Oonkatu ndhoka omuntu a pumbwa okukatuka, opo a ninge Onzapo yaJehova, odha popiwa kuJesus notadhi adhika muMateus 28:19, 20. Enyolo ndyoka olya popya shoka omuntu a pumbwa okuninga, opo a ninge omulongwa gwaKristus, shoka sha kwatela mo okupopya nenge okugandja uunzapo kombinga yaJehova.

 Onkatu 1: Ilonga shoka Ombiimbeli tayi longo. Jesus okwa lombwela aalongwa ye ya ‘ninge aantu aalongwa noku ya longa.’ (Mateus 28:19, 20) Oshitya shoka sha tolokwa “omulongwa” otashi ti “omuntu ngoka ha longwa.” Ombiimbeli oyi na omayele taga longo, ngaashi omalongo gaJesus Kristus, ngoka taga vulu oku ku kwathela wu kale wa nyanyukwa monkalamwenyo nowa gwanenwa. (2 Timoteus 3:16, 17) Otatu ka kala twa nyanyukwa oku ku kwathela wu ilonge shoka Ombiimbeli tayi longo, mokukonakona Ombiimbeli nangoye, oshinima shoka hashi ningwa oshali. — Mateus 10:7, 8; 1 Aatessalonika 2:13.

 Onkatu 2: Tula miilonga shoka to ilongo. Jesus okwa ti kutya mboka yi ilonga oye na wo “okudhiginina ayihe mbyoka [e yi tu] lombwele.” (Mateus 28:20) Shika otashi ti kutya okukonakona Ombiimbeli kwoye kaku shi oshinima showala, ihe otaku ke ku kwathela wu lundulule okudhiladhila kwoye neihumbato lyoye. (Iilonga 10:42; Aaefeso 4:22-29; Aahebeli 10:24, 25) Mboka haya dhiginine omalombwelo gaJesus, ohashi ya inyengitha yi iyapulile Jehova Kalunga onkalamwenyo yawo, noshi li etokolo lyomuntu mwene. — Mateus 16:24.

 Onkatu 3: Okuninginithwa. (Mateus 28:19) MOmbiimbeli, eninginitho olya yelekanithwa nokufumvikwa. (Yelekanitha Aaroma 6:2-4.) Eninginitho oli li endhindhiliko kutya owe etha po onkalamwenyo yoye onkulu nowa tameka nonkalamwenyo ompe. Okuninginithwa kwoye hoka haku ningwa montaneho, ohaku ulike kutya owa gwanitha po oonkatu mbali dhopetameko, ndhoka dha popiwa kuJesus nokupula Kalunga e ku pe eiyuvo lya yela. — Aahebeli 9:14; 1 Petrus 3:21.

 Popya naakuluntugongalo. Otaya ka kundathana nangoye, opo ya shilipaleke kutya owu uvite ko shoka sha kwatelwa mo, ngele oto tula ngaa miilonga shoka wi ilonga nowi iyapulila Kalunga okupitila megalikano. — Iilonga 20:28; 1 Petrus 5:1-3.

 Eeno. Ohatu putudha aanona yetu “mevuliko nomekumagidho lyOmuwa,” ngaashi Ombiimbeli ye tu lombwela. (Aaefeso 6:4) Nonando ongawo, sho taye ende taya koko, oye na okuninga omatokolo yo yene kombinga yokwiilonga, okutaamba ko nosho wo okutula miilonga shoka Ombiimbeli tayi longo, manga inaaya gwana okuninginithwa. (Aaroma 12:2) Hugunina, kehe gumwe oku na okuninga etokolo lye mwene, ngele okwa hala okulongela Kalunga nenge hasho. — Aaroma 14:12; Aagalati 6:5.