Yesu orwiile o Yerusalemu ntakhara Efesta ya Ochapela. Efesta ela enachapeliwa wanaawiili empa ya Muluku. Voovira wa iyaakha soopacerya Mwene o Antiokeya o Siriya IV Epifanes aahimuteka altari vasulu va altari a empa ya Muluku. Ohoolo waya, anamwane a Muyuta namukucho Matatias aahimvolowela Yerusalemu nave aahichapela wanaawiili empa ya Yehova. Ovinyerya vaavale, eyaakha ti eyaakha efesta enapacerya 25 a Kisleu, mweeri yoowo oniiwanana ni makupa ookuchula a Novempuru ni omapacereryo a Tesempuru.

Elukuluku ya muluku muchulo, ennapacerya elukuluku ya oriirya. Yesu oneeca mu empa ya Muluku mu nipithela na Solomoni. Vala, Ayuta annamurukurerya nave annaloca wa yoowo: “Oni onikhuwe mpaka lini? Onlèle epariparyene warì Kristu.” (Yohani 10:22-24) Yesu aakhulenle hai? Owo onnawaakhula: “Kiholèlani vale, nto nyuwo himunemererya.” Yesu haaleenle mooluluwanya wi owo ti Kristu, hiiha ntoko aamulenleiye muthiyana o Samariya veehimeni. (Yohani 4:25, 26) Owo aahisuweliha moorweela wa oloca: “Abrahamu ahiyariwe, miyo kòkhala.”—Yohani 8:58.

Yesu onachuna wi achu esuwele aneene wi owo ti Kristu moorweela wa olikanyiha miteko sawe ni yeeyo yaaloheryiwe Kristu aahaaleiye opaka. Ti nthowa nene ikwaha ikina aaleeleiye amuhuserya awe ohimuleela muchu wi owo aari Mesiya. Nyenya vano owo onaaleela Ayuta yaala oopwaalu: “Miteko kinapharaka mwa nsina na Atithi aka sinnakihelela onamona, nto nyuwo himunemererya.”—Yohani 10:25, 26.

Ntakhara heeni awo ahineemereryaaya wi Yesu ti Kristu? Owo onnaloca: “Nyuwo hamunaroromela, ntakhara hamuri a ipuchepuche saka. Ipuchepuche saka siniwa masu aka, nave Miyo kinnasuwelasha iho, nave sinnakitchara Miyo. Nave Miyo kinnavaha iho okumi wohimala; nave hasirwa-sipahuwa mahiku othene, nave havovo mutchu anarwa-ashophola iho mu ntatani naka. Atithaka, yowo ákivahile iho, ori mtokotoko ópwaha othene.” Voocharela Yesu onnaaleela ophiyerya mweeryo taani onthamwene awe ni Atiithi awe oryaaya woolipa, mu oloca: “Miyo ni Atithi ná amoha.” (Yohani 10:26-30, Nlakano Nahihano) Chiryene, naamwi Yesu aari veelaponi yavathi nave atiithi awe wirimu, awo anapaka ichu mwawiiwanana nave ari amoha mu soolakelela.

Masu a Yesu annaanyeenyeiha Ayuta ophiyerya wi awo annamvonyerya maluku wi emwiiphe. Ela henamoopopiha Yesu. Owo onnaloca: “Miyo kòwonihani miteko saphama sawatxa inarwa wa Atithi. Wa seiho tuvi munakhwelanyu okivonyerya ni maluku?” Awo yaahaakhula: “Hiyo hinnovonya ni maluku wa nthowa na muteko waphama onapharawe, nto wa nthowa na omuruwana Muluku, ntakhara . . . onnisera Muluku.” (Yohani 10:31-33) Yesu hantonko oloca wi akhale muluku, vano ntakhara heeni anamootheryaaya?

Phaameene, Yesu onaloca wi yene ookhalano owerya yoowo Ayuta aneemereryaaya wi onamphwanela Muluku pahi. Ntoko yootakiherya, vooloca sa “iputxeputxhe” owo aahi: “Kinnavaha seiho ekumi yohimala,” echu yeeyo achu ahinaweryaaya opaka. (Yohani 10:28) Ayuta anavaanya eparipari wi Yesu mwawooneya oheemereryiwa wi aakhele olamulelo orweela wa Atiithi awe.

Avaanyaka wootha waya, Yesu onnaakoha: “Herempwe mmalamuloni mwanyu [mu Salumu 82:6] wi: Miyo kòlotxa: nyuwo muri amuluku? Nlamulo nawitxhanaka amuluku yale alaleriwe  nsu na Muluku . . . ntakhara seni wa yole Atithi amutxikitxhenlaya ni amurummaya mwelaponi nyu muni: onnamuruwana Muluku, wona wi kòlotxa kiriki: kiri Mwana a Mukuku?—Yohani 10:34-36.

Chiryene, Soorempwa sinnawiichana achu oohookololowa ntoko “amuluku.” Vanonto onaweryeya hai Ayuta ala omootherya Yesu mu oloca “Kiri Mwana a Mukuku”? Owo onnaloca echu yeeyo enaphwanela waalakecha: “Kahipharaka miteko sa Atithi aka, muhikemereryeke; nto kapharaka, nnamwi nyuwo muhikhwelaka okemererya miyo, mwemereryeke mano miteko, wi musuwele ni monelemo wi Atithi ari mwa miyo, ni miyo mwa Atithi.”—Yohani 10:37, 38.

Naamwi hiiha, Ayuta anneererya omphara Yesu, nyenya owo onnakophola. Owo onnavinyawo o Yerusalemu nave onnalapuwa Muhice Yortano ayaaka makupa Yohani aapacenryeiyewo opatiso mu iyaakha sese soopacerya. Akhweya horakamenlewo ni omakiseryo wa ohico wa Eniya yo Kalileya.

Miloko sinnarwa wa Yesu nave sinnaloca: “Yohani henre yotikiniha, nto sothene Yohani alontxeiye wa ola, yàri eparipari.” (Yohani 10:41) Mwawiihiiha, Ayuta ancipale annamweemererya Yesu.