Ipɔ, ta asambela zu ndo du lɛ ni kɔi ma. Ngbangɔ tɛnɛ tɛnɛ tɛ asambela gba mɛ ta Nzapa ndo sepala na ni ma. Elengbi ti kangbingɔ ya asambela niko zu na sɛ.

Ti uzu: Sambela mɛ ndo vɔrɔ anzapa ti nvɛ̃nɛ

 Ngbangɔ pa ya, sambela tɛ anzapa ti nvɛ̃nɛ du nga mabere “yá,” “ye mɛ gɛgɛrɛ,” wa “ta ndo hɛ̃ nga nzɔ̃ lo ma.” (Yirimia 10:3-5; 16:19, 20) Yehova a Nzapa tɛnɛ ndó hɛ̃ aya Izraɛlɛ ya: “Ta mɔ lengbi ti vɔrɔngɔ anzapa mɛndɛ̃ ma, vɔrɔ bo mbi kɔi.” (Kobima 20:3, 23; 23:24) Ngoi mɛ aya Izraɛlɛ ndo vɔrɔndó anzapa mɛndɛ̃ ko, “Yehova ndo mandó ngɔnzɔ ndo la.”​—Mitango 25:3; Balevi 20:2; Basambisi 2:13, 14.

 Tee ndɛ lo mɛ, Yehova ndo ma nga ngɔnzɔ ndo sambela tɛ “azi mɛ ndo ili la ya anzapa.” (1 Kɔrinto 8:5, 6; Galatia 4:8) Lo yɔ ka ti azi zu mɛ ye vɔrɔngɔ lo ya ala si kaya sambela ti nvɛ̃nɛ; lo tɛnɛ ya: “Ale ĩ dɔ azi mɛ ta aye lo tɛ mbi ma ĩ zia, ala du na bɛ la, ko ĩ du nga na bɛ ĩ.” (2 Kɔrinto 6:14-17) Se du ya asambela zu ndo du lɛ ni kɔi ko, ale ta Nzapa lengbindó ti kpãngɔ ndia olo ma.

Ti sɛ: Asambela mɛ ndo vɔrɔ Nzapa ti mbilimbili na se mɛ ta bɛ lo ndo ye ma

 Na ya angoi mɛndɛ̃ aya Izraɛlɛ ndo yɔlɔndó amimɛsɛnɔ mɛ, alo kaya sambela tɛ anzapa ti nvɛ̃nɛ na ya sambela tɛ Nzapa ti mbilimbili. Kanda ta Yehova ndo yendó bɛ yakere ya abombi sambela tɛ ni na sambela ti nvɛ̃nɛ ma. (Kobima 32:8; Kolimbola Mibeko 12:2-4) Yezo kɛndó lo hɛ̃ agbia ti sambela ti ngoi tɛ lo na bangɔ se mɛndó ala ndo vɔrɔ na Nzapa, ala ndo fandó ya ani fɔ̃ tɛrɛ ani na Nzapa, kanda ala dundó awa poloso, ta ala ndo “ tɔndɔndó angbondo alo ti ndia ma, angbondo alo ni lo mɛ, lingɔ ye na seni, mangɔ vundu tɛ azi, lingɔ ye na se kapa ni.”​—Matie 23:23.

 Ndɛ nga lo mɛ ko, bo sambela mɛ ndo ha mbilimbili la ndo si na azi ka tɛ Nzapa. Mbilimbili mɛ ala ndo ha ndo lo kaya Ngbangɔ. (Yoanɛ 4:24; 17:17; 2 Timɔte 3:16, 17) Asambela mɛ ta ndo ha mbilimbili ti ya Ngbangɔ ma ko, ndo kpã kangbi popo tɛ azi na Nzapa. Ahangɔ tɛnɛ zu mɛ azi ndo da bɛ la ya alo kaya Ngbangɔ na ndakisa: trinite, lifelo, nga omɛ ndo tɛnɛ ya ta tɔrɔ tɛrɛ zo ndo kpi ma, alo kaya sambela tɛ anzapa ti nvɛ̃nɛ. Asambela mɛ ndo tɛnɛ tɛnɛ ti ngaso mɛ ko, adu “gɛgɛrɛ,” bere ta ni ndo hɛ̃ zo nzɔ̃ kpale ma, na lo mɛ ya ni ndo kpã kutimɛ na ndo ti uzu ti Andia tɛ Nzapa.​—Marko 7:7, 8.

 Bɛ Nzapa ndo sĩ na poloso tɛ asambela. (Tito 1:16) Ti nɛngɔ ya sambela ali ya azi dɔ dã na Nzapa ko, ayɔ ya tɛnɛ mɛ ala ndo ha aza azi na ya dungɔ lɛ ngɛ̃́ tɛ la ti bí kɔi kɔi, ta ayɔ ya ala suka bo na lingɔ amilulu ti wawa wawa ma. Na ndakisa Ngbangɔ tɛnɛ ya: “Se zo amu tɛrɛ lo ya, ni wa vɔrɔngɔ Nzapa, wa se ta lo bata nyɔ lo nzɔ̃ni ma ko, lo handa tɛrɛ lo nvɛ̃ni, ko ló Nzapa tɛ lo adu gɛgɛrɛ. Ĩ ba se vɔrɔngɔ To e Nzapa mɛ lo ndoye ya, adu bɛtani lo mɛ: Zangɔ aya ndũ, na awe mũa na ya pɛnɔ mɛ ala ndohũ, batangɔ tɛrɛ na ya siɔ lo ti lɛ sese zu mɛ ndohanda zo ya, lo li siɔ ye” (Zaki 1:26, 27) Ngbangɔ ti King James Version atɛnɛ tɛnɛ mɛ “sambela ti vuruni”