Ĩĩ, na lo mɛ ya gwɛ̃ tɛ Nzapa du ya azi bombi ndoni kɔi ti vɔrɔngɔ lo. Ngbangɔ pa ya: “Ale e ndodu na kpengba lɛ na popo tɛ e ya, e tinga wá na gbɛ afɔ̃ e ya, e na la e yengbi aɔ ti uzu, ko e li nga anzɔ̃ kwa. Ale ta e awakristo e dɔ nɔngɔ bombi tɛ e, e zia ma.”​—Aebreo 10:24, 25.

 Yezo tɛnɛndó ya ava lo na dungɔ kaya bombi kɔi, lo pandó hɛ̃ la ya: “Se ĩ yengbi wadila azi zu ahĩnga ya, ĩ ava mbi.” (Yoanɛ 13:35) Ala lengbindó ti fangɔ songo niko se du ya ala ndo bombi ndoni kɔi na ayata la awakristo. Ala lengbindó ti tengbingɔ ndoni kɔi ngoi zu ti nɛngɔ ya ala vɔrɔ Nzapa. (1 Kɔrinto 16:19) Ala lengbi ngandó ti lingɔ bombi kɔi tɛ ayata ti lɛ gigi zu.​—1 Petro 2:17.

Ta elengbi ti hɛ̃ngɔ Nzapa dengɔ bɛ bo na lo mɛ ya e kaya sambela kɔi ngaso mɛ ma

 Ngbangɔ tɛnɛ ya ayɔ ya azi bombi ndoni kɔi ti nɛngɔ ya ala vɔrɔ Nzapa, kanda ta zo lengbi ti hɛ̃ngɔ Nzapa dengɔ bɛ bo na lo mɛ ya lo ndo vɔrɔ Nzapa kaya sambela kɔi ngaso ma. Ti nɛngɔ ya Nzapa sepala na zo ko, ayɔ ya lo kpã tɛnɛ mɛ lo ndo ma ka sambela mɛ lo da na kwa na ya dungɔ lɛ ngɛ̃́ tɛ lo ti bí kɔi kɔi. Ngbangɔ tɛnɛ ya: “Ĩ ba se vɔrɔngɔ To e Nzapa mɛ lo ndoye ya, adu bɛta ni lo mɛ: zangɔ aya ndũ, na awe muã na ya pɛnɔ mɛ ala ndohũ, batangɔ tɛrɛ na ya asiɔ lo ti lɛ sese zu mɛ ndohanda zo ya, lo li siɔ ye.”​—Zaki 1:27.