Ta azi dɛ li ye tɛrɛ afɔ̃ la na tɔndɔngɔ ma. Azi mɛ ndo gwe da yɔrɔ ndo tɔmbɔkɔ tɛrɛ amɔnganga na ndenge ti siɔni nvɛ̃ni; azi mɛ ndo gwe ka restorã so tɛngɔ ye ndo tɛnɛ siɔ tɛnɛ hɛ̃ azi mɛ ndo li kwa kai; azi mɛ ndo li vuayajɛ na aviɔ̃ ndo gulu azi mɛ ndo li kwa kaya aviɔ̃; ayangambi ti kalasi ndo hé wa hangɔ ala na mbeti, ndo gulu lo bere ala ndo tɛnɛ siɔ tɛnɛ hɛ̃ lo; azi ti politikɛ ndo li akpale ti siɔni nvɛ̃ni mɛ azanga tɔndɔngɔ, kanda ambanga ni ndo gu libɛ la ya, ani du azi mɛ ndo li kpale na seni.

 Ngbangɔ du buku ti nzɔ̃ni mɛ alengbi ti zangɔ e ya, e hĩnga seliye ti nzɔ̃ni mɛ elengbi ti dungɔ na ni. Ni ndo za nga e ya, e hĩnga nda mɛ ta azi dɛ na seliyi ti nzɔ̃ni ndɛ ma.

 Na ndo lɛ gigi zu, ta azi di dɛ na aseliye ti nzɔ̃ni mabere, tɔndɔngɔ, dungɔ mbilimbili, nga lingɔ nzɔ̃ lo tɛrɛ azi mɛndɛ̃ ma.

•   Na bangɔ rapɔrt tɛ azi ti Gallup poll mɛ alo ti lingɔ ni ka Amerique ko, azi gba atɛnɛ ya, azi mɛ ndo du ka kɔdɔrɔ ti États-Unis ati na seliye ti siɔni nvɛ̃ni ɔngɔ omɛndó ala na ni na ya abulu 22 mɛ aɔ.

•   Na ya rapɔrt mɛndɛ̃, ahũnda azi 32 000 mɛ ndo du kaya akɔdɔrɔ ndɛ̃ ndɛ̃ ndɛ̃ 28 na lo ti kpale mɛ aba seliye tɛ azi, 65 % tɛ azi ni ko pa ya, ta ala dɛndó hũ se mɛ seliye tɛ azi agbɛ̃ na ni ngama omɛ ndɛ e na ni ma.

 Ngbangɔ piandó kambisa akpale mɛ e ndo hũ ndɛ.

•   “Na ngoi ko gbanda sese adoli ti wɛngɔ ko, mbanga ngoi adu gbanda ngoi ti pɛnɔ. Azi adu gbanda awa kinya, awa gwɛ̃ faranga, awa gwalo, awa yakɛ. Ala guru gbanda Nzapa, ala kɛ̃ gbanda nyɔ awa dúngɔ la. Ta ala hĩnga gbanda nzɔ̃ lo mɛ . . . ali tɛrɛ la ma . . . Ala du gbanda awa zaga, azi mɛ ta ndoma vundu tɛ zo ma.”—2 Timɔte 3:1-3.

 Ti nɛngɔ ya, mɔ hĩnga na akpale gba na ndo se mɛ aprɔfesi ti Ngbangɔ ndo ti na seni ko, di bɛli tɛnɛ mɛ “Biblia esakolaki makambo oyo bato bazali kokanisa mpe kosala lelo oyo?”

 Na ya gigi olo mɛ ta azi di dɛ na seliye ti nzɔ̃ni ma ko, amiliɔ̃ tɛ azi ahũ ya, Ngbangɔ du buku ti nzɔ̃ni mɛ alengbi ti lingɔ ya, e du na seliye ti nzɔ̃ni. Zo lengbi ti ‘kpãngɔ bɛ lo na ndo wangɔ ni ndɛ nga bwai na bwai.’ (Nzembo 111:8) E mu se lɛlo kɔi:

•   Wangɔ ti ya Ngbangɔ: “Ye kwɛ zu mɛ ĩ ndoye ya, azi ali tɛrɛ ĩ ko, ĩ li nga bo gi tɛrɛ ye ni ko na tɛrɛ la.”—Matie 7:12.

   Alengbi na nɛ? Ayɔ ya, e ndo li kpale tɛrɛ azi na ndenge ti nzɔ̃ni nga na tɔndɔngɔ ngama se mɛ e ya, ala li na ni tɛrɛ e.

•   Wangɔ ti ya Ngbangɔ: “Ĩ zia pangɔ nvɛnɛ! Ale zo kɔi kɔi atɛnɛ bɛta tɛnɛ hɛ̃ fɔ̃ lo.”—Efɛzɛ 4:25.

   Alengbi na nɛ? Ayɔ ya, e du mbilimbili na ya tɛnɛ nga na ya aye zu mɛ e ndo li.

 Ti nɛngɔ ya, mɔ hĩnga aye gba ndo kpale mɛ ko, di:

•   Linɔngi ti Sinzili mɛ apa ya, “Mabe ná malamu—Nini ekosalisa yo osala bokeseni?”

•   Bɛli tɛnɛ mɛ “Ziangɔ ya, zo li ye me bɛ lo ye—Se mɛ Ngbangɔ lengbi ti zangɔ e.”