WANGƆ 9
Ye mɛ mɔ li wa nda sewa tɛ mɔ du na dengɔ bɛ nɛ?
1. Na lo nɛ ya uzu ti lwangɔ dengɔ bɛ ka nda sewa ale asu due ka ya buku tɛ Leta nɛ?
Nzɔ̃ pa lo ka tɛ Yehova, Nzapa ti dengɔ bɛ, lo ye ya nda sewa tɛ mɔ du na dengɔ bɛ. (1 Timɔte 1:11) Lo la tonda nda sewa. Sungɔ due ka ya buku tɛ Leta adu nzɔ̃ni ma sanga ma, ni ndo za ya ayangambi amai nzɔ̃ni ka nda sewa mɛ abata la. Ale awa Kristo tɔndɔ andia tɛ Leta ti ndo mɛ ala dazu, mɛ ahunda ya asu due ka ya buku tɛ Leta.—Di Luka 2:1, 4, 5.
Nzapa ndo hũ due ngasia? Lo ye ya due bombi kɔli na wali ndoni kɔi bwaí na bwaí. Yehova ye ya akɔli na awe adu mbili mbili zo na zo na mbage tɛ fɔ̃ lo. (Aebreo 13:4) Bɛ lo ndo sĩ na hongɔ due. (Malaki 2:16) Lo hɛ̃́ awa Kristo lége ti hongɔ due wa ala du na kɔli bere wali mɛ ndɛ̃́, se kɔi ka popo tɛrɛ la ati kɔmbɛ.—Di Matie 19:3-6, 9.
2. Ase liye mɛ kɔli na ya lo alengbi ti fangɔ zo na zo na mbage tɛ fɔ̃ lo nɛ?
Yehova lindó kɔli na wali ya ala ndo zangbi ka nda sewa. (Ebandeli 2:18) Kɔli la du gbia ka nda sewa, lo la wa gbɔ̃ngɔ li ni ti gingɔ aye ti mi ti zangɔ na nda sewa nga na hangɔ nda sewa tɛ lo na tɛnɛ tɛ Nzapa. Ale kɔli ye ya lo bɛ lo kɔi. Ale akɔli na awe la ndo yengbi, ndo tɔndɔngbi. Akɔli na awe lá kwɛ́ adu azi mɛ azanga lengbingɔ, nyi kɛrɛrɛ mɛ hɛ̃ la dengɔ bɛ ka nda sewa la kangɔ lɛ na ndo siɔ ye tɛ fɔ̃ mɔ.—Di Efɛsɛ 4:31, 32; 5:22-25, 33; 1 Petro 3:7.
3. Ĩ lengbi ti kangbingɔ se ta lo a ɔ na seni ka popo tɛrɛ ĩ ma?
Se ta lo a ɔ nzɔ̃ni ka popo tɛrɛ ĩ ma ko, ale ĩ kwɛ́ zu sɛ ĩ li kpengbani ti fangɔ songo zo na zo na mbage tɛ fɔ̃ lo. (1 Kɔrinto 13:4, 5) Ta tɛnɛ tɛ Nzapa awa e ya kangbingɔ la ndo onzi a tɛnɛ mɛ ndo si ka nda sewa lá kwɛ́ ma.—Di 1 Kɔrinto 7:10-13.
4. Ayangambi, ye mɛ Nzapa ye lo tɛ ĩ nɛ?
Yehova ye ya ĩ du na dengɔ bɛ. Lo ndo hɛ̃́ nzɔ̃ wangɔ mɛ aza ĩ ya ĩ lwa dengɔ bɛ na ngoi mɛ ĩ dɛ apalanga. Lo ye ya ĩ lwa mbana gɛrɛ ti ndara tɛ awa dungɔ ĩ nga na kɔdɛ mɛ ala lwa na ndo alo mɛ ala tengbi na ni ka ya du tɛ la. (Kɔlosɛ 3:20) Yehova ye nga ya ĩ lwa dengɔ bɛ na lingɔ kwa tɛ wa lingɔ ĩ ná nyĩ lo.—Di Mosakoli 11:9–12:1; Matie 19:13-15; 21:15, 16.
5. Awa dungɔ ayangambi, aya ĩ alengbi ti lwangɔ dengɔ bɛ ngasia?
Ale ĩ li kwa kpengbani ti gingɔ tɛ, bɔngɔ ti yungɔ nga na ndo ti langɔ tɛ aya ĩ. (1 Timɔte 5:8) Kanda ala na lwangɔ dengɔ bɛ se ĩ wa la ya ala ye Nzapa, ala manda nga tɛnɛ tɛ lo. (Efɛsɛ 6:4) Se ĩ nvɛ̃ni ĩ ye Nzapa gba ko, sedu tɛ ĩ na tingɔ lɛlo mɛ aya ĩ na landangɔ. Se ĩ wa aya ĩ na Ngbangɔ ko, ni lengbi ti lɛkɛngɔ bingangɔ li tɛ la ka lége mɛ nzɔ̃ni.—Di Kolimbola Mibeko 6:4-7; Masese 22:6.
Ayangambi ndo sepala gba ngoi mɛ ĩ ndo kpengba na bɛ la nga na ngoi mɛ ĩ ndo hɛ̃́ la sia kɔli. A hunda ya ĩ ndo lonzi la, ĩ hɛ̃́ nga ala disipilini. Se ĩ li so ko, ĩ na mungɔ ala ka lége ti siɔni bɛngɔ katɛ. (Masese 22:15) Kanda ale ta disipilini ati ye ti giangɔ na ayangambi bere hɛ̃́ngɔ ala pɛnɔ mɛ a ɔndoni ma.—Di Kɔlosɛ 3:21.
Atɛmwɛ tɛ Yehova ndo si na abuku ndɛ̃́ ndɛ̃́ ndɛ̃́ ti zangɔ awa dúngɔ ayangambi na ayangambi. Kɔdɛ mɛ ka ya abuku ni ndo lo ka ya Ngbangɔ.—Di Nzembo 19:7, 11.
