Yehova aamuleela Samuwele: ‘Miyaano kinnooruma wa Yese, ntakhara wa anaawe koomuthanla mmoha wi akhale mwene.’ Mwawiihiiha, Samuwele aaya wa Yese. Vaavaa aamonneiye mwaana mutokweene a Yese, yene aahuupuwela: ‘Chiryene ti yoola Apwiya amuthanlilaya.’ Nyenya Yehova aamuleela Samuwele wi haamuthanlile. Yehova aahi: ‘Muchu onoona iri sawooneya, nto miyaano kinoona murima.’

Yese aahaaruuha anamwane awe athanu nammoha. Nto Samuwele aahi: ‘Wa yaala haavoru mmoha Apwiya amuthanlilaya. Wookhalano mwaana mukina?’ Yese aahaakhula: ‘Oohala mwaana mukhaanixa elukuluku yeela onalyiha muhuwo.’ Vaavaa Tavite aaphiyaleiye, Yehova aahi wa Samuwele: ‘Ti yoowo!’ Samuwele aahela makhurwa va muru wa Tavite wi akhale mwene oomwaahiyu a Isarayeli.

Ohoolo waya, Aisarayeli yaapacerya owana ni Afilisti, nto Afilisti yaakhalano mukhoco oorakama awiichaniwa Koliyati. Mahiku oothene Koliyati aanaanyemula Aisarayeli. Owo aanakhuwela: ‘Mmuthanle mulopwana wi arwe awane ni miyaano. Yoowo akiphoreiha ni akiwerya, hiyaano nnamukhala akapuro anyu, nto miyaano kamvootha, nyuwaano munamukhala akapuro ahu.’

Tavite aaya weiwo akhoco a Isarayeli yaaraayawo wi aavahe yoolya. Owo aamwiiwa Koliyati aruwanaka nave aaloca: ‘Kinamuya kawane ni Mfilisti owo!’ Mwene Sawuli aahi:  ‘Weyaano wa mwaana.’ Tavite aahaakhula: ‘Apwiya anamukoopola.’

Sawuli aamunnya Tavite ikaruma sa ekhoco, nto Tavite aariye: ‘Nkinawerya weeca ni ichu seiya.’ Tavite aakuxa mukoi awe aaya opopani. Aathanla maluku mathanu oovilikana nave aahela mmurupani mwawe. Tavite aamuchimakela Koliyati. Mfilisti owo aakhuwela: ‘Orwe va, mwiili aa onamuthumpwa ti ipalame ni onamukhuuriwa ti asinama a mutakhwani.’ Tavite hoomve echu. Owo aamwaakhula tho: ‘Weyaano onarwa wa miyaano ni nsipaaca, nivaka ni eyaakiho; nto miyaano kinaya wa weyaano mwa nsina na Apwiya Muluku a owerya woothene.’

Tavite aahela nluku va mukoi nave aavonya ni ikuru sawe soothene. Nnikhaviheryo na Yehova nluku naavonyeya nthorola eyuuci na Koliyati nave aahuuwela vathi. Tavite aamuchimakela nave aamwiipha ni nsipaaca na Koliyati. Yonnaaya yeela Afilisti oothene yaachawa. Weyaano onnamuroromela Yehova hiiha ntoko Tavite?