Mbela Maria oye yina yaKalunga?

DHANA

Shoka Ombiimbeli tayi ti

Aawe, Ombiimbeli itayi ti kutya Maria oye yina yaKalunga noitayi ti wo kutya Aakriste naya kale haye mu galikana nenge haye mu simaneke. * Tala kwaashika:

Maria ina popya nando kutya oye yina yaKalunga. Ombiimbeli otayi yelitha kutya okwa vala “Omuna gwaKalunga,” ihe haKalunga ye mwene. — Markus 1:1; Lukas 1:32.
Jesus Kristus ina tya nando kutya Maria oyina yaKalunga nenge kutya okwa gwana okugalikanwa. Nokuli okwa li a pukulula omukiintu gumwe ngoka a li a pe Maria esimano li ikalekelwa, molwaashono e li yina, a ti: “[‘Aawe,’ NW] aanelago oomboka taa uvu oohapu dhaKalunga e taye dhi dhiginine.” — Lukas 11:27, 28.
Uutumbulilo “Yina yaKalunga” nosho wo “Theotokos” (Omuhumbati gwaKalunga) kawu mo mOmbiimbeli.
Uutumbulilo “Omukwaniilwakiintu gwegulu” mboka wu li mOmbiimbeli inawu ukithwa kuMaria, ihe okoshikalunga sha li hashi galikanwa kAaisraeli mboka aashunimonima. (Jeremia 44:15-19) “Omukwaniilwakiintu gwegulu” otashi vulika a li oshikalungakiintu shomuBabilon, shedhina Ishtar (Astarte).
Aakriste yopetameko kaya li haya galikana Maria, nenge ye mu pe esimano li ikalekelwa. Omunandjokonona gumwe okwa ti kutya Aakriste yopetameko “oya li ye na okukala ya tindi okugalikana oshinima shontumba notashi vulika ya li ya tila kutya okugandja eitulomo inaali pumbiwa kuMaria, otashi ningitha aantu ya tye otaya longele oshikalungakiintu.” — Embo In Quest of the Jewish Mary.
Ombiimbeli otayi ti kutya Kalunga oko a kala nale. (Episalomi 90:1, 2; Jesaja 40:28) Molwaashoka ke na etameko, itashi vulika a kale e na yina. Shimwe ishewe, Maria ka li ta vulu okuhumbata Kalunga moshivalelo. Ombiimbeli otayi shi popi sha yela kutya nokuli nomagulu inage mu gwanena. — 1 Aakwaniilwa 8:27.

Maria oyina yaJesus, ihe ke shi “Yina yaKalunga”

Maria okwa li Omujuda nokwa za mezimo lyomukwaniilwa David. (Lukas 3:23-31) Okwa li a hokiwa lela kuKalunga omolweitaalo lye naasho he mu longele. (Lukas 1:28) Kalunga okwe mu hogolola a ninge yina yaJesus. (Lukas 1:31, 35) Maria nomusamane gwe, Josef, oya li wo ye na aanona yalwe. — Markus 6:3.

Nonando Ombiimbeli otayi ulike kutya Maria okwa li a ningi omulongwa gwaJesus, inayi gandja uuyelele owundji kombinga ye. — Iilonga 1:14.

Omolwashike yamwe ya tala ko Maria e li yina yaKalunga?

Opu na uuyelele tawu ulike kutya aantu oya tameke okugalikana Maria okuza lwopehulilo lyethelemimvo etine E.N. Pethimbo ndyoka, ongeleka yaKatoolika oyo ya li ya taambiwa ko muRoma. Shoka osha ningitha aantu oyendji mboka ya li aapagani ya ninge Aakriste kedhina. Ongeleka ndjoka oya li wo ya taamba ko elongo kaali mo mOmbiimbeli, lyUukwatatu.

Elongo ndyoka lyUukwatatu olya ningitha oyendji mongeleka ndjoka ya thike pehulithodhiladhilo kutya ngele Jesus oye Kalunga, nena Maria oku na okukala oye yina yaKalunga. Momumvo 431 E.N., omutumba gwongeleka yimwe muEfeso, ogwa ningi etseyitho lyopambelewa kutya Maria “Oyina yaKalunga.” Konima yomutumba ngoka gwa ningwa muEfeso, aantu oya li ya pimbile mokugalikana Maria. Sho mboka ya li aapagani ya yi mongeleka ndjoka, oya tameke haya longitha omathano niihongwathano yomukadhona Maria, pehala lyiikalungakiintu yawo, ngaashi Artemis (sha li hashi ithanwa Diana kAaroma) nosho wo Isis.

Mo 432 E.N., Omupapa Sixtus III okwa li a gandja elombwelo ongeleka yimwe yi tungwe muRoma yi simanekithe “Yina yaKalunga.” Oya tungwa popepi nehala mpoka pwa li nale pwa tungwa otempeli tayi simanekitha Lucina, oshikalungakiintu shokuvalitha shaRoma. Omunyoli gumwe okwa popi kombinga yongeleka ndjoka kutya oyi li “endhindhiliko lelalela kutya oshimpaga shoka sha li hashi galikana Maria, shoka sha holoka po konima sho Aaroma ya ningi Aakriste, osha taamba ko Omuvalakadhi Omunene ngoka a li ha galikanwa kiimpaga yaapagani.” — Embo Mary—The Complete Resource.

^ okat. 3 Omalongelokalunga ogendji ohaga longo kutya Maria oye yina yaKalunga. Otashi vulika hage mu ithana “Omukwaniilwakiintu gwegulu” nenge Theotokos, oshitya shOshigreka shoka tashi ti “omuhumbati gwaKalunga” nenge yina yaKalunga.