Bulu na bulu yengingɔ ti sese ndo li tɛrɛ lo ngoi gba. Yengingɔ ti sese mɛndɛ̃ ndo li tɛrɛ lo na pɛ ndunu ngoi, kanda yengingɔ ti sese mɛndɛ̃ ndo du ti kpengbani nvɛ̃ni, mɛ ngoi mɛndɛ̃ ni ndo gbɛ̃ aye tɛ azi gba, ni ndo li ya azi hũ pɛnɔ, wa ni ndo kpɔ nga azi gba. Na ya ngoi mɛndɛ̃ ni si ngandó na tsunami mɛ agbɛ̃ ando gba wa ni kpɔ nga ndó azi gba nvɛ̃ mɛ ala ndo du ka ando ni ko ti ngaso. Ngbangɔ pandó ya, sese na yengingɔ kpengbani ngaso?

E na tɛnɛngɔ tɛnɛ ni so ya tɛnɛ mɛ

•  Ngbangɔ pandó ya yengingɔ ti sese na lingɔ tɛrɛ lo?

•  Yengingɔ ti sese mɛ ndo li tɛrɛ lo ndɛ ndo kokisa prɔfɛsi ti ya Ngbangɔ?

•  Prɔfɛsi ti ya Ngbangɔ mɛ atɛnɛ tɛnɛ ti yengingɔ ti sese ndo fa nɛ na lo tɛ e nɛ?

•  Dangɔ bɛ ti yungɔ ndo mɛ azi ndo du na ni na ndo prɔfɛsi ti ya Ngbangɔ nga na yengingɔ ti sese nɛ

 Ngbangɔ di yengingɔ ti sese ka popo tɛ aprɔfɛsi mɛndó Yezo tɛnɛ tɛnɛ ni. Elengbi ti tãngɔ tɛnɛ mɛndó Yesu tɛnɛ mɛ aba yengingɔ ti sese kaya ambeti taa ti ya Ngbangɔ:

 “Azi ti mbanga kɔdɔrɔ na afɔ̃ la ti kɔdɔrɔ mɛndɛ̃ atiri gbanda to, ambanga agbia abi gbanda to tɛrɛ afɔ̃ la, gwɛ̃ aya nga gbanda, sese ayingi gbanda na ndo ndɛ̃ ndɛ̃ ndɛ̃.”—Matie 24:7.

 “Azi ti mbanga kɔdɔrɔ na afɔ̃ la ti kɔdɔrɔ mɛndɛ̃ atiri gbanda to, ambanga agbia abi gbanda to tɛrɛ afɔ̃ la, sese ayingi gbanda na ndo ndɛ̃ ndɛ̃ ndɛ̃; gwɛ̃ aya nga gbanda.”—Marko 13:8.

 “Sese ayingi gbanda kpengbani na ndo ndɛ̃ ndɛ̃ ndɛ̃, wa ngã agbɔ̃nɔ gbanda azi, gwɛ̃ aya nga gbanda .”—Luka 21:11.

 Yezo pandó ya, “sese na yingingɔ kpengbani” na ya “ando ndɛ̃ ndɛ̃ ndɛ̃” na ngoi olo: to, gwɛ̃, nga na asiɔ ngã na dungɔ na ando ndɛ̃ ndɛ̃ ndɛ̃. Kpale ni ko zu afa ya e na ngoi mɛ ando ili ni ya “onzingɔ ti akpale ti ngoi olo,” bere “ndangba bi.” (Matie 24:3; 2 Timote 3:1) Na bangɔ abi nzɛ mɛ Ngbangɔ hɛ̃, “ndangba bi” abandandó na 1914 wa ta ni dɛ wɛ ma.

 Ĩĩ. Aprɔfɛsi mɛndó Yezo tɛnɛ tɛnɛ ni mɛ elengbi ti tãngɔ yengingɔ ti sese kaya ni amangbi na akpale mɛ e ndo hũ ndo li tɛrɛ lo ndɛ. Bandangɔ na bulu ti 1914 ko, yengingɔ ti sese lindó tɛrɛ lo fãni gba ɔngɔ 1,950 wa ni kpɔ ngandó azi ɔngɔ miliɔ̃ sɛ. a Eba omɛ ndo li tɛrɛ lo ndɛ na ngoi tɛ e.

 2004—Ocean Indien. Yengingɔ ti sese lindó tɛrɛ lo kpengbani (magnitude 9,1) wa ni si na tsunami mɛ ali tɛrɛ lo kaya akɔdɔrɔ ɔngɔ 10, ni kpɔ ngandó azi ɔngɔ 225 000.

 2008—Chine. Yengingɔ ti sese lindó tɛrɛ lo kpengbani (magnitude 7,9) wa ni gbɛ̃ndó akɔdɔrɔ ná agbata, alengbi ti dungɔ ya azi bere 90,000 akpili, wa azi bere 375 000 aɔ̃ndó akã ka tɛrɛ la, amiliɔ̃ tɛ azi azangandó ada ti langɔ ka da.

 2010—Haïti. Yengingɔ ti sese lindó tɛrɛ lo kpengbani (magnitude 7,0) wa yengingɔ ti asese mɛndɛ̃ ti yakere alindó tɛrɛ lo na gesi wa ni kpɔndó azi ɔngɔ 300 000 kanda azi ɔngɔ miliɔ̃ kɔi ta ala di dɛ na da ti langɔ na ni ma.

 2011—Japon. Yengingɔ ti sese lindó tɛrɛ lo kpengbani (magnitude 9,0) wa ni si na tsunamis mɛndó akpɔ azi bere 18 500 kanda azi gba akpɛlɛndó azia ada tɛ la. Izini mɛ ndo hɛ̃ couran ti Fukushima agbɛ̃ndó, wa ni ndo sindó na fiã ti siɔni mɛ ni lengbi ti lingɔ azi siɔni. Abulu bere 40 000 na gesi, ta azi ndó na likoki ti diringɔ kaya da tɛ la ma, na lo mɛ ya, ala ndo kpɛndó mbɛtɔ ti luangɔ ngã mɛ alo na ndo mbó ni ko ti siɔni.

 Prɔfɛsi ti ya Ngbangɔ mɛ atɛnɛ tɛnɛ ti yengingɔ ti sese ndo kebisa e na lo ti kpale mɛ na lingɔ tɛrɛ lo na bi mɛ na gangɔ. Yezo tɛnɛndó ya: “se mɛ nga gbanda ĩ hũ aye olo asi ko, ale ĩ hĩnga ya, Lo Lɛngɔ Gbia tɛ Nzapa adoli wɛ la.”—Luka 21:31.

 Ngbangɔ tɛnɛ ya, Lo Lɛngɔ Gbia tɛ Nzapa adu guvernɛma ti mbilimbili nvɛ̃ni mɛ ni ka ndozu, wa Yezo Kristo la na dungɔ Gbia ni. Lo Lɛngɔ Gbia ni adu Lo Lɛngɔ Gbia mɛndó Yezo ha na ava lo ya ala ndo li sambela na lo ni.—Matie 6:10.

 Ngoi mɛ Lo Lɛngɔ Gbia tɛ Nzapa na bandangɔ Lɛngɔ Gbia ge lɛ sese ko, Nzapa na lingɔ ya akpale mɛ ndo si na bɛ lo ta adi li tɛrɛ lo ma, ti nɛngɔ ya adi hɛ̃ azi pɛnɔ ma, mabere yengingɔ ti sese. (Yisaya 32:18) Tɛnɛ ti ngbondoni adu ya, Nzapa na onzingɔ akpale mɛ ndo hɛ̃ azi pɛnɔ mɛ yengingɔ ti sese ndo si na ni. (Yisaya 65:17; Suma 21:3, 4) Ti nɛngɔ ya mɔ hinga alo mɛndɛ̃ ko, di tɛnɛ mɛ “Bokonzi ya Nzambe ekosala nini?””