MWAHA 46
Ntakhara Heeni Wiiveleela wa Yehova ni Opatisiwa?
Yoolakelela yoochuneyaxa nnaphwanelaahu opaka mu okumi ahu ori wiiveleela wa Yehova. Hiyaano ninnaveleela okumi ahu wa Yehova, mu nivekelo, nave ninnaroromeliha wi nnahaala omurumeelaka yoowo pahiru ni okuha mu nipuro noopacerya yookhwela awe mu okumi ahu. (Salumu 40:8) Voocharela, hiyaano ninnapatisiwa. Mu opatiso, hiyaano ninnooniherya wa achu wi nohiiveleela wa Yehova. Yoolakelela ya wiiveleela wa Yehova ennatoroka okumi wa muchu. Vano tiheeni enamuceenyerya muchu opaka yoolakelela yeela yoochuneyaxa?
1. Tiheeni enamuceenyerya muchu wiiveleela wa Yehova?
Wiiveleela wahu wa Yehova onaceenyeryiwa ni osivela. (1 Yohani 4:10, 19) Piipiliya oni: “Waakhweleke Apwiya Muluku aa ni murima aa woothene, ni okumi aa woothene, ni miruku aa yoothene, ni owerya waa woothene.” (Marko 12:30) Ninnooniherya wi ninnamusivela Muluku ohiya pahiru mmasu, nyenya tho mu saweera sahu. Ntoko yootakiherya, vaavaa mulopwana ni muthiyana anasivelanaaya mweeparipari, awo annalakelela othelana. Moolikana, osivela nryaahuno ni Yehova onnanceenyerya wiiveleela wa yoowo ni opatisiwa.
2. Mareeliho taani muchu onaakheleiye wa Yehova amanle opatisiwa?
Nyuwaano mwapatisiwa, munahaala opacerya opaka makupa a emusi ya Yehova. Voocharela nyuwaano munahaala woona mukhalelo Muluku onoosiveleiyeeni, nave munahaala okhala awaacameleyaxa wa yoowo. (Mwaalakhanye Malakiya 3:16-18.) Mwawaaceererya va omoonaka Yehova ntoko Tiithi, nyuwaano munahaala okhalano anna ni arokora mu elapo yoothene, achu yaawo anamusivela Yehova ni anoosivelaani. (Mwaalakhanye Marko 10:29, 30.) Nyenya ti yawooneya wi, muhaakumve opatisiwa, nyuwaano munaphwanela opaka ichu ikina. Onachuneya ohuserya vooloca sa Yehova, omusivela yoowo ni okhalano nroromelo mwa Yesu, yoowo ori Mwanawe. Vookuchula, munaphwanela oveleela okumi anyu wa Yehova. Mwapaka ichu seiha ni mpatisiwa, munankhalano ekari ya opuha okumi okhala wookhala. Masu a Muluku anii: ‘Opatiso . . . vano onnoovuluxaani.’—1 Pedro 3:21.
OHUSERYA MWAWIISEELA
Moone ntakhara heeni oryaaya woochuneya oveleela okumi anyu wa Yehova ni opatisiwa.
3. Oothene ahu nnaphwanela olakelela taani nnahaalaahu omurumeela
Mu nloko na Aisarayeli akhalai, achu akina yuupuwela wi yaahaala omulapela Yehova nave elukuluku emohamoha emulapeleke muluku atheru Paala. Nyenya Yehova aamurumiha mulipa a miririmu awe Eliya wi aaleele yaawo wi eyo yaari yoonanara. Mwaalakhanye 1 Mamwene 18:21, nave voocharela muthokororye nikoho nla:
-
Yoolakelela taani Aisarayeli yaaphwanelaaya opaka?
Hiihaa ntoko Aisarayeli, hiyaano tho nnaphwanela olakelela taani nnahaalaahu omurumeela. Mwaalakhanye Luka 16:13, nave voocharela muthokororye makoho ala:
-
Achu akina anuupuwela wi ananwerya omulapela Yehova ni ichu ikina mu elukuluku emohamoha. Ntakhara heeni eyo tahi yooweryeya?
-
Nnooniherya hai wa Yehova wi noolakelela omurumeela pahiru yoowo?
4. Muupuweleleke osivela yoowo Yehova oreiyeno ni nyuwaano
Yehova oonivaha samahala sincipale sootikhiniha. Vano tiheeni hiyaano nnaphwanelaahu omvaha yoowo? Moone EXILEMA.
Mmikhalelo taani Yehova onooniheryeiye wi onnoosivelaani? Mwaalakhanye Salumu 104:14, 15 ni 1 Yohani 4:9, 10, nave voocharela muthokororye makoho ala:
-
Samahala taani soorweela wa Yehova seiyo siri savameekhaaya wa nyuwaano?
-
Waakhela samahala seiha enaweerihaani woona hai vooloca sa Yehova?
Apwanne nyuwaano mohintoko waakhela yamahala yeeyo yaweerinheeni okhala oohakalalaxa? Mweeparipari nyuwaano mwaachuna omuthamalela muchu yoowo oovanheeni. Mwaalakhanye Malamulo 16:17, nave voocharela muthokororye nikoho nla:
-
Mwaawuupuwelaka samahala soothene Yehova oovanheiyeni, eyo enooceenyeryaani weera eheeni wa yoowo?
5. Wiiveleela wa Yehova onnaruuha mareeliho mancipale
Achu akina aneemererya wi okhala oovuwa, okhalano muteko waphaama, ni ikhorowa onnaruuha ohakalala. Apwanne eyo eparipari? Moone EXILEMA, nave voocharela muthokororye makoho ala:
-
Naamwi Andrey aasiveliwa omvonya mphirya, ntakhara heeni owo aalakelela omuhiya omvonya?
-
Owo aalakelenle wiiveleela wa Yehova, ohiya wa mphirya. Nyuwaano munuupuwela wi owo aapaka yoolakelela yaphaama? Ntakhara heeni?
Murummwa Paulo ahaakumve okhala Mukristu, owo aahikhalano soothene wi akhaleno muteko wavasulu. Owo aahihuserya nlamulo na Ayuta ni muhusiha oovuwaxa. Nyenya Paulo aahiya soothene wi akhale Mukristu. Apwanne owo aakhalano ekeerelani sa yeeyo? Mwaalakhanye Filipi 3:8, NN nave voocharela muthokororye makoho ala:
-
Ntakhara heeni murummwa Paulo aaloca wi “kinera sa va’chúrwani” ichu seiho aapakeiye ahaakumve okhala Mukristu?
-
Tiheeni owo ophunreiye wanthowa na ohiya muteko wa vasuluxa?
-
Nyuwaano munoona wi okumi anyu onahaala okhala waphaama mwaalakelela omurumeela Yehova? Ntakhara heeni munalocaanyu hiihaa?
Vaavaa Paulo aakhanleiye Mukristu, owo aaphwanya sincipale opwaha seiho aahin’yeiye muculi
ACHU AKINA ANI: “Miyaano koosuwela wi ela eparipari, nyenya nkinachuna weemererya nlakano si nenla.”
-
Ntakhara heeni nyuwaano munoonaanyu wi ti waphaama wiiveleela wa Yehova?
MUKWASU
Osivela onnanceenyerya oveleela okumi ahu wa Yehova ni opatisiwa.
Makoho awuuluulela
-
Ntakhara heeni ninnaphwanela omusivela ni omulapela Yehova ni murima ahu woothene?
-
Mareeliho taani Yehova onaavaheiye alapeli awe oopatisiwa?
-
Nyuwaano mwaamusiveliwa wiiveleela wa Yehova?
OTHOLATHOLA
Moone ntakhara heeni mulipa awiipa mmoha ni mulipa oochimaka yaalakelenlaaya oveleela okumi aya wa Yehova.
Os jovens perguntam —O que fazer da minha vida?—Relembrando (6:54)
Moone mathowa makina a wiiveleela wa Muluku.
“Por que se dedicar a Jeová?” (A Sentinela, 15 de janeiro de 2010)
Mu ncipo nenla mmukhalelo wa exilema yeela, moone ohakalala wa yaawo yiiveleenle ntakhara Yehova.
Mwaalakhanye mwaha: “Eu me perguntava ‘Por que estamos aqui?’” wi moone yeeyo yaamuceenyenrye muthiyana mmoha ovareryela ichu soochuneyaxa wa yene.
“A Bíblia muda a vida das pessoas” (A Sentinela, 1.º de novembro de 2012)
