Anamoona a Yehova annamukawiha Piipiliya, Otaphuleliwa wa Piipiliya a Elapo Evyaani a Soorempwa Saweela wa oothene yaale anachuna omwaalakhanya.

Naamwi macikhwi macikhweene a Apiipiliya yimprimiiriwe ni makhuuru mancipale a omutaphulela Piipiliya, ohaawa ni nthalu na mmalapelo onneeriha wi achu ancipale ehikhaleno Piipiliya mu elocelo aya. Mwa yeeyo, Anamoona a Yehova, annampaka Piipiliya, Otaphuleliwa wa Piipiliya a Elapo Evyaani mu ilocelo opwaha nsana ni khumi nathanu.

Moone sootakiherya ikina:

• Ruwanta: Silvestre ni Venantie yaawo arino anamwane asese, aaloca: “Hiyaano naachu oohaawaxa. Wa nthowa na yeeyo, hinaawerya omukula Piipiliya wa mmoha ti mmoha a veechokoni vahu. Vano, mmoha ti mmoha a hiyo ookhalano Piipiliya awe, Otaphuleliwa wa Piipiliya a Elapo Evyaani mu elocelo ya Ekinyaruwanta, nave ninnamwaalakhanya Piipiliya vamoha mahiku oothene.”

  Pastore mmoha a ekerexa Anklikana a elapo yeele, ooloca: “Kinnawerya omwiiwexexa Piipiliya yoola. Ta wiiweya waapwaha Apiipiliya oothene kiwaalakhannyaaka. Chiryene Anamoona a Yehova annaapwacha achu.

• Repuplika Temokratiku o Konko: Ikerexa ikina hiseemererya waatumiherya Anamoona a Yehova Apiipiliya a elocelo Linkala, elocelo yeeyo eri yawunlaana mu elapo yeele.

  Wa nthowa nenla, tahi yootikhiniha wi ovinyerya vaavaa aavonyiweiye Piipiliya, Otaphuleliwa wa Piipiliya a Elapo Evyaani mu Elinkala, Anamoona a Yehova o Konko yaatepa osiveliwa ompharihela ni omukawa Piipiliya yoola. Chiryene, Otaphuleliwa wa Piipiliya a Elapo Evyaani aatannyerya nchuno, nenlo neerinhe wi amanle ovonyiwa va muthukumano wa muceche wa Anamoona a Yehova, mapilisa yaari va nipuro nenle weeriwavo muthukumano, yaapheremana wi yamwaakhele Piipiliya aya.

• Fixi: Apiipiliya a elocelo ya Efixi toowalamelasa ophiyerya wi Anamoona a Yehova ancipale enampharihela Otaphuleliwa wa Piipiliya a Elapo Evyaani a Enklesi. Nto mu 2009 achu o Fixi yaahimwaakhela Piipiliya, Otaphuleliwa wa Piipiliya a Elapo Evyaani a Soorempwa Seekriki Seekristu (Nlakano Nahiihaano) mu elocelo yooyariwano.

  Mulopwana mmoha aatepa otikhiniheya ni okwakwaleya wa Piipiliya yoola ophiyerya wi alakelela omveka awawe. Nyenya owo aaphwanela oweherya mweeri woocharela wi amwaakhele Piipiliya mu epooma awe. Ahichunaka onweherya Piipiliya, owo aapaka mukwaha wa ikilometru makhumi mararu nathanu, wi amveke Piipiliya awe ni Namoona a Yehova mukina. Owo ooloca: “Piipiliya yoola taphaamaxa waapwaha Apiipiliya akina nnaapharihelaahu. Ola tookwakwaleya ni ookhweya omwiiwexexa.”

• Malawi: Vaavaa Davide aapacenryeiye omuhuserya Piipiliya ni Anamoona a Yehova, achu a ekerexa Uniyawu Patista aavekeleiyewo, yaaya owannyawe emwaakha Piipiliya yamvanhaaya. Mwawiihiiha, Davide aahakalala vancipale ni ovonyiwa wa Piipiliya, Otaphuleliwa wa Piipiliya a Elapo Evyaani.

  Woona wi Apiipiliya annatepa owalamela o Malawi, Davide aaniikoha mukhalelo aahaaleiye owerya omphwanya Piipiliya mukina. Nto vaavaa aavahiweiye Piipiliya, Otaphuleliwa wa Piipiliya a Elapo Evyaani, owo aaloca: “Vano kookhalano Piipiliya aphaama opwaha yoole kaaryaakano!”

Mu iyaakha makhumi mathanu nammoha ivirale, vaavaa makupa oopacerya a Otaphuleliwa wa Piipiliya a Elapo Evyaani, a Enklesi aavonyiweiye va muthukumano wa muceche mu epooma yo Nova York, yaaceenyeryiwa achu yaathukumanne: “Mmwaalakhanye oothene. Mmuhuseryeke . . . Mwaakaweleke akina.” Wi yaakhwaniheryiwe yoolakelela yeela, Anamoona a Yehova aawimprimiira Apiipiliya, Otaphuleliwa wa Piipiliya a Elapo Evyaani opwaha mamilyawu 175. Mwawaaceererya, nyuwaano munanwerya omwaalakhanya Piipiliya mu interneti mu ilocelo opwaha makhumi mathanu.