MWAHA WOOHUSERYA 43
NCIPO 90 Nlipixaneke Mukina ni Mukhwaawe
Muni Mvoothe Hai Minikwa?
“Mwaalikhele ichu soothene.”—1 ATE. 5:21.
IPONTU SA VASULU
Mukhalelo nnahaalaahu omaliha minikwa seiho inahaala ovolowela muteko ahu wa Yehova.
1-2. (1) Minikwa taani ikina alapeli a Yehova anahaalaaya ohoolela? (2) Tiheeni nnahaalaahu othokororya mmwaha yoola?
ACHU a iyaakha soothene ikwaha ikina annakhwa minikwa. a Ntoko yootakiherya, mwaanyiherye sa mwali yoowo ori Namoona oniikoha waakhanle wi Yehova onnampwacha yoowo chiryeene. Owo onanwerya woona ohikhala wookhapeleleya wi apatisiwe. Naari mmuupuwele munna yoowo elukuluku aaryeiye mmiravo, aathanlile okuha muteko wa Yehova mu nipuro noopacerya mu okumi awe. Vaavaa owo oryeiye mulopwana mutokweene, orino pahiru ikhorowa wi avakulelekeno emusi we, mwa yeeyo onanwerya okhalano soolakelela ikina. Mwaanyiherye sa murokora awuuluvala yoowo ohirino ikuru sincipale. Owo onanwerya okhala ooceecheya nthowa nawi hanawerya opaka sincipale ntoko eereiye khalai. Apwanne nyuwaano mohintoko wiipakela makoho ntoko ala: ‘Apwanne Yehova onnakoona? Wiilipixerya woothene kipankaaka ntakhara Yehova wookhalano mphurelo? Nlelo kinnaphariheleya wa Yehova?’
2 Nahikhalano maakhulo a makoho yaala, awo ananwerya onivolowela moonanara mu omulapela wahu. Mmwaha yoola, nnahaala woona mukhalelo Piipiliya onahaaleiye onikhaviherya wakhala wi ninnuupuwela wi (1) Yehova hananipwacha, (2) wi soolakela sahu sakhalai hisaari saphaama, naari (3) waakhanle wi na achu oochuneya wa Yehova.
MUNI MVOOTHE HAI MINIKWA SANYU?
3. Tuuvi ori mukhalelo wa ovootha minikwa sahu?
3 Mukhalelo mmoha wa omaliha minikwa sahu ori opaka otholathola Masu a Muluku wi niphwanye maakhulo a makoho ahu. Neerano hiiha, nnahaala olipiheya, ni wunnuwa omunepani nave tho nnamukhala ooreheryeya phaama wi ‘ntitelele wiithipela mu nroromelo.’—1 Ako. 16:13.
4. Ti mwawiihai ‘nnaalikhelaahu ichu soothene’? (1 Atesalonika 5:21)
4 Mwaalakhanye 1 Atesalonika 5:21. Moone wi Piipiliya onnanceenyerya wi ‘naalikhele ichu soothene.’ Nni neereno hai yeeyo? Wakhala wi hannalekecheya ni echu vyakala, nnaphwanela otholathola vooloca sa echu yeeyo Piipiliya onaloceiye. Ntoko yootakiherya, muthokororye vooloca sa mmiravo yoowo oniikoha waakhanle wi vamiithoni va Muluku ookhalano esisapo. Wakhala wi mmiravo onniikoha hiihaa eyo enataphulela wi Yehova hanampwacha yoowo? Hooye, owo onaphwanela ‘waalikhela ichu soothene’ akhalakano muupuwelo wa Yehova vooloca sa mwaha yoowo.
5. Ti mwawiihai ‘nniiwaahu’ maakhulo a Yehova wa makoho ahu?
5 Vaavaa nnaalakhanyaahu Masu a Muluku, ‘ninnamwiiwa’ Yehova alocaka ni hiyo. Nyenya wi nikhaleno muupuwelo awe vooloca sa nikoho nooluluwanya onnachuneya wiilipixerya mmakupa ahu. Mu omwaalakhanya wahu Piipiliya nnaphwanela otikitheryeya wa mwaha yoowo onanivolowela. Nnanwerya opaka otholathola vooloca sa mwaha yoowo, mu soolaleeryiwa seiho marehereryo a Yehova anavahereryaaya. (Mas. 2:3-6) Nnaphwanela ovekela wa Yehova wi anikhaviherye mu otholathola wahu wi niphwanye miyuupuwelo sawe vooloca sa nikoho nahu. Mwawiihiiha nnanwerya waavya soorepa sa Mpiipiliyani ni sooleeliherya soophara muteko seiho sinaphariheleya wa hiyo. Nave tho nnanwerya ophuravo nthokororyaka saweereya sa Mpiipiliyani sa yaawo yaahoolenle mukhalelo mmohamoha woolikana.
6. Timwawiihai mithukumano sinanikhaviheryaaya ovootha minikwa sahu?
6 Nave tho ninnanwriyana Yehova alocaka ni hiyaano mmithukumano sahu. Wakhala wi ninnaphiya mmithukumano moohihiyererya, nnanwerya owiriyana echu mmwaha, naari moorweela wa naakhulo nenlo nnahaala okhala echu yeeyo naachunaahu wi niwerye omaliha minikwa sahu. (Mas. 27:17) Hankooni hiihaano noone mukhalelo wa ovootha minikwa mikina sooluluwanya.
OKHWA MINIKWA WAAKHANLE WI YEHOVA ONNOOPWACHAANI
7. Nikoho taani akina aneeraaya yiipakele?
7 Nyuwaano mohintoko wiikoha: ‘Apwanne chiryene Yehova onnakoona?’ Wakhala wi muniisoona wi tahi mwa muchu oochuneya, nyuwaano munanwerya wuupuwela wi tahi wooweryeya wa nyuwo wi mukhale nthamwene a Mpatuxa a ichu soothene. Akhweya muupuwelo mmohamoha waahereya ni Mwene Tavite. Owo oona okhala yootikhiniha wi Yehova aapwacheke achu, owo aahiloca: “Khwoo Yehova, muchu tiheeni wi munamvarerya, mwaana a muchu tiheeni wi munanwiriyana moopwacha?” (Sal. 144:3) Ti woowi muneeraanyu mphwanye naakhulo na nikoho nenla?
8. Mwawiiwanana ni 1 Samuwele 16:6, 7, 10-12, tiheeni Yehova onooneiye wa achu?
8 Orweela Mpiipiliyani, ninnahuserya wi Yehova onnawiiwexexa yaale aniisoona ohikhalano esisapo wa akina. Ntoko yootakiherya, Yehova aahimurumiha Samuwele vaate va Yese wi amuthanle mmoha a anamwene awe ntoko mwene a muhoolo a Isareyeli. Yese aahiwiichana anamwane awe athanu napiili mwa athanu nararu aaryeiyeno wi ekumane ni Samuwele, haamphitaanyenryevo Tavite mwaana amukhaanixa. b Nyenya, aari Tavite yoowo Yehova aamuthanlileiye. (Mwaalakhanye 1 Samuwele 16:6, 7, 10-12.) Yehova aahoona mukhalelo Tavite aaryeiye mpuwa mwawe—mmiravo yoowo aacicimiha ichu soomunepani.
9. Ntakhara heeni munanwerya ororomela wi Yehova onnoopwachaani? (Moone tho eruku.)
9 Muupuwele mukhalelo Yehova oonihenryeiye wi onnawiiwexexaani. Owo onnavahererya malakiheryo aphaamaxa wa mikhalelo sanyu sooluluwanya. (Sal. 32:8) Apwanne anii eereno hai aneera oosuwenleeni phaama? (Sal. 139:1) Wakhala wi nyuwaano munnapharihela malakiheryo a Yehova ni woona mukhalelo owo onookhaviheryeiyeni, nyuwaano munahaala olekecheya wi Yehova onnoopwachaani. (1 Math. 28:9; Saw. 17:26, 27) Yehova onnoona wiilipixerya wanyu. Owo onnoona mikhalelo sanyu sa mpuwa nave onnaceenyeryeya oviiha ntata nawe ntakhara nyuwo. (Yer. 17:10) Owo onachuna wi nyuwaano mwaakhulele yoovaha awe ya okhala Nthamwene awe.—1 Yoh. 4:19.
“Wakhala wi woomwaavya [Yehova], owo onahaala wiisooneiha waweyo.”—1 Math. 28:9 (Moone eparakrafu 9) c
VAAVAA MUNAKHWAANYU MINIKWA WAAKHANLE WI SOOLAKELELA SANYU SAKHALAI SAARI SAPHAAMA
10. Vaavaa nnuupuwelaahu soolakelela sahu sakhalai, makoho taani eni ekhumelele?
10 Vakina vaya, akina ananwerya wuupuwela soolakelela seiho yaapankaaya khalai nave ekhweeke minikwa waakhanle wi yaapaka soolakelela saphaama. Akhweya awo yaahin’ye muteko aya waphaama yoowo waaliva ikhorowa sincipale, naari olakelela ohimpacerya nakoso wi eweryeke opaka sincipale mu omurumeela Yehova. Vano elukuluku yoovira, akhweya iyaakha sincipale. Awo ananwerya owuupuwela achu yaawo yaasuwenlaaya phaama yaapanke soolakelela soohiyana ni sawaya, nave achu yaawo anooneya ntoko wi aakhalano ikhorowa sincipale nave ni ekumi yookhapeleleya. Ntoko yookhumelela, awo ananwerya wiikoha: ‘Apwanne wiilipixerya kipankaaka ntakhara Yehova wookhalano mphurelo? Akhweya wookiyeleeliha ikari ikina?’
11. Tiheeni yaamuukhula namarepa a Salmu 73?
11 Wakhala wi makoho oolikana ennawuukhulaani, muthokororye mukhalelo iisoonneiye namarepa a Salmu 73. Owo aanawoona achu yaawo yaahimurumeela Yehova, eri oohakalala, ooreela nave waakhala ntoko wi hiyaarino makacamiho. (Sal. 73:3-5, 12) Vaavaa ooneeiye wi ichu saanaweecela phaama, owo aahona wi yoothanla awe ya omurumeela Yehova hiyaarino mphurelo. Owo aahikhala “mmakacamiho nihiku noothene” moorweela wa muupuwelo yoowo wooceecheiha. (Sal. 73:13, 14) Owo aavoonthe hai ni miyoonelo seiho soohiphwanelela?
12. Mwawiiwanana ni Salmu 73:16-18, ti mwawiihai namarepa a Salmu aareherenryeiye sawuukhula sawe?
12 Mwaalakhanye Salmu 73:16-18. Namarepa a Salmu aaya mu nipuro noomaaleleya naweela na Yehova. Weiwo, waari wooweryeya wuupuwela moomaaleleya. Owo aahihiyaniha wi, naamwi ekumi ya achu yaale yaari ntoko yookhweya, omwaahiyu aya waari woohilekela. Mwawihiiha, owo haakhanle ooceecheya nave aahilekecheya wi omurumeela wawe Yehova yaari yoolakelela yaphaamaxa. Ntoko yookhumeleela, owo aahilakela otitelela omurumeelaka Yehova.—Sal. 73:23-28.
13. Ti mwawiihai muneeraanyu mphwanye murecele wa munepa wakhala wi munnakhwa minikwa vooloca sa soolakelela sanyu sakhalai? (Moone tho eruku.)
13 Hiiha ntoko namarepa a Salmu, nyuwaano tho munanwerya ovootha miyoonelo soohipwanelela. Mwawiihai? Muupuwele ichu saphaama seiho muryaanyuno—ophitaanyerya mareeliho, weemereryiwa—ni Yehova nave muupuwele wi yaale ahinamurumeela Yehova hanaakhela nikhaviheryo nawe. Wa achu ancipale ahinamurumeela Yehova, okhalano muteko waphaama ni okumi wootaphuwa eri echu yoochuneyaxa wa yaawo, nthowa nawi hanawehererya echu omwaahiyu. Nyenya nyuwaano tahi wi pahiru murino samahala sa Yehova hiihaano, nyenya owo oororomeliha woovahaani ichu sootikhiniha omwaahiyu. (Sal. 145:16) Ohiya yeeyo, muupuwele ela: Apwanne nnanwerya osuwela chiryeene mukhalelo okumi ahu waahaalaaya okhala wakhanle wi noopaka soolakelela soohiyana? Mweeparipari: Yaale anapaka soothanla sinathipeleya mu osivela wa Muluku ni osivela wa mwaacamani, hanayeleelaru yeeyo eri yeeparipari ni yaphaama.
Nwehe ohoolo ntakhara mareeliho yaawo Yehova ororomelinheiye (Moone eparakrafu 13) d
VAAVAA MUNAKHWAANYU MINIKWA WI MUNNAPHARIHELEYA WA YEHOVA
14. Ntakhara heeni akina hiyaano ororomela nave makoho taani enahaala owuukhula?
14 Alapeli akina a Yehova hanawerya opaka sincipale ntoko anachunaaya nthowa nawi ari awuuluvalaxa, annakhalano makacamiho a okumi, wiiceliwa naari orakala. Eyo enanweeriha wiisoona wi tahi asisapo wa Yehova. Awo ananwerya wiikoha: ‘Apwanne nlelo kinnaphariheleya wa Yehova?’
15. Echu taani yaamulekenche mulipa oomurepa Salmu 71?
15 Namarepa a Salmu 71 aahooniherya wuukhuwa omohamoha. Owo aavekela: “Muhikinyanyale vaavaa kinahaalaaka oyeleela ikuru.” (Sal. 71:9, 18) Mwawiihiiha, namarepa a Salmu aahititelela olekecheya wi wakhala wi onnamurumeela moororomeleya Yehova Muluku awe, owo aahaala omuhoolelaka ni omukhaviherya. Ntoko namarepa a Salmu aahusenryeiye, Yehova onnahakalala ni yaale aniilipixerya wi emurumeele Owo, moohipwacha ookotakota waya.—Sal. 37:23-25.
16. Ti mwawiihai awuuluvala anaphariheleyaaya wa Yehova? (Salmu 92:12-15)
16 Waakhanle wi mohuuluvala, mooneke mukhalelo anyu mmoonelo wa Yehova. Owo onanwerya wookhaviheryaani okhumelela phaama omunepani, naamwi nyuwaano nwanihaka ni mukhalelo anyu woomwiilini. (Mwaalakhanye Salmu 92:12-15.) Ohiya otikitheryeya wa yeeyo muhinaweryaanyu opaka, mutikithereyeke wa yeeyo munaweryaanyu opaka. Ntoko yootakiherya, nyuwaano munanwerya waalipiha akina moorweela wa yootakiherya aya yoororomeleya ni nchuno nenlo anooniheryaaya. Nyuwaano munanwerya oloca wa akina mukhalelo Yehova okhavihenreiyeni mu iyaakha sincipale ni wa soororomeliha taani sa Mpiipiliyani seiho nyuwaano munawehereryaanyu waakhwanela muhoolo. Nave muhirwe mukhwe minikwa mukhalelo mavekelo anyu a vamurimani anaakhaviheryaaya akina. (1 Pet. 3:12) Moohipwacha mikhalelo sahu, oothene hiyo nookhalano echu ya omvaha Yehova ni wa akina.
17. Ntakhara heeni nnaphwanelaahu ovootha nchuno na wiilikanyiha ni akina?
17 Wakhala wi nyuwaano munniisoona okhala ooceecheya moorweela wa ohipaka sincipale mmuteko wa Yehova, muroromele wi owo onnavaha esisapo soothene munaweryaanyu waakhwaniherya. Nyuwaano munanwerya okhalano nchuno na olikanyiha yeeyo munapakaanyu ni wa yeeyo akina anapakaaya. Nyenya muheereno yeeyo! Ntakhara heeni? Woona wi Yehova hanapaka olikanyiha yoowo. (Aka. 6:4) Ntoko yootakiherya, Mariya aamvaha Yesu yamahala ya makhurwa awunkhela oowalamela. (Yoh. 12:3-5) Moohiyana, naamukhwele oohaawa aahiveleela mu Empa ya Muluku ikhorowa piili sa esisapo vakhaani. (Luka 21:1-4) Mwawihiiha, Yesu oona samahala soothene ntoko sawooniherya sa nroromelo. Mwawihiiha, muroromele wi Yehova onnoona soothene munapakaanyu nthowa na nroromelo ni osivela muryaanyuno wa yoowo, nave eyo ti yasisapo wa yoowo naamwi nyuwaano moonaka wi ti yavakhaani.
18. Tiheeni enahaala onikhaviherya ovootha minikwa sahu? (Moone tho ekaaxa “ Masu a Yehova Ananwerya Wookhaviheryaani Ovootha Minikwa.”)
18 Ikwaha ikina oothene ahu ninnakhwa minikhwa. Nyenya ntoko nihusenryaahu, Masu oororomeleya a Muluku, Piipiliya, enanwerya onikhaviherya ovootha. Mwawiihiiha, mulape mwakuru wi mmalihe miinikwa sanyu nave muhiye wi ororomela wanyu oraceele wuukhuwa wanyu. Mweeparipari, Yehova onnoosuwelaani nyuwo vameekhiinyu. Owo onnasiveliwa ni wiilipixerya wanyu nave ori oorehereya woochuwelaani. Muroromele wi Yehova onnawoona alapeli awe oothene oororomeleya ntoko oophwanelela wa osivela wawe ni opwacha.
NCIPO 111 Mathowa Ananeeriha Ohakalala
a MASU ATHARIHIWE: Mmwaha yoola, nnathokororya vooloca sa minikwa seiyo inaneeriha okhalano minikwa vooloca sa esisapo ahu wa Yehova naari vooloca sa miruku wa soolakelela seiyo nnapakaahu. Iha tahi minikwa inalociwa Mpiipiliyani seiyo sinahaala wooniherya ohikhalano nroromelo wa Yehova ni soororomeliha sawe.
b Naamwi Piipiliya ahilocaka iyaakha sene seiyo Yehova aamuthanlileiye Tavite, mwaawooneya aari mmiravo.—Mmoone Mulipeleli, 1 a Setempuru a 2011, epaax. 29, epara. 2.
