Surasak Suwanmake/Moment via Getty Images
Ĩ DU NA KPENGBA LƐ!
Gbingɔ aya kpengbani na ya ngoi ti bulu 2023—Tɛnɛ mɛ Ngbangɔ tɛnɛ nɛ?
Na lɛ gigi zu, ndo mɛ ndo gbí gba ndo hɛ̃ azi gba pɛnɔ, wa ni ndo si nga na apɛnɔ mɛndɛ̃. Ni la atɛnɛ tɛnɛ ni so ya rapɔrt mɛ ge gbɛndani:
“Azi bandandó bangɔ lo mɛ aba klima ti lɛ gigi ali ndɛ abulu 175, kanda na nzɛ ti 06/2023 ndo gbíndó kpengbani ɔngɔ abulu mɛndɛ̃ zu” (Agence américaine d’observation océanique et atmosphérique [NOAA], États-Unis, département du Commerce, 13/06/2023).
“Ka Italie, Espagne, France, Allemagne nga na Pologne ndo ndo gbí gba, gbíngɔ mɛ kai alengbi ti tingɔ 48°C kaya zua ti Sicile nga na ti Sardaigne — alengbi ti dungɔ fãni ti uzu ti nɛngɔ ya gbíngɔ ti ngaso ali ka Poto” (Agence spatiale européenne, 13/06/2023).
“Na lo mɛ ya aplanɛti ndo gbí kpengbani ngaso ko, e da bɛ ya ngu ti kpengbani na ningɔ gbanda, wa ni na lingɔ ya ngu mu akɔdɔrɔ gba,” ni du tɛnɛ tɛ Stefan Uhlenbrook (directeur de l’hydrologie, de l’eau et de la cryosphère à l’Organisation météorologique mondiale, 17/07/2023).
Bi kɔi kɔi, e ndo ma tɛnɛ ti aklima mɛ ndo ti bo siɔni ngoi zu. Ni ndo hɛ̃ mɔ mbɛtɔ? Ba tɛnɛ mɛ Ngbangɔ ndo tɛnɛ na ndo alo ti ngaso.
Ngbangɔ piandó tɛnɛ tɛnɛ na ndo lo mɛ aba gbinyangbingɔ ti klima?
Ĩĩ. Ndo mɛ ndo gbí kpengbani ndɛ na lɛ gigi zu nga na alo mɛndɛ̃ mɛ amangbi na ni nga kaya atɛnɛ mɛndó Ngbangɔ tɛnɛ ya ni na lingɔ tɛrɛ lo ndɛ na ngoi tɛ e. Na ndakisa Yezo tɛnɛndó ya e na hũngɔ “aye mɛ ndo sa mbɛtɔ bɛ zo” (Luka 21:11, 21). Na bangɔ se mɛ gbingɔ ndo ti bo kpengbani ge lɛ sese ko, azi gba ti na dangɔ bɛ ya azi na wɛngɔ ge lɛ sese zu.
Mɔ da bɛ mɔ ya bi kɔi gbanda ko, lɛ sese na ngbãngɔ gɛgɛrɛ?
Ipɔ. Nzapa lindó sese ya azi du da bwai na bwai, ta lo na zingɔ lége ya azi gbɛ̃ni ma (Nzembo 115:16; Mosakoli 1:4). Lo ko kapa ya ni na “gbɛ̃ngɔ azi mɛ ndo gbɛ̃ lɛ sese” (Suma 11:18, NWT).
Ngbangɔ tɛnɛ ya Nzapa na ngunu ti batangɔ lɛ sese na ya akpengba lo zu mɛ alengbi ti singɔ na ni, wa lo na lingɔ ni.
Nzapa “ndo zu na kpengba yá; ndo li nga ya mɔpo ti kota ngu du so kpɔ ” (Nzembo 107:29). Nzapa na ngunu ti tambwisangɔ aye zu mɛ lo li. Lo na ngunu ti lɛkɛngɔ apɛnɔ zu mɛ gbɛ̃ngɔ ti klima asi na ni hɛ̃ azi.
“Mɔ ndo bata lɛ sese, Mɔ li ya ni dũ lé gba wa ni sĩ nvɛ̃ni na aye.” (Nzembo 65:9). Nzapa na lingɔ ya lɛ sese ti paradizo.
Ti nɛngɔ ya mɔ hĩnga alo mɛndɛ̃ mɛ aba kapa mɛ Ngbangɔ ko na ndo tɛnɛ mɛ aba lɛkɛngɔ lɛ sese ko, di tɛnɛ mɛ: “Qui sauvera la terre?”
Ba nga atɛnɛ mɛ
AYE MƐNDƐ̃
Na lo mɛ ya klima ndo gbinyangbi bo gbinyangbingɔ, dungɔ lɛ ngɛ̃́ na dungɔ ngasia na bi mɛ na gangɔ nɛ?—Tɛnɛ mɛ Ngbangɔ tɛnɛ nɛ?
Nzapa ndo bata lɛ sese nga azi mɛ ka da?
AYE MƐNDƐ̃
Bɛta nzɔ̃ dangɔ bɛ na lo ti bi mɛ na gangɔ
Nda mɛ akapa mɛ kaya Ngbangɔ aɔngbi na akapa mɛ azi ndo ko nɛ?
