Wakhala wi ninnaaceererya osuwela mikhalelo sa muchu, ninnamusuwela owo phaama, nave onthamwene ahu onnalipa. Moolikana, wakhala wi noosuwela phaama mikhalelo sa Yehova, nnahaala osuwela omuchu awe nave onthamwene ahu onahaala olipa. Wa mikhalelo mincipale sa Muluku, mikhalelo mixexe ti sootikhiniha: Ikuru sawe, miruku, ekhaikhai, ni osivela.

“Khoo! Apwiya, pwiyaka! Ti nyu mpanke erimu ni elapo ya vathi mwa ikuru.”—YEREMIYA 32:17.

Sinnooneya ikuru sa Muluku mu soopatuxiwa sawe. Ntoko yootakiherya, wakhala wi moheemela vaate nihiku nnoopaaya nsuwa, tiheeni munoonaanyu? Oviha wa nsuwa. Elukuluku yeeyo, nyuwaano munoona ikuru sa Yehova mu soopatuxiwa sawe. Nsuwa nnaviha ophiyerya mweeryo taani? Ennalociwa wi oviha waya onnaphiyerya ikarau sawaakhwana 15.000.000. Sekunto ori oothene, nsuwa ninnapaka mooro onalikana ni ophuwa wa akapuchi atokotoko opwaha macikhwi masaneene.

Nyenya, wakhala wi noolikanyiha nsuwa ni itheneeri iri wirimu, nlo nnakhala nikhaani. Masiyentista annaloca wi etheneeri etokweenexa, eniichaniwa UY Scuti, wunnuwa waya ori wuuluula ikwaha 1.700 wunnuwa wa nsuwa. Wakhala wi etheneeri ela yooraceelihiwa ni nsuwa, Elapo yaahaala ovya ophiyerya okhomo wa eplaneta eniichaniwa Jupiter. Ela ennanikhaviherya wiiwexexa phaama masu yaawo Yeremiya aalonceiye wi Yehova opanke erimo ni elapo yavathi, ni ikuru sawe itokotoko.

 Nnaphura hai ikuru sa Muluku? Ekumi ahu ennakhaviheryiwa orweela wa soopatuxiwa sa Muluku, ntoko nsuwa vamoha ni soopatuxiwa ikina sooreera veelaponi yavathi. Nyenyatho, Muluku onnapharihela ikuru sawe wi aakhaviherye achu mmukhalelo wavameekhaaya. Mwawiihai? Mu nsana noopacerya, Muluku aamvaha ikuru Yesu wi apake miteko saari sootikhiniha. Ninnaalakhanya Mpiipiliyani: “Oohoona annoona, oorakala anneeca, achu a ilepa annarehereriwa, oohiiwa anniiwa, alipa ookhwa annaviihiwa.” (Mateu 11:5) Hanka mmahiku ahu yaala? Piipiliya onnaloca wi Apwiya Yehova “annaavaha ikuru oovelavela,” nave tho onnaloca ariki: “yaawo anaawehererya Apwiya, ikuru saya sinnaaceerereya.” (Isaiya 40:29, 31) Muluku onanwerya onivaha “owerya . . . woopwaha” wi niwerye ovilela makacamiho a okumi. (2 Korinto 4:7) Nyuwaano hamunoona wi ti yaphaama omwaacamela Muluku yoowo onapharihela ikuru sawe soohikota wi anikhaviherye?

“Apwiya, miteko sanyu tisawaaca! Muheerano soothene seiya mwa miruku.”—SALUMU 104:24.

Wakhala wi noopwahiherya ohuserya ichu Muluku opankeiye, nnahaala okhala ootikhiniheya ni miruku sawe. Alipa oohuserya aakhalano makupa aniichanaaya biomimética, mmakupa yaala, awo annahuserya soopatuxiwa sa Yehova nave annatakiherya seiho wi epake ichu anachunaaya. Ninnawerya woona yeela mmukhalelo nipakiwaaya nceeke.

Opwaha soopatuxiwa soothene, miruku sa Muluku sinnooneya mmukhalelo muchu opatuxiweiye. Ntoko yootakiherya, muupuwele mukhalelo mwiili wa muchu onannuwaaya. Eyo enapaceryeya ni eseelula ekhaani, yeeyo enakhalano sooleeliherya soothene sinachuneya. Eseelula eyo, ennakawanyeya mu iseelula sincipale soolikana. Nyenya mu elukuluku aya yoophwanelela, iseelula iho sinnapacerya okhalano makhalelo oohiyanahiyana, ophiyerya sikhalavo iseelula masana masaneene soohiyana, ntoko iseelula sa nikhami, iseelula sa misiphe, ni iseelula sa makhuva. Moohilekela onnapakeya mwiili ophiyerya opacerya omumula. Pahiru mu miyeeri mithanu namixexe, eseelula yeele yoopacerya ennannuwa akhala muchu awaakhwanela orino iseelula macikhwi macikhweene. Mukhalelo nnanuwaahu, onnooniherya miruku mitokweene sa Mpatuxa ahu. Vanthowa na yeela, ancipale anneemererya masu a namarepa a Piipiliya yoowo aalonce ariki: “Kinnoothamalaani ntakhara mookipatusha mootikiniha.”—Salumu 139:14.

Nnaphura hai miruku sa Muluku? Mpatuxa oosuwela yeeyo nnachunaahu wi nikhale oohakalala. Moorweela wa masuwelelo oohikuchuwa ni wiiwexexa wawe, owo onnanivaha miruku samphurelo Mmasu awe, Piipiliya. Ntoko yootakiherya, owo onnanceenyerya ariki: “Mukhurumuwelaneke, mukina . . . ni mukhwaawe.” (Kolosi 3:13) Hamunoona wi iha miruku saphaama? Eparipari. Matotore annaloca wi okhurumuwela onnamukhaviherya muchu okona phaama ni ohikhalano ereca ya muupuwelo. Eyo enanwerya okukuca othanana ni okhapelela okumi ahu. Muluku ori ntoko nthamwene oopwacha, yoowo ohinahiya onivaha  miruku seiho inanikhaviherya. (2 Timóteo 3:16, 17) Apwanne hamunachuna okhalano nthamwene ntoko yoola?

“Apwiya [Yehova] annathoriha ni ekhayikhayi.”—SALUMU 37:28.

Ilukuluku soothene Muluku oneera yeeyo eri yeekhaikhai. Chiryene, “honeemerereya wa Muluku weerano soonanara, wa Ooweryasha weerano sootakhala!” (Yobi 34:10) Othoriha wawe ti wawookololowa, hiiha ntoko namarepa a Salumu aalonceiye ariki: “Munnaathoriha achu mwa wookololowa.” (Salumu 67:4) Woona wi “awo anavarerya murima” hanawokeya ni oreera wa ethoi, moohiyana annawerya osuwela eparipari ni othoriha mwawookololowa. (1 Samuwele 16:7) Opwaha soothene, Muluku onnoona meerelo oothene a ohookololowa ni makhwankwa veelaponi yavathi, nave onnaroromeliha wi moohilekela “aweera soonanara anarwa aviihiwamo mweelaponi ya vathi.”—Masiposipo 2:22.

Mwawiihiiha, Muluku tahi mulipa oothoriha oonanara murima yoowo onachuna pahiru onihooxa. Owo onnooniherya ikharari wakhala woophwanelela. Piipiliya oni: “Apwiya tamahala ni a ikharari,” awo annooniherya ikharari wa amutakhali wakhala wi aacharuwa. Chiryene, eyo ekhaikhai.—Salumu 103:8; 2 Pedro 3:9.

Nnaphura hai ekhaikhai ya Muluku? Murummwa Petro aaloca: “Muluku haanono nthalu ni achu, nto, mwa maloko oothene annamwaakhela muchu pure.” (Saweriwa T’arummwa 10:34, 35) Hiyaano ninnaphura ekhaikhai ya Muluku nthowa nawi owo hanaathanya achu naari mano haano nthalu. Nnanwerya weemereryiwa ni yoowo ni okhala alapeli awe moohipwacha makhalelo a nrapala nahu, elapo, ohuserya naari nihimo nahu.

Woona wi Muluku onachuna wi niphure ekhaikhai awe, owo oonivaha yawuupuxerya-ya-murima. Piipiliya onaloca wi yawuupuxerya-ya-murima eri ntoko nlamulo ‘nrempwale mmurimani,’ nenlo nnavaha “onamoona” waakhanle wi meerelo ahu teekhaikhai naari hooye. (Aroma 2:15) Yawuupuxerya-ya-murima  enanikhaviherya hai? Wakhala wi yoovyakihiwa phaama, enanwerya onikhaviherya orapela meerelo oonanara. Nave wakhala wi noohesa, eyo annanikhaviherya ocharuwa ni ohiya meerelo yaawo oonanara. Mmukhalelo yoola, wiiwexexa meerelo eekhaikhai a Muluku, onahaala onikhaviherya omwaacamela yoowo!

“Muluku ti osivela.”—1 YOHANI 4:8.

Muluku onnooniherya ikuru, miruku, ni ekhaikhai, nyenya Piipiliya hanaloca wi Muluku ti ikuru, miruku, naari ekhaikhai. Pahiru onaloca wi owo ti osivela. Ntakhara heeni? Nthowa nawi ikuru sawe sinoona omukhaviherya weera echu, nave ekhaikhai ni miruku sinoona omuhoolela mukhalelo wa weerano. Nyenya, osivela wa Yehova tonamweeriha weerano echu eri yoothene. Osivela onnavolowela soothene owo oneereiye.

Naamwi ehikhanle enamuhalela Yehova, osivela wawe woomweeriha opatuxa ikumi wirimu ni veelaponi yavathi, seiho sinawerya opuha osivela ni othokororya wawe. Ahirino nrima, owo oorehererya elapo wi nikhale nipuro noophwanelela wa achu. Nave onnatitelela wooniherya osivela wawe wa achu oothene moorweela wa okumiha ‘nsuwa wa achu oonanara murima ni aphaama ni orupiha epula wa achu awookololowa murima ni wa ohookololowa.”—Mateu 5:45.

Mwawaaceererya, Yehova “tawaaca ikharari ni mahala.” (Tiyako 5:11) Owo onnooniherya ikharari sawe xaxaxa wa yaale analakelela ni murima woothene omusuwela ni omwaacamela. Muluku onnamoona muchu ti muchu a yaawo. Chiryene, owo “ti yoowo onoothokororyaani.”—1 Pedro 5:7.

Nnaphura hai osivela wa Muluku? Hiyaano ninnasiveliwa woona oneela wa nsuwa. Ninnahakalala wiiwa otheya wa mwaana. Ninnavaha esisapo etokweene osivela wa ahima ahu. Ichu seiha tahi wi ti soochuneyaxa, nyenya sinnahakalaliha vancipale okumi ahu.

Hiyaano tho ninnaphura makhalelo makina a osivela wa Muluku: Ovekela. Piipiliya onnanceenyerya ariki: “Muhiipele murima echu ekina, nto mu soothene mmuleeleke Muluku seiyo munavekaanyu.” Ntoko tiithi oosivela, owo onachuna wi naavyeke nikhaviheryo nawe. Mwawiihiiha, nthowa na osivela wawe otokweene, onnaroromeliha onivaha “murecele wa Muluku, yoowo opwanhe wuupuwela woothene.”—Filipi 4:6, 7.

Apwanne othokororya yoola wawaakuveya wa mikhalelo sa Muluku ntoko ikuru, miruku, ekhaikhai ni osivela, hiwookhavihenryeni wiiwexexa phaama omuchu wa Muluku? Wi mwaaceererye omuthamalela wanyu Muluku, ninnoowopaani wi muhuserye ichu seiho eenreiye ni seiho onahaaleiye weera wi ookhaviheryeeni.