Aawe, evi kali na esiku li ka hanagulwe po, li ka fikwe po nenge li ka pingenwe po. Ombiimbeli otayi longo kutya Kalunga okwa shita evi li kalwe kaantu sigo aluhe.

• “Aayuuki otaa ka thigulula evi e taa kala mo sigo aluhe.” — Episalomi 37:29.

• “[Kalunga] evi owe li tula komakankameno ga kola, itali tenguka.” — Episalomi 104:5.

• “Evi otali kala sigo aluhe.” — Omuuvithi 1:4.

• “Oye a tholoma evi e te li umbu, okwe li pameke noku li kalitha ko. Ine li shita li mbugale, ihe ehala lyokukala aantu.” — Jesaja 45:18.

Kalunga ita ka pitika aantu ya yonagule evi thiluthilu niita, noku li nyateka nenge momikalo dhilwe. Pehala lyaashono, ota ka ‘hanagula po mboka taa yonagula po evi.’ (Ehololo 11:18) Ote ke shi ninga ngiini?

Kalunga ota ka pingena po omapangelo gopantu, ngoka inaaga vula okugamena evi, hnUukwaniilwa we. (Daniel 2:44; Mateus 6:9, 10) Uukwaniilwa mboka otawu ka pangelwa kOmwana gwaKalunga, Jesus Kristus. (Jesaja 9:6, 7) Sho Jesus a li kombanda yevi, okwa li a vulu okupangela iinima yopaunshitwe. (Markus 4:35-41) E li Omukwaniilwa gwUukwaniilwa waKalunga, Jesus ota ka vula okupangela evi alihe nosho wo oonkalo dhombepo ndhoka hadhi kala ko. Ota ka opalekulula evi, e tali kala monkalo ngaashi ndjoka lya li moshikunino shaEden. — Mateus 19:28; Lukas 23:43.

Aawe, hasho tayi longo ngaaka. Euvoko ndyoka lya puka, olundji ohali etithwa kokwaauva ko nawa enyolo lyaPetrus omutiyali 3:7, ndjoka tayi ti: “Omagulu nevi sho yi li ko sigo onena, oya gamenenwa po kohapu tuu ndjoka yaKalunga, yi ka hanagulwe po nomulilo.” Tala kiitsa iyali ya simana mbyoka tayi tu kwathele tu uve ko nawa enyolo ndyoka:

1. Ombiimbeli oya longitha uutumbulilo “omagulu,” “evi” (uuyuni) nosho wo “omulilo” ya ukitha koshinima shi vulithe pushimwe. Pashiholelwa, muGenesis 11:1, otayi ti: “Petameko aantu yomuuyuni auhe oya li haa popi elaka limwe alike.” Movelise ndjika, uutumbulilo ‘uuyuni’ otawu ulike kaantu.

2. Shoka sha popiwa muPetrus omutiyali 3:7 otashi ulike kutya omagulu, evi nosho wo omulilo mbyoka ya popiwa mo, otayi ti shike. MOvelise 5 no 6 otadhi popi shi na ko nasha nEyelu lyopethimbo lyaNoa. Pethimbo ndyoka, uuyuni wonale owa li wa hanagulwa po, ihe evi lyo lyene halyo lya li lya hanagulwa po. Pehala lyaashono, Eyelu olya li lya hanagula po evi, ano “aantu” mboka aakolokoshi. (Genesis 6:11) Olya li wo lya hanagula po “omagulu,” ano aantu mboka ya li taya pangele. Onkee ano, aakolokoshi oyo ya li ya hanagulwa po, ihe kashi shi evi. Noa nuukwanegumbo we oya li ya hupu, sho uuyuni wa li wa hanagulwa po, e taya tsikile okukala nomwenyo kombanda yevi konima yEyelu. — Genesis 8:15-18.

Ngaashi owala omeya gEyelu ga ningile, ‘omulilo’ ngoka gwa popiwa muPetrus omutiyali 3:7, otagu ka hanagula po aakolokoshi, ihe kashi shi evi. Kalunga okwa uvaneka kutya otaku ka kala “egulu epe nevi epe, moka tamu ka kala uuyuuki.” (2 Petrus 3:13) ‘Evi epe’ nenge aantu, otaya ka pangelwa ‘kegulu epe’ nenge kewiliko epe, ano Uukwaniilwa waKalunga. Kohi yepangelo lyUukwaniilwa mboka, evi otali ka ninga oparadisa moka tamu ka kala ombili. — Ehololo 21:1-4.