Ta Ngbangɔ kambisa ngoi mɛndó Nzapa banda lingɔ na aye bere bulu mɛ ni li ma. Ni tɛnɛ bo ya: “Na ebandeli Nzapa lindó ndozu na tise.” (Ebandeli 1:1) Ta Ngbangɔ kambisa ngoi mɛndó “ebandeli” ni banda na ni ma. Kanda na landangɔ se mɛ akambisa na tɛnɛ na mɔlɔngɔ kaya mbɛti ti Ebandeli ndo fa ya, ebandeli niko adu uzu ti angoi mana, bere “abí mana,” mɛndó ali na aye.

•  Abí mana mɛndó ali na aye adu nvɛ̃ni abí ti hola 24?

•  Aye mɛndó li tɛrɛ lo na ya abí mana mɛndó ali na aye nɛ?

•  Tɛnɛ mɛ kaya mbɛti ti Ebandeli amangbi na tɛnɛ mɛ azi ti siãsi ndo tɛnɛ?

•  Nzapa lindó lá, nzɛ na atongolo na ngoi mɛ wa?

•  Na bangɔ tɛnɛ mɛ Ngbangɔ tɛnɛ sese li abulu kɛ̃?

 Ipɔ. Na bangɔ Ngbangɔ tɛnɛ mɛ “bí kɔi” alengbi ti fangɔ angoi ndɛ̃ ndɛ̃ ndɛ̃ mɛ yɔngɔlɔni, na landangɔ se mɛ lo niko ndo li tɛrɛ lo. Na ndakisa, kɔi ti eteni ti tɛnɛ niko pa ya, ngoi zu mɛndó ali na aye adu mabere bí kɔi.​—Ebandeli 2:4.

 Nzapa lɛkɛndó sese mɛ nindó “gɛgɛrɛ mɛ ta ye kɔi ndó ka da ma” ya ati ndo mɛ nzɔ̃ni ti dungɔ da. (Ebandeli 1:2) Na gesi, lo lindó dungɔ lɛ ngɛ̃́ ge lɛ sese. Ngbangɔ kambisa aye 6 mɛndó li tɛrɛ lo na ya abí bere angoi mɛndó ali na aye:

•  Bí ti 1: Nzapa lindó ya vurundo asi ge lɛ sese wa ali ya lá na bí adu da.—Ebandeli 1:3-5.

•  Bí ti 2: Nzapa lindó sese, bere lo lindó ya ngu kangbi na sese, mɛndɛ̃ ama ndozu wa tanga ni angbã ge ndo lɛ sese.—Ebandeli 1:6-8.

•  Bí ti 3: Nzapa lindó ya sese ti kuluni asi. Lo di lindó asã na akɛkɛ.—Ebandeli 1:9-13.

•  Bí ti 4: Nzapa lindó lá, nzɛ na atongolo ka ndozu ti nɛngɔ ya avuru na lɛ sese.—Ebandeli 1:14-19.

•  Bí ti 5: Nzapa lindó asa ti gbɛ ngu nga ahu.—Ebandeli 1:20-23.

•  Bí ti 6: Nzapa lindó asa ti ya ndo, asa ti kɔdɔrɔ na azi.—Ebandeli 1:24-31.

 Nzapa wɔndó tɛrɛ lo na pɛ abí mana mɛndó lo li na aye, bere lo ziandó lingɔ aye.—Ebandeli 2:1, 2.

 Ta Ngbangɔ tɛnɛ tɛnɛ ti aye yakere yakere mɛ azi ti siãsi ndo tɛnɛ na ndo aye mɛndó Nzapa li ma. Kanda, atɛnɛ tɛnɛ ti aye mɛndó Nzapa li na se mɛ alengbi ti zangɔ awa dingɔ mbɛti ti ngoi ti gã ya, ala gbɔ̃ nda se mɛndó kpale niko aɔ na ni na seni nvɛ̃ni. Ta tɛnɛ ti aye mɛ Nzapa li ndo kɛ̃ tɛnɛ mɛ azi ti siãsi ndo tɛnɛ ma. Zo kɔi ti fizikɛ mɛ ndo manda aplanɛti mɛ ili lo la Robert Jastrow asundó ya: “Atɛnɛ ti yakere yakere na ɔngbi, kanda tɛnɛ mɛ astronomi tɛnɛ nga na omɛ Ngbangɔ tɛnɛ ya dungɔ lɛ ngɛ̃́ bandandó bí kɔi ko, ni na mangbi na ndo ngbondo lo kɔi, se mɛndó ali na aye tee asi ka ndo zo ko, abandandó na mbalakaka na ngoi kɔi mɛ lengbi.”

 Lá, nzɛ na atongolo ndó nga kaya aye mɛ Nzapa pia li ka “ndozu” na “ebandeli.” (Ebandeli 1:1) Kanda alengbindó ti dungɔ ya ta ni ndo vurundó na ndo ge lɛ sese ma, na lo mɛ ya mbingo ndó ge lɛ sese kpengbani. (Ebandeli 1:2) Na lo ni la, abɛse du ya vurundo sindó ge tise na bí ti kozoni ko, ta kɔdɛ ti hĩngangɔ ndo mɛ ni lo da, da ma. Ta mbingo di dɛndó ge lɛ sese na bí ti siɔ ma. Ngbangɔ tɛnɛ ya lá, nzɛ na atongolo abandandó “vurungɔ na sese,” ali mabere zo kɔi ndó ge lɛ sese la ndo ba ni.—Ebandeli 1:17.

 Ta Ngbangɔ ko bulu mɛ sese la na ni ma. Ebandeli 1:1 atɛnɛ ya, aye zu mɛ Nzapa li mɛ e ndo hũ na sese, abandandó bandangɔ. Ta tɛnɛ niko ako nyɔ tɛnɛ mɛ azi ti siãsi ndo tɛnɛ na ndo bulu mɛ sese li ma.