Ala hũndó songo mɛ ayata fa na ala
YOMARA ná anyata lo Marcelo nga na Hiver ndo du kaya yakere kɔdɔrɔ mɛ ili ni la Guatemala. Yomara abandandó mandangɔ Ngbangɔ ndoni kɔi na Tɛmwɛ tɛ Yehova kɔi, wa nyita lo abanda ngandó mandangɔ Ngbangɔ. Kanda, ala tengbindó na kpengba kpale kɔi. Ta ala zu ndo hũndó ndo ma, wa ta ala hĩnga ngandó dingɔ mbeti na Braille ma. Ni la, nyita kondó ndo manda ala na Ngbangɔ ko, lo ndo dindó hɛ̃ ala aye mɛ ala ndo manda ná avɛrse ti Ngbangɔ mɛ agbɔ̃ tɛnɛ ni.
Gwengɔ bombi adu ngandó kpengba kpale ka tɛ la. Ta ala nvɛ̃ni alengbindó ti nɔngɔ nɔ na miniti 40 ti nɛngɔ ya, ala si ka da bombi mɛndó so dã na ala ma. Kanda ayata ti ya bombi alindó ebongiseli ya, ando yɔ ala aga na ni bombi. Wa ngoi mɛ ala zu bandandó lingɔ lisolo ka bombi ti ya pɔsɔ ko, ayata ti ya bombi ando zandó ala ya, ala gbɔ̃ lisolo tɛ ala ka li la.
Na nzɛ̃ ti 05/2019 ko, abandandó lingɔ bombi kaya yakere kɔdɔrɔ tɛ la. Ni la, nyita kɔli kɔi ná ya lo mɛ awa sungɔ lége ti ngoi zu agwendó kaya kɔdɔrɔ niko. Ala mundó ebongiseli ti mandangɔ na ayata niko na dingɔ mbeti na lége ti Braille abɛse ta ala nvɛ̃ni ahĩndó dingɔ bere sungɔ mbeti na Braille ma. Ala gwendó ka ndo mɛ ando bata na ambeti (Bibliotheque) wa ala mundó mbeti mɛ asu ni na Braille ti nɛngɔ ya, ala manda se mɛ ala lengbi ti hangɔ na ala.
Marcelo ndo hɛ̃ gbinya ka bombi
Nzɛ yakere so pɛ ni, ayata niko zu taa abandandó dingɔ mbeti mɛ asu ni na Braille nzɔ̃ni, wa ni zandó ala ya, ala mai nzɔ̃ni na ya nyingɔ. a Ndɛ lo mɛ ko, Yomara, Marcelo, na Hiver ati awa sungɔ lége ti ngoi zu. Wa Marcelo ati wa zangɔ na kwa. Ala ndo du na akwa gba ti lingɔ na lo tɛ Yehova na ya apɔsɔ zu. Ge ge ge tɛ ala aza ayata gba ya, ala ti nga na ge ge ge.
Ayata mɛ zu taa ahɛ̃ sia kɔli hɛ̃ ayata ti ya bombi tɛ la na ndenge mɛ ala za ala na songo zu. Yomara tɛnɛ ya “Atɛmwɛ̃ tɛ Yehova afandó e na songo ti mbilimbili tɛ ayata, bandangɔ na fãni ti uzu mɛndó e tengbi na ala”. Marcelo atɛnɛ nga ya, “E na akwa ti nzɔ̃ni ge ya bombi tɛ e, wa e nga kaya ndasewa tɛ ayata ti lɛ gigi zu, ndasewa kɔi mɛ songo ka da gba”. Yomara ná ayata lo ndo kũ na bɛ la ndozu hũngɔ bi mɛ gbanda lɛ sese na gbinyangbingɔ tingɔ paradizo.—Nz. 37:10, 11; Yis. 35:5.
a Nyi buku kɔi mɛ bɛli tɛnɛ ni tɛnɛ ya, Learn to Read Braille asi na ni na lo ti zangɔ azi mɛ ta ala ndo hũndo ma, bere ta ala ndo hũndo nzɔ̃ni ma, ti nɛngɔ ya, ala manda dingɔ nga na sungɔ mbeti na Braille.
