalongwa mboka ya ithanwa tango (16-20)
-
Oombepo dha nyata tadhi tidhwa mo (21-28)
-
Jesus ta aludha aantu oyendji muKapernaum (29-34)
-
Jesus ta galikana kehala li ikalela (35-39)
-
Omunashilundu a ludhwa (40-45)
1 Onkundana ombwanawa tayi popi kombinga yaJesus Kristus, Omuna gwaKalunga, oyo ndjika:
2 Omuhunganeki Jesaja okwa nyola a ti: “Tala, otandi tumu omutumwa gwandje e ku tetekele,* ngoka te ke ku longekidhila ondjila.*
3 Ewi otali igidha mombuga tali ti: ‘Longekidheni ondjila yaJehova! Lalakanitheni omapola ge.’”
4 Johannes Omuninginithi okwa li mombuga, ta uvithile aantu kutya oye na okuninginithwa ya ulike kutya oya itedhulula, opo ya dhiminwe po oondjo dhawo.
5 Aantu ayehe yomoshitopolwa shaJudea nosho wo yomuJerusalem ashihe oya yi kuye, nokwe ya ninginitha* momulonga gwaJordan konima sho ya hempulula oondjo dhawo.
6 Johannes okwa li ha zala onguwo yomafufu gongamelo nepaya lyoshipa mombunda, nokwa li ha li oombahu nomagadhi goonyushi.
7 Okwa li ha uvitha ta ti: “Ngoka te ya konima yandje oku na oonkondo e vule ndje, noinandi gwana nokuli okunyongama ndi dhitulule omiya dhoongaku dhe.
8 Ngame onde mu ninginitha nomeya, ihe ye ote ke mu ninginitha nombepo ondjapuki.”
9 Pomasiku ngeyaka, Jesus okwa zi kuNasaret shomuGalilea nokwa ninginithwa kuJohannes momulonga gwaJordan.
10 Mbala, sho a zi ko kohi yomeya, okwa mono egulu tali eguluka, nokwa mono ombepo yaKalunga ya fa onguti tayi kulukile kuye.
11 Opo nduno megulu omwa zi ewi tali ti: “Ngoye Omumwandje, omuholike; onde ku hokwa.”
12 Opo ihe nziya ombepo ondjapuki oye mu fala mombuga.
13 Onkee ano okwa tsikile okukala mombuga uule womasiku 40, ta makelwa kuSatana. Okwa li mokati kiilikama, ihe aayengeli oya li taye mu yakula.
14 Konima sho Johannes a mangwa po, Jesus okwa yi muGalilea ta uvitha onkundana ombwanawa yaKalunga,
15 ta ti: “Euthwathimbo olya thika, nUukwaniilwa waKalunga owa hedha popepi. Itedhululeni, ne mu kale mu na eitaalo monkundana ombwanawa.”
16 Manga a li ta ende komunkulofuta gwaGalilea, okwa mono Simon nosho wo Andreas, omumwayina gwaSimon, taya umbile oonete dhawo mefuta, oshoka oya li aayuli yoohi.
17 Onkee ano Jesus okwa ti kuyo: “Landulii ndje, ngame notandi mu ningi aayuli yaantu.”
18 Opo ihe nziya oya thigi po oonete dhawo e taye mu landula.
19 Konima sho a yi kokule kashona, okwa mono Jakob, omwana gwaSebedeus, nomumwayina Johannes, ye li mowato yawo taya andeke oonete dhawo,
20 nokwe ya ithana nziya. Onkee ano oya thigi he Sebedeus mowato pamwe naaniilonga e taye mu landula;
21 noya yi kuKapernaum.
Nziya, sho esiku lyEsabati lya thiki, okwa yi mosinagoga nokwa tameke okulonga aantu.
22 Aantu oya li ya kuminwa omukalo gwe gwokulonga, oshoka okwa li te ya longo ongomuntu e na oonkondopangelo, ihe hangaashi aalongimpango yawo.
23 Mosinagoga moka omwa li mu na omulumentu e na ombepo ya nyata,* ndjoka ya igidha ya ti:
24 “Jesus Omunasareti, owe tu halela shike? Owe ya wu tu hanagule po? Ondi shi shi lela kutya ongoye lye; ongoye Omuyapuki gwaKalunga.”
25 Ihe Jesus okwe yi ganda ta ti: “Mwena, e to zi mo muye!”
26 Konima sho ombepo ya nyata* ya hata pevi omulumentu ngoka, okwa tameke okukakama, noya igidha mokule e tayi zi mo muye.
27 Aantu ayehe oya li ya kumwa noonkondo noya tameke okulombwelathana taya ti: “Yakwetu, oshike shino? Elongo epe! Oku na oonkondo dhokutidha mo oombepo dha nyata,* nohadhi vulika kuye.”
28 Onkee ano onkundana kombinga ye oya taandele moshitopolwa ashihe shaGalilea.
29 Opo nduno oya zi mo mosinagoga, noya yi kaandjawo yaSimon naAndreas pamwe naJakob nosho wo naJohannes.
30 Sho ya thiki, oya adha yinamweno yaSimon a lala e na oshivu, noye shi lombwele Jesus nziya.
31 Opo nduno okwe ya puye, e te mu kwata moshikaha nokwa yambuka po. Opo ihe okwa aluka nokwa tameke oku ya yakula.
32 Konima yethimbo, sho etango lya ningine, aantu oya eta kuye ayehe mboka ya li taya ehama nosho wo mboka ye na oondemoni;
33 noshilando ashihe osha li sha gongala posheelo shegumbo.
34 Onkee ano okwa aludha oyendji mboka ya li ye na omauvu gi ili nogi ili, nokwa tidha mo oondemoni odhindji, noina etha dhi popye, oshoka odha li dhi shi kutya oye Kristus.*
35 Ongula onene manga inaaku sha, okwa penduka e ta yi pondje, nokwa yi kehala li ikalela, naasho e li hoka, okwa tameke okugalikana.
36 Ihe Simon naamboka ya li pamwe naye oya kala taye mu kongo,
37 naasho ye mu mono oya ti kuye: “Kehe gumwe ote ku kongo.”
38 Ihe okwe ya lombwele a ti: “Natu yeni kulwe kwi ili, koondoolopa dhopopepi, opo ndi ka uvithile hoka wo, oshoka shoka osho nda endela.”
39 Onkee ano okwa yi a ka uvithile moosinagoga dhawo moshitopolwa ashihe shaGalilea, nokwa tidha mo oondemoni maantu.
40 Kuye okwe ya wo omunashilundu te mu hehela, a tsa nokuli oongolo, ta ti: “Ngele owa hala, oto vulu okwaaludha ndje.”*
41 Molwaashoka okwa li e mu uvitile ohenda, okwa yelutha oshikaha she e te mu gumu, nokwa ti kuye: “Onda hala! Aluka.”*
42 Mbalambala, uuvu woshilundu owe mu zi e ta aluka.*
43 Opo nduno okwe mu londodha nokwe mu laleke a ye
44 e te mu lombwele ta ti: “Ino shi lombwela nando omuntu, ihe inda wu ka iyulike komuyambi e to gandja omayambo goye gealuko ngaashi sha popiwa kuMoses, shi kale uumbangi kutya owa aluka.”
45 Ihe konima sho omulumentu ngoka a yi, okwa tameke oku shi taandelitha kehe pamwe, nokuza mpono, Jesus ka li we ta vulu okuya moshilando e ta kala inaa dhimbululwa kaantu. Onkee ano okwa kala kondje yoshilando komahala ga ikalela. Ihe natango aantu oya kala taye ya kuye okuza koombinga noombinga.
Omanyolo gopevi
^ Eln., “komeho goye.”
^ Oohapu dha tetekela odha kuthwa muMalakia 3:1.
^ Nenge “tula kohi yomeya.”
^ Nenge “ondemoni.”
^ Nenge “ondemoni.”
^ Nenge “oondemoni.”
^ Nenge tashi vulika, “odha li dhi shi kutya oye lye.”
^ Eln., “okuyeleka ndje.”
^ Eln., “yela.”
^ Eln., “yela.”
