Waanyiherye yaweereya ela: Vaavaa Xuliya oniivareryeiye va eweheryo, onoona wi ootepa oneneva. Naamwi asitiithi ni asinthamwene awe elocaka wi owo tooyeva mwiili, Xuliya onniilocela: “Miyaano kootepa oneneva.”

Hiihaanoru, Xuliya aalakelela okukuca mwiili awe. Echu oneereiye ori ohiya olya mahiku vakhaani.

Waakhanle wi onoona ntoko Xuliya, tiheeni onaphwanelaawe weera?

Achu oothene anakhala awuukhuwa ni oreera waya. Ela ti yoophwanelela, naari tho Piipiliya onnaloca oreera wa alapeli a Muluku akhali, ntoko Sara, Rakeli, Apikayeli, Yosefe, ni Tavite. Owo tho onnamuloca muthiyana Apisake aari “òrèra.”—1 Mamwene 1:4.

Amiravo ancipale ari awuukhuwaxa ni oreera. Eyo enanwerya okumiherya makacamiho. Othokororye ela:

• Yootholathola emoha yohooniherya wi 58% a athiyana yaawo yoona wi tooneneva, 17% ti yaanenemve chiryene.

• Mu yootholathola ekina, 45% a athiyana yaawo yaari ooveya mwiili yiisoona okhala oolimela!

• Amiravo ancipale yaavyaavyaka okukuca mwiili aya annakhalano ereca yeeyo enarweela mu ohiya olya.

 Wakhala wi wookhalano ereca ntoko yeeyo, oveke nikhaviheryo. Omuleele mmusi aa naari muchu mukina onamuroromelaawe. Piipiliya oni: “Nthamwene onamukhwela nthamwen’awe mahiku othene, onnakhala munnawe, elukuluku y’epahu.”—Masiposipo 17:17.

Echu enamweeriha muchu okhala ooreera naari hooye, ori mukhalelo awe wa mpuwa. Othokororye mwaha wa mwaana a Tavite awiichaniwa Apsaloni. Piipiliya oni:

“W’Isarayele wothewene harivo mutxhu òrèra ntoko Absaloni: àri òrèra ene ovinya mwinani ophiyerya vamuru.”—2 Samuwele 14:25.

Naamwi hiiha, mmiravo ola aari a wiirumiha, a nrima ni oohiroromeleya! Mwawiihiiha, Piipiliya hanamuloca Apsaloni mmukhalelo waphaama; onamuloca ntoko muchu a wuuliha muru, oohiroromeleya ni a wiica.

Nthowa na yeeyo Piipiliya onnanivaha ekano ela:

‘Mun’ware mutxhu a hihano.’—Kolosi 3:10.

“Wiphapa wanyu [naari wiireeriha] ohikhale wa mwiliru, . . . okhale wa murima anyu.”—1 Pedro 3:3, 4.

Naamwi ehiri yoonanara ochuna okhala ooreera, echu yookhweleyaxa ori omuchu aa. Mweeparipari, okhalano omuchu wa mpuwa waphaama ti wasisapo opwaha oreera wa mwiili! Namwali mmoha awiichaniwa Felisiya ooloca: “Oreera ti wa elukuluku vakhaani, nyenya echu enahaala oweeriha akina omuupuwelela muchu iri mikhalelo sawe sa mpuwa.”

Ikwaha sincipale honasiveliwa ni oreera waa?

Wontoko wuupuwela ochariha meerelo naari opharihela sawiicikichela wi orehererye oreera waa?

Echu taani onachunaawe otoroka wi okhale ooreera? (Ohelele eneneeryo.)

• ORAKAMA

• OLIMELA

• MEEHI

• MWIILI

• ETHOI

• NNYAPARA

Wakhala wi wohaakhula “aai” makoho meeli nave woohela eneneeryo mikhalelo sawaakhwana miraru, osuwele wi achu akina hanawoona mmukhalelo woonanara ntoko oniisoonaawe. Ti wookhweya okhala awuukhuwaxa ni oreera waa.—1 Samuwele 16:7.