Ovinre othela o Kanani, Yesu onaya o Kafarnau. Amannya ni asinnawe oomaayi—Tiyako, Simoni, ni Yutasi—annakhala vamoha ni yoowo.

Nyenya ntakhara heeni Yesu onayeiye o Kafarnau? Epooma ela ti yookhweleya opwaha yo Nasareti naari Kanani nave mwawooneya etokweene. Navetho, amuhuserya avyaani a Yesu anakhala weiwo naari waacamela o Kafarnau. Mwawiihiiha Yesu onanwerya waavyakiha mu elapo aya.

Elukuluku onakhaleiye o Kafarnau, Yesu onnapakatho miteko sootikhiniha. Mwawiihiiha achu ancipale a epooma ni moorukurerya ahiiwa vooloca sa ichu owo onapakeiye weiwo. Nyenya Yesu ni asinthamwene awe, yaawo ari Ayuta amvai, anaphwanela opaka mukwaha eyaaka o Yerusalemu ntakhara Paskha a eyaakha 30 E.K.

Nlelo eri mu empa ya Muluku o Yerusalemu, amuhuserya a Yesu annoona echu vooloca sa Yesu enaatikhiniha vancipale, moohiyana ni yeeyo yonnaaya khalai.

Nlamulo na Muluku ninnaalamulela Aisarayeli opaka mikucho sa asinama mu empa ya Muluku, nave aleco annachuna soolya elukuluku anakhalaaya weiwo. Mwawiihiiha, Nlamulo ninnaaweemererya yaale anapaka mikwaha eyaaka o Yerusalemu okusa ikhorowa wi ethume “iputxeputxhe ni ipuri,” ni ichu ikina anachunaaya variyari va elukuluku anakhalaaya weiwo. (Malamulo 14:24-26) Ntoko yookhumelela, alipa oocinca ikhorowa o Yerusalemu anaatumiha asinama ni ipalame mpuwa, vanipuro ntokweene na empa ya Muluku. Akina a yaawo annawiiyera achu moorweela wa owalameliha ichu.

Anyeenyen’ye, Yesu onnayeeherya ikhorowa vacheyani, onnapicula meesa, nave onnawiikarela vaate alopwana oothene. Voocharela Yesu onnaloca: “Nvìhemo itxhu iha! Muhere empa ya Atithi aka empa ya marotxa.”—Yohani 2:16.

Vaavaa oohuserya a Yesu anoonaaya yeela, awo annuupuwelea yooloherya vooloca sa Mwaana a Muluku: “Opwatxha wa empa à wokikusa murima.” Nyenya Ayuta annamukoha: “Eneneryo tani onanonihawe wi onera hiha?” Yesu onnawaakhula: “Mmwarye empa ela, nave mahiku mararu miyo kinamuteka.”—Yohani 2:17-19; Salumu 69:10.

Ayuta anuupuwela wi Yesu onaloca sa empa ya Muluku o Yerusalemu, mwawiihiiha awo annamukoha: “Imanle miyakha makhumi masese ni miyakha mithanu na moha etekiwaka empa ela, vano weyano oni oteke mahiku mararu?” (Yohani 2:20) Nyenya, Yesu onaloca sa mwiili awe ntoko empa ya Muluku. Iyaakha chaaru ohoolo waya, oohuserya awe annuupuwela masu yaala vaavaa onaviihiweiye mookhwani.