1, 2. (1) Ohookololowa taani Napoti ni anaawe yeereliwaaya? (2) Mikhalelo taani miili nneeraahu nthokororye mmwaha yoola?

ALOPWANA apiili oonanara murima yaahimootherya mulopwana wi aahipaka echu yoonanara. Yeeyo yaaloncaaya hiyaari eparipari. Nyenya mulopwana aahiphwanyeriwa mathowa nave aahikusiwa wi iiphiwe. Nkaanyiheryani mukhalelo achu yaawo yaasivela ekhaikhai yoonnaaya vaavaa yaamonnaaya mulopwana yoola ni anaawe yahaarino nthowa evonyeriwaka maluku wi yiiphiwe! Ela tahi ethale. Echu eyo yeeren’ye ni kapuro oororomeleya a Yehova iichaniwa Napoti, yoowo aakhanle vaavaa Akape aareiye mwene.—1 Mamwene 21:11-13; 2 Mamwene 9:26.

² Mmwaha yoola nnahaala othokororya echu yeeren’ye ni Napoti. Nnahaalatho othokororya yoohesa yaapakiwe ni mutokweene oororomeleya a muloko woopacerya Weekristu.  Sootakiherya seiya piili sinahaala onooniherya mukhalelo wiiyeviha ni okhurumuwela siraaya soochuneya wakhala wi ninnachuna otakiherya ekhaikhai ya Yehova.

3, 4. Napoti aari muchu a mukhalelo taani, nave ntakhara heeni aakhooca omukuliherya emaca Mwene Akape?

³ Napoti aari oororomeleya wa Yehova mu elukuluku yeeyo Aisarayeli ancipale yaacharaaya yootakiherya yoonanara ya Mwene Akape ni mwaariye Yesapeli. Awo yaamulapela muluku atheru Pala nave hiyaamucicimiha Yehova naari malamulo awe. Nyenya Napoti aanavaha esisapo onthamwene awe ni Yehova opwaha okumi awe.

⁴ Mwaalakhanye 1 Mamwene 21:1-3. Vaavaa Akape iivanheiye okula emaca ya Napoti naari wi etorokane ni emaca yaphaama ya Akape, Napoti aahikhooca. Ntakhara heeni? Moocicimiheya owo aahimutharihela: “Ematxa ela kihiyeriwe ti makholo aka, wa nthowa na yeyo nkinaphwanela ovaha. Apwiya hekakitxhunin’he ovaha.” Napoti heemerenrye yoovaha ya Mwene Akape nthowa nawi waari woovuhana ni nlamulo na Yehova wa Aisarayeli vooloca sa okuliha moomalela emaca yoohiyeryiwa ni makholo. (Onamukutxho 25:23; Namarepela 36:7) Chiryene, Napoti aanamwiiwelela Yehova.

5. Tiheeni Yesapeli enreiye wi akhaleno emaca ya Napoti?

⁵ Vaavaa Napoti aakhonceiye okuliha emaca, Mwene Akape ni mwaariye yaahipaka ichu sawoopiha. Wi ekhaleno emaca, Yesapeli aahaaveka alopwana apiili wi yamootherye Napoti wi aahipaka echu yoonanara, yeeyo ahaapankeiye. Ntoko yookhumelela, Napoti ni anaawe yaahiiphiwa. Tiheeni Yehova enreiye vooloca sa ohookololowa yoowo woopwaha mphimo?

6, 7. Yehova oonihenrye hai wi onnasivela ekhaikhai, nave ntakhara heeni ela yahihakararya emusi ya Napoti ni asinthamwene awe?

⁶ Moohilekela Yehova aahimurumiha Eliya wi akumane ni Akape. Eliya aahimuleela Akape wi aari mulipa awiipha ni mpava. Tiheeni Yehova aalakelenleiye? Akape ni mwaariye vamoha ni anaawe yaahaala wiiphiwa, hiiha ntoko eereliweiye Napoti ni anaawe.—1 Mamwene 21:17-25.

⁷ Emusi ya Napoti ni asinthamwene awe yaahitepa othanana ntakhara ichu sawoopiha Akape aapankeiye. Nyenya Yehova aahoona ohookololowa nave moohilekela aaheeravo echu. Eyo yahaahakararya awo. Nyenya, wiiyeviha waya ni omuroromela waya Yehova akhweya waaheehiwa moorweela wa yeeyo yeeren’ye voocharela.

8. Akape oonne hai vaavaa iiwaleiye muchaka wa Yehova, nave teevi yaari yookhumelela?

⁸ Vaavaa Akape iiwaleiye yeeyo Yehova aalakelenleiye omweerela, “àhahula sowara sawe, àwara esakhu ni àpatxerya winanela yolya. Vokonani ikhunela ni esakhu ni  ètxha uramenle vathi.” Akape aahiiyeviha! Teevi yaari yookhumelela? Yehova aaloca wa Eliya: “Wohona Akabi wiyeviha wawe vamithoni vaka? Wa nthowa na yeyo nkiphoreiha etxheko awe mahiku a ekumi awe, nto kinaya ophoreiha mwa mahiku a ekumi ya mwanawe.” (1 Mamwene 21:27-29; 2 Mamwene 10:10, 11, 17) Yehova, ‘onathoriha atxhu,’ yoowo onoona yeeyo nryaahu, aahimmorela ikharari Akape.—Masiposipo 17:3.

9. Ntakhara heeni wiiyeviha waahaala okhapelela emusi ya Napoti ni asinthamwene?

⁹ Vaavaa emusi ya Napoti ni asinthamwene yiiwalaaya wi emusi ya Akape hiyaahaala olakiwa ophiyerya okhwa wa Akape, akhweya eyo yaaheeha nroromelo naya wa Muluku. Nyenya wiiyeviha waahaala waakhaviherya okhapelela nroromelo naya. Ntakhara heeni? Wakhala wi yaari awiiyeviha, awo yahaala otitelela omulapela Yehova, ororomela wi honaweryeya Muluku okhala oohookololowa. (Mwaalakhanye Malamulo 32:3, 4.) Omwaahiyu, emusi ya Napoti enahaala waakhela mareeliho moorweela wa owoona oosiveliwaaya eviihiwe mookhwani. Enahaala okhala ekhaikhai yawaakhwanela ntakhara Napoti ni anaawe. (Yobi 14:14, 15; Yohani 5:28, 29) Muchu awiiyeviha onnasuwela wi  “Muluku onamuthoriha itxhu sothene nnerahu, saphama ni sonanara.” (Eklesiyaste 12:14) Yehova onnathokororya ichu seiyo nihinasuwelaahu. Mwawiihiiha, wiiyeviha onnanikhapelela ohiyeleela nroromelo nahu mwa Yehova.

10, 11. (1) Mikhalelo taani akhweya sini seehe ekhaikhai ahu? (2) Mmikhalelo taani wiiyeviha oneeraaya onikhapelele?

¹⁰ Muni moone hai wakhala wi atokweene aapaka yoolakelela yeeyo muhiniiwexexaanyu naari muhineemereryaanyu? Ntoko yootakiherya, tiheeni munahaalaanyu weera wakhala wi nyuwaano naari muchu mukina munamusivelaanyu ooyeleela murici mmuteko wa Yehova? Hanka waakhanle wi oothelana anyu, mwaninyu mwaamulopwana naari mwamuthiyana, naari nthamwene anyu avamurimani ohiikariwa mmulokoni nave muhineemererya ni yoolakelela ya atokweene? Tiheeni munahaalaanyu weera wakhala wi munneemererya wi atokweene aahesa wooniherya ikharari wa muchu yoowo ochenke? Saweereya seiya sinanwerya weeha nroromelo nahu wa Yehova ni mukhalelo owo onarehereryeiye muloko mmahiku ahu. Wiiyeviha oni wookhaviheryeni hai wakhala wi moohoolela mikhalelo ntoko seiya? Hankooni nthokororye mikhalelo miili.

¹¹ Woopacerya, wakhala wi ninniiyeviha, nnahaala weemererya wi hansuwenle mwaha woothene. Naamwi nuupuwelaka wi noosuwela soothene inavolowela mwaha, pahiru Yehova tonawerya woona murima wa muchu. (1 Samuwele 16:7) Vaavaa nnuupuwelaahu sa yeela, mwawiiyeviha nnahaala osuwela wi nookhalano okotakota nave onnachuneya otoroka muupuwelo ahu. Wanaawiili, wakhala wi nohoona naari noheereliwa echu yoohookololowa, wiiyeviha onahaala onikhaviherya okhala awiiwelela ni oopisa murima ni owehererya wi Yehova ookolole mwaha. Piipiliya oni: “Nto kosuwelatho wi yole onamwiwelela Muluku onnawerya sothene.” Piipiliya tho onnaloca: “Nto amutakhali hephur’etxhu. Ekumi aya wakuva ovira.” (Eklesiyaste 8:12, 13) Wakhala wi nootitelela okhala awiiyeviha, nnahaala ophura ophitaanyerya oothene yaale avoloweliwe.—Mwaalakhanye 1 Pedro 5:5.

12. Yaweereya taani nnahaalaahu othokororya hiihaano, nave ntakhara heeni?

¹² Akristu oopacerya o Antiyokeya o Siriya yaahihoolela mukhalelo yoowo wenhe wiiyeviha waya ni olevelela. Hankooni nthokororye yaweereya yeeyo nave nipharihele wi naalikhele moonelo ahu vooloca sa olevelela. Eyo enamunikhaviherya wiiwexexa ntakhara heeni Yehova onnawerya waapharihela achu oohiphaameya ahinanarinhe malakiheryo awe.

13, 14. Mirici taani murummwa Petro aareiyeno, nave oonihenrye hai wi aari oolipa murima?

¹³ Murummwa Petro aari mutokweene a muloko yoowo Akristu oopacerya yaamusuwenlaaya phaama. Owo aari nthamwene a Yesu nave aahivahiwa miteko  sookhweleya. (Mateu 16:19) Ntoko yootakiherya, mu eyaakha ya 36, Petro aahirummwa wi amulaleerye Korneliyu ni oothene a veechokoni vawe. Ntakhara heeni eyo yaaryaaya echu yavameekhaaya? Nthowa nawi Korneliyu haari Muyuta; owo hiineliwe. Vaavaa Korneliyu ni oothene a veechokoni vawe yaakhenlaaya munepa waweela, Petro aahoona wi awo yaaphwanela opatisiwa ntoko Akristu. Owo aaloca: “Atxhu ala àhakhela Munepa Wawela ntoko hiyo. Tani onawerya wakhotxiherya opatisiwa ni mahi?”—Saweriwa T’arummwa 10:47.

¹⁴ Mu eyaakha ya 49, arummwa ni atokweene o Yerusalemu yaahithukumana wi elakelele waakhanle wi Akristu yahaari Ayuta yaanaphwanela wiineliwa. Va muthukumano yoowo, Petro moolipa murima aahiwuupuxerya anna wi owo aahiwoona achu yahiineliwe yaakhelaka munepa waweela. Yaweereya yeela ya Petro, yaakhavihenrye nikhuuru noolamulela opaka yoolakelela. (Saweriwa T’arummwa 15:6-11, 13, 14, 28, 29) Akristu yaari Ayuta ni ale yahaari Ayuta, yaahithamalela olipa murima Petro aareiyeno oloca ichu seeparipari. Akhweya waari wookhweya wa Akristu yaale oopacerya omuroromela mulopwana yoola a nroromelo ni awiichwelavo!—Ahebri 13:7.

15. Yoohesa taani Petro aapankeiye vaavaa aareiye o Antiyokeya o Siriya? (Moone eruku yoopacerya.)

¹⁵ Vaavaa yaamalinhaaya muthukumano o Yerusalemu, mwawaakuveya Petro aayawo o Antiyokeya o Siriya. Ari weiwo, owo aahimaliha elukuluku ni anna yahaari Ayuta. Nnanwerya waanyiherya mukhalelo awo yaasiveliwaaya ohuserya orweela wa masuwelelo ni yaweereya ya Petro. Nyenya, awo yaahikhala ootikhiniheya ni oosooseya murima vaava Petro aahiyerenreiye olya ni yaawo. Meerelo a Petro yaahaavolowela Akristu yaari Ayuta weerano emohamoha, ophitaanyerya Parnapa. Ntakhara heeni mutokweene yoola awiichwelavo Eekristu aapankeiye yoohesa yeela etokotoko, yeeyo yahaala okawanya muloko? Echu taani yookhweleyaxa nnahuseryaahu orweela wa yoohesa ya Petro yeeyo eni enikhaviherye wakhala wi noosooseya ni masu naari saweera sa mutokweene?

16. Petro ookololiwe hai, nave makoho taani anakhumelela?

¹⁶ Mwaalakhanye Galasya 2:11-14. Petro aanawoova akhwaawe. (Masiposipo 29:25) Petro aanasuwela mukhalelo Yehova aawooneiye achu yahaari Ayuta. Naamwi hiiha, owo anoova wi Akristu yaari Ayuta yaawo yaaya oxekurya o Yerusalemu, hiyaahaala osiveliwa omoona okhalaka vamoha ni Akristu yahaari Ayuta. Murummwa Paulo aahimuleela Petro wi aari nawiisootherye. Ntakhara heeni? Nthowa nawi Paulo aahinwiriyana Petro awaakihaka achu yahaari Ayuta va muthukumano weeriwe o Yerusalemu mu eyaakha ya 49. (Saweriwa T’arummwa 15:12; Galasya 2:13) Mano, Akristu yahaari Ayuta yaawo Petro aaphunceiye yoonne hai? Apwanne yaahaala  okwaculeya? Apwanne Petro aahiyeleela mirici sawe nthowa na yoohesa awe?

17. Petro aaphunre hai olevelela wa Yehova?

¹⁷ Petro aari awiiyeviha nave aaheemererya olaka wa Paulo. Soorempwa hasinaloca wi Petro aahiyeleela mirici sawe. Chiryene, ohoolo waya aahiveereliwa orepa ikaarata piili seiyo sinapaka makupa a Piipiliya. Mu ekaarata awe yanaawiili, owo aaphiyerya omuromola Paulo ntoko “munnihu òkhweleya.” (2 Pedro 3:15) Yoohesa ya Petro akhweya yaahiwiicela Akristu yahaari Ayuta. Nyenya, Yesu, yoowo ori muru wa muloko, aahititelela ompharihela. (Éfeso 1:22) Anna ni arokora mmulokoni yaahikhalano ekari ya omutakiherya Yesu ni Tiithi awe moorweela wa omulevelela Petro. Mwawooneya, haavo aakwaculen’ye moorweela wa yoohesa ya muchu oohiphaameya.

18. Elukuluku taani onachuneyaaya wi ntakiherye ekhaikhai ya Yehova?

¹⁸ Mmuloko woopacerya Weekristu, haarimo mutokweene oophaameya, nave haamo mutokweene oophaameya mmuloko Weekristu mmahiku ahu. Piipiliya oni: “Othene [ninnahesa] va itchu sinchipale.” (Yakobo 3:2, Nlakano Nahihano) Ela ti yookhweya osuwela, nyenya nnahaala woona hai wakhala wi munna oonilocela echu yoonanara? Nnahaala otakiherya ekhaikhai ya Yehova? Ntoko yootakiherya, muni moone hai wakhala wi mutokweene ooloca echu enakhala wi ti yoonanara? Munahaala okwaculeya wakhala wi mutokweene moohupuwelela ooloca echu eni ehoosivenleeni naari ewiiceleeni? Ohiya waakuvela wuupuwela wi munna haaphwanela okhala mutokweene, apwanne moopisa murima munahaala onweherya Yesu, yoowo ori muru wa muloko? Ohiya oteteiwa ni yoohesa, munahaala wuupuwelela iyaakha munna owo omalinheiye arumeelaka moororomeleya? Wakhala wi munna yoowo oochekenleni onnatitelela orumeela ntoko mutokweene naari wi ohaakhela mirici mikina, munahaala ohakalala? Wakhala wi muri oorehererya olevelela, munnooniherya wi munnatakiherya ekhaikhai ya Yehova.—Mwaalakhanye Mateu 6:14, 15.

19. Tiheeni nnaphwanelaahu olakelela weera?

¹⁹ Woona wi ninnasivela ekhaikhai, ninnawehererya nihiku nenlo Yehova oneereiye amalihe mwawaakhwanela ohookololowa woothene onatannyiwa ni Satana vamoha ni elapo awe. (Isaiya 65:17) Ophiyerya elukuluku yeeyo, vaavaa nnereliwaahu echu yoohookololowa, hankooni mwawiiyeviha neemererye wi hinsuwenle mwaha woothene nave naalevelele yaale ananchekela. Neerano hiiha, nnahaala otakiherya moonelo weekhaikhai wa Yehova.