Elengbi ti luangɔ pandɛ tɛ kɔli kɔi mɛ wa ye ná Lazalo kaya diskur tɛ Yezo. (Luka 16:19-31) Pandɛ niko ndo fa linɔ tɛ azi sɛ: (1) Agbia ti sambela ti yuda mɛndó na yakɛ na ngoi tɛ Yezo (2) Azi ti mbilimbili nga ti zungɔ na tɛrɛ mɛndó aye hangɔ lo tɛ Yezo.

Na ya tɛnɛ mɛ e na luangɔ gbinya ti ahũnda mɛ:

•  Tɛnɛ mɛndó Yezo tɛnɛ na lo tɛ Lazalo ná kɔli kɔi mɛndó wa ye nɛ?

•  Pandɛ niko du bɛta tɛnɛ?

•  Pandɛ niko ndo fa ya lifelo ti wá da?

•  Ye mɛndó Yezo ye hangɔ na ndo pandɛ niko nɛ?

 Kaya Luka shapitrɛ 16, Yezo tɛnɛ tɛnɛ tɛ akɔli sɛ mɛ dungɔ lɛ ngɛ̃́ tɛ la gbinyangbi na bangɔ alo mɛ ala tengbi na ni.

 E ba na ndunu ni tɛnɛ mɛndó Yezo tɛnɛ: Kɔli kɔi mɛ na dungɔ lɛ ngɛ̃́ mɛ nzɔ̃ni, wa lo nga na ye gba. Wa yɔngɔ ndo mɛ ili lo la Lazalo ndo gwendó ka tɛ wa ye niko ngoi zu, na dangɔ bɛ ya lo na hɛ̃ngɔ ni tɛ ti tɛngɔ. Akɔli niko zu sɛ akpilindó, Lazalo ndo la kpi uzu, na gesi kɔli mɛ wa ye akpi ngandó. Kaya pandɛ niko ala zu sɛ dɛ hĩnga ndo na pɛ kwa tɛ la. Aangelo mundó Lazalo agwe na lo ka tɔnda Abrahama, li wa ye ahulu kaya wá wa lo tɛnɛ hɛ̃ Abrahama ya to Lazalo do ngu na li ti lo ko lo ga do na mɛnga mbi ti nɛngɔ ya bɛ mbi azu. Abrahama kɛ̃, wa lo tɛnɛ hɛ̃ lo ya na olo ko, kpale ɔngbi wa kota du mɛ lipi lipi akangbi popo tɛ mɔ na Lazalo.

 Ipɔ. Ni du bondó ndakisa mɛ Yezo hɛ̃ ti nɛngɔ ya ni ha azi na lo. Awa sungɔ Ngbangɔ hĩngandó ya tɛnɛ niko dundó pandɛ gɛgɛrɛ. Na ndakisa elengbi ti dingɔ kaya La Bible de Jerusalem, mɛ ndo tɛnɛ tɛnɛ ti “pandɛ gɛgɛrɛ, mɛndó ta ni li tɛrɛ lo uzu ma.”

 Pandɛ niko ndo fa ya zo lengbi ti dungɔ na dungɔ lɛ ngɛ̃́ na pɛ kwá? Yezo ndo handó tɛnɛ ya azi mɛ kpili ndo hũ pɛnɔ kaya wá ti lifelo? Wa anzɔ̃ azi nga ma Abrahama na Lazalo ala gwendó ndozu?

 Alo gba ndo fa ya ta seni la ma. E ba alo ni taa:

•   Se du ndó biani ya li kɔli mɛ wa ye ahulu ndó kaya wá ko, ngu mɛndó Lazalo ado na li ti lo alengbi ndo ti hulɛngɔ iɔ.

•   Nyi ngu mɛ yakere mɛ zo do na li ti lo alengbi ti zungɔ na bɛ zo mɛ kaya bɛta wá?

•   Na ngoi mɛndó Yezo ge tise ko, lo tɛnɛndó ya ta zo kɔi dɛndó ma ka ndozu ma. Ta Abrahama lengbindó ti gwengɔ ndozu ma.—Yoanɛ 3:13.

 Ipɔ. Azi gba hĩnga ya ta pandɛ niko du bɛta tɛnɛ ma, kanda azi mɛndɛ̃ ndo tɛnɛ ya na ngoi mɛ anzɔ̃ azi ndo kpili ko, ala ndo gwe ndozu wa ando sa asiɔ azi kaya wá ti lifelo. a

 Tɛnɛ niko adu bɛta tɛnɛ? Ipɔ.

 Hangɔ lo ti lifelo aɔngbi na tɛnɛ mɛ Ngbangɔ ndo tɛnɛ na ndo azi mɛ kpili. Ta Ngbangɔ ndo tɛnɛ ya anzɔ̃ azi zu la na gwengɔ ndozu ma, wa ta asiɔ zi ndo hũ nga pɛnɔ kaya wá ti lifelo ma. Ni tɛnɛ yangondo ya: “Azi mɛ na dungɔ lɛ ngɛ̃́ ahĩnga ya ani na kpilingɔ, kanda ta azi mɛ kpili ndo hĩnga bɛ ye kɔi ma.”—Mosakoli 9:5.

 Yezo tɛnɛndó ya linɔ tɛ azi niko sɛ na hĩngangɔ gbinyangbingɔ ti lo mɛ ala na tengbingɔ na ni.

 Kɔli mɛ wa ye ndo fa agbia ti sambela tɛ ayuda mɛndó, “ala ye faranga ma wo ma.” (Luka 16:14) Ala ndó da na ngoi mɛndó Yezo ndo kpɔ pandɛ niko, kanda ta ala yendó hangɔ lo tɛ Yezo ma. Agbia ti sambela ni ndo ye bondó lo tɛ la nvɛ̃ni, kanda ta tɛ azi mɛndɛ̃ ma.—Yoanɛ 7:49.

 Lazalo ndo fa azi mɛndó ndo ye hangɔ lo tɛ Yezo, kanda ala ndo kɛndó mangɔ nyɔ agbia ti sambela.

 Gbinyangbingɔ ti lo ni lindó tɛrɛ lo kaya linɔ niko zu.

•   Agbia ti sambela ti yuda ndo na dangɔ bɛ ya Nzapa na sulungɔ ani. Kanda ala hĩngandó ya ani du azi mɛ alengbi na kwa na ngoi mɛndó Nzapa akɛ̃ ala na sambela tɛ la, na lo mɛ ya ta ala yendó hangɔ lo tɛ Yezo ma. Li la hulundó na ndo hangɔ lo tɛ Yezo na awakalasi tɛ lo.—Matie 23:29, 30; Awa Pangɔ Kwa 5:29-33.

•   Ndó gã azi mɛ ta agbia ti sambela ndo li lo tɛrɛ la na ndenge ti nzɔ̃ ma, ala na olo ka lége mɛ nzɔ̃ni. Gba ka popo tɛ la yendó hangɔ lo tɛ Yezo, ni la li ya ala lua sulu tɛ Nzapa ti bwai.—Yoanɛ 17:3.