Tavite aamanleiye omwiipha Koliyati, Sawuli aamuthanla wi akhale mutokweene a anakhoco. Tavite aavootha mu ikhoco sincipale, nave aatepa osuweliwa. Vaavaa Tavite aakhumeiye okhoconi, athiyana yaanamuthikirerya yiinaka ni yiipaka eriki: ‘Sawuli owiiphale ncikhwi, nave Tavite owiiphale macikhwi khumi.’ Sawuli aapacerya omukhalela nrima Tavite.

Tavite aanawerya omoopa phaama pankwe. Ekwaha emoha Tavite amoopaka pankwe, Sawuli amvonyerya nivaka. Tavite aarapela mwawaakuveya, nave nivaka naahoma exiri. Ikwaha sincipale Sawuli annaavyaavya omwiipha Tavite. Ohoolo waya Tavite aachawa nave iipitha mutakhwani.

Sawuli aahaakuxa alopwana 3.000 nave yaacimula wi emwaavye Tavite. Sawuli aavolowa mu nikhuku mwemmo tho aareiyemo Tavite ni achu awe. Achu a Tavite  yaamuleela eriki: ‘Omweerele yeeyo onachunaawe.’ Tavite aamwitela Sawuli nave aakwasa niveru na malaya awe nto Sawuli haasuwenle. Tavite aatepa othanana nthowa na okwata yoowara ya mwene aathanliwe ti Yehova. Owo haawemerenrye achu awe wi emwiiphe Sawuli. Ohoolo waya aakhuwela wa Sawuli amuleelaka wi aanwerya omwiipha. Apwanne Sawuli aalapha omwiica Tavite?

Hooye. Sawuli aatitelela omwiica Tavite, nyenya tahi wi amusi oothene a Sawuli yaanamwiica Tavite. Ohiyu omoha, Tavite ni musulwawe Apisai yaaphiya vaava Sawuli aareiyevo. Apineri mulipeleli a Sawuli iiso arikimurupa. Vanonto Apisai aaloca wa Tavite: ‘Okihiye kimuhomele vachayani nnivaka nawe omoharu.’ Nto Tavite aahaakhula: ‘Apwiya aneene anamumphoreiha. Vano okuse nivaka nawe ni murinka wa maahi ni nipwaheke.’

Tavite aawela va mwaako nave aakhuwela wa Apineri: ‘Ntakhara seeni ohimukhapelenlaawe pwiya aa? Woone nivaka na mwene nryaayavo ni murinka wa maahi waari waamuru wawe.’ Nave Sawuli aahiiwa nsu na Tavite nave aahaakhula: ‘Ovinya olelo nkinaweerela yoonanara woona wi weyaano woocicimiha okumi aka. Koosuwela wi onahaala okhala mwene a Isarayeli.’ Sawuli aakookela owannyawe.