1, 2. (1) Elifase ni Piltate yaalonce wi Muluku onoona hai muteko ahu? (2) Tiheeni Yehova olonceiye sa yeeyo?

IYAAKHA sincipale muculi, alopwana araru yaahiloca ni kapuro oororomeleya a Muluku nsina nawe Yobi. Mulopwana mmoha iichaniwa Elifase o Temani, aahimukoha Yobi makoho oochuneya: “Ti wi mutxhu onnawerya omukhaviherya Muluku? Òsuwela onìkhaliha mwanene pahi. Muluku onnathokororya orèra murima wa mutxhu? Nari onaphurani ni makhalelo anyu awokololowa?” (Yobi 22:1-3) Mwawooneya, Elifase uupuwela wi naakhulo naari hooye. Mulopwana mukina, Piltati o Suwa, voocharela aahaaceererya wi hori wooweryeya wa achu okhala awookololowa vamiithoni va Muluku.—Mwaalakhanye Yobi 25:4.

² Elifase ni Piltati yaahimweeriha Yobi woona wiilipiserya wawe omurumeela Yehova ohikhala echu yoophwanelela. Alopwana yaale yaachuna wi Yobi eemererye wi hiyaano hinaano esisapo wa Muluku opwaha muchipo, muuku, naari mwaasiichu. (Yobi 4:19; 25:6) Apwanne yaalonce yeeyo nthowa nawi  yaari awiiyeviha? (Yobi 22:29) Eparipari wi Yehova mutokweene oopwahasa nave hiyaano nri ooyevasa moohiyana ni yoowo. Wakhala wi nri vasulu va mwaako naari nri mu nceeke nnaweha orweela vaxanelani, nnahaala woona wi nootepa oyeva nave wi tahi neechweenevo. Nyenya apwanne Yehova onoona hiiha vooloca sa wiilipiserya wahu omurumeela ni muteko wakuru nnapakaahu ntakhara Omwene? Hooye! Yehova aaloca ni Elifase, Piltate, ni mulopwana aneeraru Safari, wi yeeyo yaaloncaaya waari wootha. Voocharela Muluku aari oohakalala ni Yobi nave aamwiichana “mulapeli aka.” (Yobi 42:7, 8) Mwawiihiiha, ninnaroromela wi achu oohiphaameya ananwerya “omukhaviherya Muluku.”

3. Tiheeni Elihu olonceiye sa wiilipiserya wahu omurumeela Yehova? Eyo enataphulela eheeni?

³ Mmiravo iichaniwa Elihu aahiwiriyana ovaanela waarivo variyari va Yobi ni alopwana araru. Vaavaa yaamalinhaaya, Elihu aaloca ni Yobi vooloca sa Yehova: “Wari awookololowa, honanvah’etxhu ya mmatani mwà.” (Yobi 35:7) Apwanne Elihu eererya oloca wi wiilipiserya wahu omurumeela Muluku tahi echweenevo? Hooye. Yehova haamulanke Elihu, ntoko enreiye ni alopwana akina. Elihu aalonce mwaha woohiyana. Owo aalonce wi Yehova hanachuna wi nimulapeleke. Yehova tawaakhwanela. Hiyaavovo echu nneeraahu nipake eni emweerihe okhala ooreela naari okhala oolipa. Mweeparipari, mavyakelo nryaahuno anarweela wa Muluku, nave owo onnoona mukhalelo nnapharihelaahu.

4. Yehova onoona hai vaavaa nnooniheryaahu ikharari wa akina?

⁴ Vaavaa nnooniheryaahu osivela woororomeleya wa yaale anamulapela Yehova, owo onoona saweera seiyo ntoko nnampakela yoowo. Ninnaalakhanya mu Masiposipo 19:17: “Onammorela ikharari mutxhu òhawa, onnàpoleya Apwiya; awo anammutxhuwela.” Mmahiku ahu, Yehova onnoona ekwaha eri yoothene nnooniheryaahu ikharari wa akina. Nave naamwi ari Mpatusa a elapo yoothene, Yehova onnoona saweera sahu ntoko nnampoleya yoowo, nave owo onnanchuwela ni soovaha saphaama. Yesu, Mwaana a Muluku, aahiloca yeeyo.—Mwaalakhanye Luka 14:13, 14.

5. Makoho taani nnahaalaahu othokororya hiihaano?

⁵ Mu ilukuluku sakhalai, Yehova aahinwopa mulipa a miririmo Isaiya wi amurumeele mmukhalelo wavameekhaaya. (Isaiya 6:8-10) Isaiya mwawiiveleela aaheemererya nwopelo nave aahiloca: “Miyano kiri okhalene! Mukirume!” Olelotho, Yehova onnaavaha akapuro awe oororomeleya ekari ya opaka makupa mmuteko awe. Macikhwi a akapuro a Yehova annooniherya wi aakhalano moonelo mmohamoha ntoko wa Isaiya. Anniiveleela weemererya miwopelo wi emurumeele Yehova mmikhalelo ni mmapuro oohiyanahiyana ni ohooseya ni makacamiho. Nyenya muchu mukina akhweya ahaala  oloca: ‘Kinnathamalela ekari ya wiiveleela mmuteko wa Yehova, nyenya apwanne yeeyo kinapakaaka ti yookhweleya? Naamwi kihirivo, apwanne muteko wa Yehova honi opakeye?’ Montoko wiisoona mmukhalelo yoola? Othokororya yeeyo yeeren’ye khalai ni akapuro a Yehova, Tepora ni Paraki, enahaala onikhaviherya waakhula makoho yaala.

6. Ntakhara heeni waakhalaaya wi akhoco a Yapini yaahaala waavootha Aisarayeli?

⁶ Paraki aari mukhoco a Aisarayeli, nave Tepora aari mulipa a miririmu. Mu iyaakha 20 Aisarayeli ‘yanàhosiwa vatokovene’ ni mwene o Kanani iichaniwa Yapini. Anakhoco a Yapini yaari oowali ni oohoosa nave yaanaweeriha Aisarayeli yaakhala mu ipooma okhala awoova ophiyerya okhuma mu ichoko saya. Akhoco a Yapini yaahikhalano ikaaro sa ekhoco 900 seiyo saarino mithipo, nyenya Aisarayeli hiyaarino ikaruma sa owanano naari sawiisaakihano.—Amuthoriha 4:1-3, 13; 5:6-8.

7, 8. (1) Tiheeni Yehova aamulenleiye Paraki? (2) Aisarayeli yaawenrye hai waavootha anakhoco a Yapini? (Moone eruku yoopacerya.)

⁷ Elikanyihiwaka ni akhoco a Yapini, Aisarayeli yaari ooceecheya ni ookhweya waavootha. Nyenya Yehova aahimulamulela Paraki moorweela wa mulipa a miririmo Tepora: “Oye o mwako Tabor; wàkuse alopwana matxikhwi khumi a nloko na Neftali ni Zabuloni. Waphiya o muhitxeni Kisoni, kinamoruhela Sísera, mutokhwene a akhotxo o Yabini ni ikhàro vamoha ni akhotxo awe nave kinamwavelèla mmatani mwà.”—Amuthoriha 4:4-7.

⁸ Yooveka ya Paraki yaaheereya nave alopwana macikhwi khumi yaahithukumana o Mwaako Tapor. Voocharela Paraki ni alopwana awe yaaya owana ekhoco ni amwiicani va nipuro niichaniwa Tanaki. (Mwaalakhanye Amuthoriha 4:14-16.) Apwanne Yehova aahaakhaviherya Aisarayeli? Chiryene. Mootutusa yaahirupa epula ya maralala nave nipuro nawuuma waawaniwavo ekhoco naathatuwa ncokwa. Eyo yaahaavaha ekari Aisarayeli. Paraki aahiwiikara anakhoco a Sisera mastatiya 24, ophiyerya nipuro niichaniwa Haroseti. Vaavaa Sisera aachaweiye, ekaaro awe yaahicora va ncokwa. Owo aahikhuma mukaaroni mwawe, nave achawela o Sananim, waacamela o Ketesi. Weiwo Sisera aahiipitha mmusakalani mwa muthiyana iichaniwa Yayeli. Sisera aatepa okutuphuwa nave aarupelavo. Vaavaa aarumpeiye, Yayeli moolipa murima aamwiipha. (Amuthoriha 4:17-21) Yehova aaheeriha wi Aisarayeli yaavoothe amwiicani aya oothene! * (Moone masu a vathi.)

9. Tiheeni nnahuseryaahu mu Amuthoriha 5:20, 21 vooloca sa ekhoco ni Sisera?

⁹ Ninnahuserya sincipale vooloca sa saweereya inatharihiwa mu Amuthoriha ecima 4 moorweela wa waalakhanya ecima enacharela. Amuthoriha 5:20, 21 onnanleela: “Wirimu itheneri sàwana ekhotxo, musulusulu itheneri sàwana ni Sísera. Muhitxe Kisoni wohàkusa ni mahi aya.” Apwanne eyo enataphulela wi ankeelo yaahaakhaviherya Aisarayeli variyari va ekhoco, naari eyo enataphulela wi yaarumpe epula yootikhiniha?  Piipiliya hanathariha yeeyo. Nyenya enakhala wi ti yoophwanelela wuupuwela wi Yehova aahirupiha epula wi aavuluse achu awe mu nipuro ni elukuluku yoophwanelela, mwawiihiiha ikaaro 900 sa ekhoco hisaawerya weeca mookhweya. Mu Amuthoriha 4:14, 15, nohaalakhanya ikwaha chaaru wi Yehova taarino ophwanelela wa ovootha wa Aisarayeli. Awiiveleela macikhwi khumi a Aisarayeli haavo aarino ophwanelela wa ovootha.

10, 11. “Merozi” yaari eheeni? Ntakhara heeni yuulumeliwaaya?

¹⁰ Vano hankooni naalikhele echu yookhweleyaxa. Aisarayeli emanle ovootha, Tepora ni Paraki yaahiimwiipela Yehova moohakalala. Awo yaahiipa: “Munkelo a Apwiya ahimulumela Merozi, n’wulumele, n’wulumele atxhu awe! Ntakhara hiyakhavihenrye Apwiya, wakhaviherya Apwiya ni akhotxo aya.”—Amuthoriha 5:23.

¹¹ Merosi yaari eheeni? Mweeparipari hinnasuwela. Nyenya wuulumeliwa wa Merosi waahaakhwanela phaama ophiyerya ocakanela. Akhweya Merosi yaari epooma yeeyo achu aweiwo yahiivelenlaaya omukhaviherya Paraki mu ekhoco. Woona wi yaahiiveleela alopwana macikhwi khumi wi ewanihe ekhoco ni Akanani, achu o Merosi akhweya yaahiiwa nwopelo wa Paraki. Naari Merosi yaari epooma weiwo Sisera aachawenleiyewo eereryaka omuchawa Paraki. Akhweya achu o Merosi yaakhalano ekari ya omphara Sisera, nyenya hiyenreno. Nkaanyiheryani emoonaka mukhoco oowali achawaka wi akhapelele okumi awe aviraka mu iphiro saya! Awo yaanwerya opaka echu vyakala wi ekhaviherye yookhwela ya Yehova. Waakhanle wi aheerano, owo aahaala waavaha phatamari. Awo yaakhalano ekari ya opaka echu vyakala ntakhara Yehova, nyenya hiyenreno. Enakhala wi achu o Merosi yaari oohiyana ni Yayeli, yoowo eenrevo echu moolipa murima.—Amuthoriha 5:24-27.

12. Moonelo taani woohiyana onaphwanyeya mu Amuthoriha 5:9, 10? Moonelo yoowo onahaala onivolowela hai?

¹² Mu Amuthoriha 5:9, 10, nohoona wi moonelo wa awiiveleela macikhwi khumi waari woohiyana ni moonelo wa yaale yahiivelenle. Tepora ni Paraki yahaacicimiha ‘asitokhwene a Isarayeli, yale mwa nloko yilenvé.’ Awo yaari oohiyana ni yaale ‘yàwela aphuru awèla’ yaawo yoona wi yaari ookhweleyaxa opwaha muteko wawiiveleela. Achu yaawo analociwa ntoko ‘anakirathela ikuwo sowalamela’ nave ari “mmukwahani,” epuhaka okumi woohakalaliha. Moohiyana, awiiveleela yaahiivaha oya owaniha ni Paraki mmiyaako sa Tapor ni mpopa wa ncokwa wa Kisoni. Yaale yaachuna okumi wookhweya yaaleeliwa wi yaaphwanela wuupuwela mukhalelo aya. Awo yaaphwanela okhalano ephoole ni wuupuwelela vooloca sa ikari yaayelenlaaya moorweela wa ohiiveleela mmuteko wa Yehova. Olelo, nnaphwanelatho waalikhela moonelo ahu vooloca sa omulapela Muluku.

13. Moonelo wa mahimo a Rupeni, Tani ni Aseri waahiyanne hai ni wa Sepuloni ni Nafetali?

¹³ Awiiveleela macikhwi khumi yaakhalano  ekari ya woona mukhataaya mukhalelo Yehova eenreiye ntoko Mulamuleli a Elapo Yoothene. Akhweya awo yaanaaleela akina sa yeeyo vaavaa yaalocaaya sa ‘ovòtha Apwiya yonin’haya.’ (Amuthoriha 5:11) Moohiyana, mahimo a Rupeni, Tani, ni Aseri yaanakhapela vancipale muhakhu aya, hiiha ntoko ipucepuche, apophoro ni mapuro a apophoro, ohiya okhaviherya muteko wa Yehova. (Amuthoriha 5:15-17) Nave tahi wi mahimo oothene yaari ntoko yaawo. Nihimo na Sepuloni ni Nafetali ‘ti maloko yivahenrye okhwa’ wi emukhaviherye Tepora ni Paraki. (Amuthoriha 5:18) Nnanwerya ohuserya ichu sookhweleya orweela wa moonelo yoola woohiyana vooloca sa muteko wawiiveleela.

14. Nni nooniherye hai wi ninnakhaviherya olamulelo wa Yehova mmahiku ahu?

¹⁴ Mmahiku ahu, hinnakhaviherya olamulelo wa Yehova moorweela wa owaniha. Opwaha yeeyo, ninnakhaviherya moorweela wa olaleerya moolipa murima ni mwamvai. Opwaha khalai, annachuneya awiiveleela ntakhara muteko wa Yehova. Macikhwi a anna ni arokora, ni amiravo anniiveleela mmikhalelo soohiyanahiyana sa muteko wa elukuluku yoothene. Ntoko yootakiherya, ancipale anarumeela ntoko mapiyoneero, Mapetelita, oteka Ipa sa Omwene, ni wiiveleela mu mithukumano sa ekulucu ni sa miceche. Atokweene akina annalapa mu Makhuuru Aniiwanana ni Mapuro Ookumi ni orehererya mithukumano sa miceche. Nnaphwanela ororomela wi Yehova onnathamalela wiiveleela wahu omurumeela mmuteko vyakala onachuneyawo nikhaviheryo, nave owo hani acuwale muteko ahu.—Ahebri 6:10.

15. Nni nsuwele hai wi hin’yelenle mvai ahu mmuteko wa Yehova?

¹⁵ Ninnaphwanela waalikhela moonelo ahu  vooloca sa muteko wa wiiveleela. Niikohe: ‘Apwanne kinneemererya wi akina elape muteko wawaaca? Apwanne kinaweiwa pahiru ni wiithukumanyerya ichu soomwiilini opwaha omurumeela Yehova? Naari kinnatakiherya nroromelo ni olipa murima wa Paraki, Tepora ni Yayeli, vamoha ni awiiveleela macikhwi khumi moorweela wa opharihela muhakhu vyakala kiryaakano wi kimurumeele Yehova? Apwanne kinnuupuwela othaamela elapo naari epooma ekina ni yoolakelela ya okhalano ikhorowa sincipale ni opuha okumi waphaama? Waari hiiha, kinnamveka Yehova vooloca sa mukhalelo othaama weiwo oneeraaya ovolowele emusi aka ni muloko?’ * (Moone masu a vathi.)

16. Naamwi Yehova arino ichu soothene, tiheeni nnaweryaahu omvaha?

¹⁶ Yehova oonivaha ncicimiho noohaalakhanyeya moorweela wa oneemererya okhaviherya olamulelo awe. Ovinyerya elukuluku ya Atamu ni Eva, Musaserya onachuna wi achu epake makupa awe mu omurukunuwela Yehova. Nyenya vaavaa nnakhaviheryaahu olamulelo wa Yehova, mwawooneya ninnamooniherya Satana makupa taani nryaahu. Nroromelo nahu ni ororomeleya wahu sinnanceenyerya wiiveleela mmuteko wa Yehova, nave eyo ennamuhakalaliha vancipale. (Masiposipo  23:15, 16) Muluku ahu onanwerya opharihela ororomeleya, ni wiiwelela wahu wi aakhule onyemula wa Satana. (Masiposipo  27:11) Wiiwelela wahu echu yeeyo nneeraahu nimvahe Yehova woona wi ti wasisapo nave onnamuruuhela ohakalala wawaaca.

17. Amuthoriha 5:31 onanihusiha eheeni vooloca sa yeeyo enahaala weereya muhoolo?

¹⁷ Moohilekela muchu ti muchu veelaponi onahaala ochuna olamulelo wa Yehova opwaha mukina. Ninnaweherya elukuluku yeeyo! Nnahaala woona ntoko Tepora ni Paraki, yaawo yiipale: “Pwiya, okhwa wa amwitxana okhale hiha! Yale anokhwelani ekhale ntoko nsuwa, nakhumaka ni wàrya waya wothene.” (Amuthoriha 5:31) Eyo enahaala weereya elukuluku yeeyo Yehova oneereiye atolose elapo yeela yoonanara ya Satana. Vaavaa ekhoco ya Armaketo eneeraaya epacerye, Yehova hanahaala waachuna achu awiiveleela wi yaatolose amwiicani. Opwaha yeeyo, nnahaala ‘wemela’ ni ‘owona Apwiya onivulusa waya.’ (2 Matharihelo 20:17) Mu elukuluku yeela, nookhalano ikari sa okhaviherya olamulelo wa Yehova moolipa murima ni mwamvai.

18. Muteko anyu wa wiiveleela oni waakhaviherye hai akina?

¹⁸ Tepora ni Paraki yaahipacerya ovootha waya emwiipelaka moohakalala Yehova ohiya achu. Awo yaahiipa: “Nloko nàhivaherya owana ekhotxo, wa nthowa na yeyo mwatxitximihe Apwiya!” (Amuthoriha 5:1, 2) Moolikana, vaavaa nnamurumeelaahu Yehova mmuteko vyakala onachuneyawo nikhaviheryo, akina tho anahaala oceenyeryeya ‘watxitximiha Apwiya!’