1-2. Tiheeni yeeren’ye ni oohuserya eeli vaavaa yeecaaya mu ephiro ya Emawu?

 WAARI nihiku na 16 a Nisani eyaakha ya 33 E.K. Oohuserya a Yesu yaari oothanana ni awoova. Apiili a yaawo ennakhuma o Yerusalemu nave enachara ephiro ya Emawu, muceche yoowo orino akilometru 11 ni o Yerusalemu. Alopwana yaala yaari ooceecheya nthowa nawi Yesu mulopwana yoowo awo yaamucharaaya, eera amanle okhwa. Awo yaaweherya wi Mesiya aahaala opaka ichu sootikhiniha wa Ayuta, nyenya vano owo ookhwa. Mwawiihiiha, echu yoohiwehereryeya yaaheereya.

² Mulopwana mmoha onnaaphwanya mphironi. Oohuserya annaloca yoothananiha yeeyo emweerenle Yesu. Mulopwana owo, aahipaceryiha ovaanela yoowo waatoronke okumi aya. “Nave apaceryaka wa Mose ni wa Alipa a Miririmu oothene,” owo onnathariha ntakhara heeni Mesiya aaphwaneleiye ohooxeya ni okhwa. Vaavaa alopwana ooraaru yaaphin’yaaya o Emawu, mulopwana aahiisuwanyeiha wi aari taani—Yesu oviihiwe mookhwani! Pahiru nnanwerya waanyiherya mukhalelo oohuserya yaaryaaya oohakalala osuwela wi Mesiya aari mukumi!—Luka 24:​13-35.

3-4. Tiheeni yeeren’ye ni oohuserya a Yesu, nave tiheeni nnahaalaahu ohuserya mmwaha yoola? (Saweeriwa ti Arummwa 1:3)

³ Yesu aahooneya wa oohuserya awe ikwaha sincipale variyari va mahiku awe ookuchula makhumi maxexe a veelaponi yavathi. (Mwaalakhanye Saweeriwa ti Arummwa 1:3.) Variyari va elukuluku yeela, Yesu aahaalipiha oohuserya awe yaawo yaari oothanana ni awoova, nave awo yaahihakalala nave tho yaari oolipa murima  oya olaleerya ni ohusiha michaka saphaama sa Omwene. a

⁴ Nnanwerya ophura nihuseryaka vooloca sa elukuluku yeela yoohakalaliha mu okumi wa Yesu. Mwaha yoola nnahaala woona mukhalelo Yesu opharihenleiye elukuluku yeela (1) wi aalipihe oohuserya awe, (2) wi aakhaviherye wiiwexexa phaama soorepa, ni (3) wi aavyakihe ntakhara muteko yoowo yaahaalaaya opaka omwaahiyu. Mwaha ti mwaha, nnahaala woona ti mwawiihai nnahaalaahu ochariha yootakiherya ya Yesu.

WAALIPIHA AKINA

5. Ntakhara heeni oohuserya yaanachuna nlipiho?

⁵ Oohuserya a Yesu yaanachuna olipihiwa. Ntakhara heeni? Akina aahiya ipa saya, imusi ni anakoso wi emuchare Yesu mmuteko wa elukuluku yoothene. (Mat. 19:27) Akina yaanakhalihiwa moonanara nthowa nawi yaari oohuserya a Yesu. (Yoh. 9:22) Awo yaahipaka wiilipixerya yoola nthowa nawi yaaneemererya wi Yesu aari Mesiya yoowo aalaiheryiwe. (Mat. 16:16) Vaavaa Yesu aakhwileiye, awo yaahikhala oothananaxa ni awoova nthowa nawi hiyaasuwela yeeyo yaahaala weereya.

6. Tiheeni Yesu eenreiye amanle ovinya mookhwaani?

⁶ Moohikhwa minikwa, Yesu aahoona wiicela wa oohuserya awe ohiya ntoko eneneeryo ya oceecheya omunepani, nyenya ntoko naakhulo na wiiwexexa wi aayeleela. Mwawiihiiha, mu nihiku nenlo aaviihiweiye mookhwani owo aahipacerya waalipiha asinthamwene awe. Ntoko yootakiherya, owo aahooneya wa Mariya Matalena vaavaa owo inleiye va nihiye nawe. (Yoh. 20:​11, 16) Owo tho aahooneya wa oohuserya eeli yaawo alociwe woopaceryani wa mwaha yoola. Nave aahooneya wa murummwa Petru. (Luka 24:34) Tiheeni nnahuseryaahu orweela wa yootakiherya ya Yesu? Muthokororye yeeyo yeeren’ye variyari va wooneya wawe woopacerya.

7. Mwawiiwanana ni Yohani 20:​11-16, tiheeni Yesu oonneiye Mariya eeraka, nave tiheeni owo aamweerenleiye? (Moone tho eruku.)

⁷ Mwaalakhanye Yohani 20:​11-16. Wooxixelo 16 a Nisani athiyana akina oororomeleya yaahiya o nihiye weiwo Yesu aavithiweiyewo. (Luka  24:​1, 10) Nnanwerya otikitheryeya mu yaweereya ya mmoha a athiyana yaala, Mariya Matalena. Vaavaa Mariya aaphin’yeiye o nihiye haaphwannyewo echu. Owo aahichimaka wi amuleele Petru ni Yohani nave voocharela yaamuchara echimakelaka o mahiye. Emanle weemererya wi mu nihiye hiwaarimo echu, alopwana yaala yaahikookela owannyaya. Nyenya Mariya hooye. Owo aahihala weiwo inlaka. Haasuwela wi Yesu aanamoona. Owo aahoona wi aamwinlela yoowo nave aahilakelela omuhakararya. Mwawiihiiha owo aahooneya wa Mariya nave voocharela aahipaka echu yookhweya yeeyo yaamulipinhe vancipale. Owo aahiloca ni yoowo nave aahimvaha murici woochuneyaxa—wi alokohe muchaka wa oviihiwa wawe wa anna awe.—Yoh. 20:​17, 18.

8. Nni nimutakiherye hai Yesu?

⁸ Nni nimutakiherye hai Yesu? Ninnamutakiherya Yesu vaavaa nnaalipihaahu anna ni arokora ahu otitelela omurumeela Yehova, ntoko Yesu, nnaphwanela opwachaka makacamiho yaawo akina aryaayano, weererya wiiwexexa mukhalelo awo anoonaaya ni waahakararya yaawo. Muthokororye yaweereya emoha ya murokora awiichaniwa Jocelyn, yoowo munnawe amukhaani aakhwile va asitenti. Owo ooloca:“Mu miyeeri mincipale, kaakhala oothananaxa ilukuluku soothene”. Mwawiihiiha, munna mmoha ni mwaariye yaahinwopa oya owannyaya nave yaahimweemererya wi owo aloce vooloca sa miyoonelo sawe, nave awo yaahinwiriyana moomaaleleya, emukhaliha mooreera murima nave eloca mukhalelo Yehova onamvaheiye esisapo yoowo. Jocelyn ooloca: “Koonne ntoko wi Yehova aahaapharihela wi ekikumihe mu ephareya yooripa ni yacheku ni okikeriha mu mwaaceya onavuluxa ikumi. Awo yaahikikhaviherya okookela okhalano nchuno wanaawiili na omurumeelaka Yehova.” Hiyaano tho nnanwerya waalipiha akina wakhala wi ninnaahiya eloca miyoonelo saya ni waawiriyana moomaaleleya yeeyo analocaaya, mmukhalelo yoola nnanwerya waahakararya ni waakhaviherya otitelela omurumeelaka Yehova.—Aro. 12:15.

MWAAKHAVIHERYE ACHU AKINA WIIWEXEXA MASU A MULUKU

9. Makacamiho taani oohuserya a Yesu ehoolenlaaya, nave ti mwawiihai Yesu aakhavihenryeiye?

⁹ Oohuserya a Yesu yaaheemererya Masu a Muluku nave yaahiilipixerya opharihela muteko mu okumi aya. (Yoh. 17:6) Nyenya awo hiyaawenrye wiiwexexa ntakhara heeni Yesu aahikhwa ntoko aweera soonanara. Yesu aahisuwela wi oohuserya awe yaakhalano nroromelo nave yaanamusivela Yehova, nyenya aahoona wi waanachuneya awo wiiwexexa phaama Soorepa. (Luka 9:​44, 45; Yoh. 20:9) Owo aahaakhaviherya wiiwexexa yootaphulela ya yeeyo yaalakhanyaaya mu Soorempwa. Muthokororye mukhalelo owo eenreiyeno yeela vaavaa oonen’yeiye wa oohuserya eeli mu ephiro ya Emawu.

10. Ti mwawiihai Yesu aakhavihenryeiye oohuserya awe wiiwexexa wi owo aari Mesiya chiryene? (Luka 24:​18-27)

¹⁰ Mwaalakhanye Luka 24:​18-27. Moone wi Yesu haalonce mwawaakuveya wi owo aari taani. Ohiya yeeyo, owo aapanke makoho. Ntakhara heeni? Akhweya owo aachuna wi awo eloce yeeyo yaari mmuupuweloni mwaya ni vamurimani vaya. Nave awo yaaheerano. Yaahimuleela wi yaaweherya wi Yesu aahaala waataphula wookapuroni o Roma. Emanle awo oloca mookwakwaleya sawuukhula saya, Yesu aahipharihela Soorepa wi aakhaviherye alopwana yaala wiiwexexa yeeyo yeeren’ye. b Voocharela, mu ohiyu yoole Yesu aahiviriha elukuluku aalipihaka oohuserya akina vooloca sa iparipari seiha. (Luka 24:​33-48) Tiheeni nnahuseryaahu ni yaweereya yeela?

11-12. (1) Nihusiheryo taani nnahuseryaahu orweela wa mukhalelo Yesu aahusinheiye iparipari sa Mpiipiliyani? (Moone tho iruku.) (2) Ti mwawiihai muhusiha a Piipiliya aamukhavihenryeiye Nortey?

¹¹ Nni nimutakiherye hai Yesu? Voopacerya,  vaavaa munaahusihaanyu oohuserya a Piipiliya, mpakeke makoho yaawo anahaala waakhaviherya oloca yeeyo eri mmupuweloni ni mmurimani mwaya. (Mas. 20:5) Mmanle wiiwexexa miyoonelo saya, nwooniherye mukhalelo wa ophwanya Soorepa soophwanelela seiho sinaphariheleya mmikhalelo saya. Voocharela, musepe waaleela echu yeeyo awo anaphwanelaaya weera. Ohiya yeeyoru, mwaakhaviherye wuupuwelela vooloca sa Soorempwa ni woona mukhalelo anahaalaaya opharihela malakiheryo yaawo a Mpiipiliyani mu okumi aya. Muthokororye yaweereya ya munna mmoha o Kana awiichaniwa Nortey.

¹² Vaavaa Nortey aareiyeno iyaakha 16, aahipacerya omuhuserya Piipiliya. Mwawaakuveya, emusi awe yaahipacerya omwaakaaha. Tiheeni yaamukhavihenrye okhala oolipa? Muhusiha awe a Piipiliya aahimpharihela Mateyu ekapitulu ya 10 wi amutharihele wi Akristu eeparipari enahaala wiikariwa. Nortey ooloca: “Vaavaa wiikariwa waapacenryaaya, kaari oolekecheya wi koophwanya eparipari.” Amuhusiha awe tho yaahimukhaviherya wuupuwelela vooloca sa Mateyu 10:16 wi owo awerye okhalano ekaasoope ni ncicimiho vaavaa enavaanelaaya vooloca sa malapelo ni achu oowannyawe. Amanle opatisiwa, Nortey aachuna okhala piyooneeru, nyenya apapa awe yaaweherya wi owo avolowe mu exikola ya vasulu. Ohiya omuleela Nortey echu yaweera, muhusiha awe aahimukoha ni omukhaviherya mukhalelo wa opharihela malakiheryo a Mpiipiliyani. Ni yookhumelela taani? Nortey aahilakelela ovolowa mmuteko wa elukuluku yoothene. Apapa awe yaahimwiikara vaate. Ti mwawiihai Nortey oniisooneiye ni yaweereya yeela? Nortey ooloca: “Kiri oolekecheya wi koopaka yoothanla yaphaama.” Vaavaa nnavirihaahu elukuluku wi naakhaviherye akina wuupuwelela vooloca sa Soorempwa, nnanwerya waakhaviherya awo okhala oolipa.—Aef. 3:​16-19.

MWAAVYAKIHE ANNA OPHWANELELA WI EKHALE “ALOPWANA NTOKO SAMAHALA”

13. Tiheeni Yesu opankeiye wi aroromelihe wi muteko wa Atiithi awe otitelele okhala wookhapeleleya? (Aefesu 4:8)

¹³ Vaavaa aareiye veelaponi yavathi, Yesu aahikhapelela moophaameya muteko yoowo Atiithi awe yamvaherenryaaya wi apake. (Yoh. 17:4) Nyenya Yesu haarino moonelo wawi: ‘Wakhala wi nyuwaano munnachuna echu yaphaama, nyeenyu ene mweereno yeeyo.’ Variyari va iyaakha sawe raru ni emeya mmuteko woolaleerya, owo aahaavyakiha achu akina wi epake muteko yoola. Ahaakumve okookela wirimu, Yesu aahaahiyerya oohuserya awe murici—akina akhweya yaarino iyaakha 20—wi ekhapeleleke  ipucepuche soochuneya sa Yehova ni otitelela ohoolela seiho mmuteko woolaleerya ni ohusiha. (Mwaalakhanye Aefesu 4:8.) Ti mwawiihai Yesu opharihenleiye mahiku awe ookuchula makhumi maxexe wi aakhaviherye alopwana yaala awiiveleela, oororomeleya ni oowetha, ophwanelela okhala “alopwana ntoko samahala”?

14. Ti mwawiihai Yesu aakhavihenryeiye oohuserya awe wunnuwa omunepani variyari va mahiku awe ookuchula makhumi maxexe veelaponi yavathi? (Moone tho eruku.)

¹⁴ Yesu aahaavaha oohuserya awe ekano yakuru, nyenya moosivela. Ntoko yootakiherya, owo aahoona wi akina a yaawo yaahikhalano mathitimanelo a okhwa minikwa, nave aahaavaha ekano. (Luka 24:​25-27; Yoh. 20:27) Owo tho aahaaleela awo wi yaaphwanela otikitheryeyaxa mu waakhapelela achu a Yehova ohiya mu waavya ikhorowa. (Yoh. 21:15) Nave aahiwuupuxerya ohilikanyiha yeeyo anapakaaya mmuteko wa Yehova ni yeeyo akina anaweryaaya opaka. (Yoh. 21:​20-22) Nave owo aahookolola miyoonelo saya ikina sooheseya seiyo awo yaaryaayano vooloca sa Omwene, nave aahaakhaviherya otikitheryeya mmuteko woolaleerya michaka saphaama. (Saw. 1:​6-8) Tiheeni atokweene anahuseryaaya orweela wa Yesu?

15-16. (1) Mmukhalelo taani atokweene anahaalaaya omutakiherya Yesu? Mutharihe. (2) Ti mwawiihai Patrick aphunreiye orweela wa ekano?

¹⁵ Atokweene eni emutakiherye hai Yesu? Awo anaphwanela waavyakiha ni waakhaviherya anna ophitaanyerya yaale eri amiravo, ophwanelela waakhela mirici mitokweene. c Atokweene henaweherya wi yaale enaavyakihaaya epakeke ichu moophaameya. Awo anaphwanela waavahaka ekano yoosivela, wi anna yaala eri amiravo ekhaleno mavyakelo ni woona ochuneya waya okhala awiiyeviha, oororomeleya ni ooreheryeya waarumeela akina.—1 Tim. 3:1; 2 Tim. 2:2; 1 Pet. 5:5.

¹⁶ Muthokororye mukhalelo munna mmoha awiichaniwa Patrick ophunreiye orweela wa ekano. Vaavaa aareiye mmiravo, owo aahikhalano mathitimanelo ooloca moowali ni weera ichu mmukhalelo woohiphwanelela wa akina, ophitaanyerya arokora. Mutokweene awiichwelavo aahoona sooceecheiha sa Patrick nave aahimvaha ikano saphaama, nyenya sooluluwanya. Patrick ooloca: “Kinnahakalala woona wi  mutokweene ookooniherya mukhalelo yoowo kinaphwanelaaka orehererya. “Kaanakhala ooceecheya vaavaa kaawoonaaka anna akina yaakhelaka mirici mmuteko seiyo kaachunaaka. Nyenya ekano yeeyo mutokweene aakivanheiye yookikhaviherya woona ochuneya waya otikitheryeya mu waarumeela anna ni arokora aka mwa wiiyeviha, ohiya mu waakhela murici vyakala mmulokoni.” Ntoko yookhumelela, Patrick aahithanliwa ntoko mutokweene vaavaa aareiyeno iyaakha 20 ni emeya.—Mas. 27:9.

17. Ti mwawiihai Yesu oonihenryeiye wi aanaaroromela oohuserya awe?

¹⁷ Yesu ohaavaha oohuserya awe murici, ohiya pahiru olaleerya nyenya tho wa ohusiha (Moone enoota ya ohuserya mu Mateyu 28:20 “mwaahusihaka”.) Oohuserya yaanwerya wiisoona ohikhala oophwanelela ntakhara murici yoola. Nyenya, Yesu haakhwa minikwa wi awo yaanwerya ophara muteko yoola. Nave aahaaleela wi yaanwerya. Alocaka moororomela wa awo, Yesu aahi: “Hiiha ntoko Atiithi akirummaaya miyo, miyo tho kinnoorumaani nyuwo.”—Yoh. 20:21.

18. Ti mwawiihai atokweene enahaalaaya omutakiherya Yesu?

¹⁸ Atokweene eni emutakiherye hai Yesu? Atokweene amavyakelo annaakawela akina mirici. (Afi. 2:​19-22) Ntoko yootakiherya, atokweene ananwerya waaphitaanyeryavo amiravo mmuteko wa orehererya Empa ya Omwene. Atokweene ananwerya waavaha anna muteko wi epake, ni waavyakiha vooloca sa mukhalelo wa weerano nave voocharela ororomela wi awo anahaala olapa muteko phaama ene. Mutokweene mmoha muvyaani awiichaniwa Matthew onnaathamalela atokweene amavyakelo yaawo emuvyakinhe opaka miteko mincipale mmulokoni ni ororomela wi owo aaneerano phaama. Owo ooloca: “Miyaano koophuravo vaavaa awo yoonaaya soohesa saka ntoko makupa oohuserya nave voocharela ekikhaviherya orehererya seiyo.” d

19. Tiheeni nlakelenlaahu weera?

¹⁹ Yesu aahipharihela mahiku awe ookuchula makhumi maxexe veelaponi yavathi wi aalipihe, aahusihe ni waavyakiha akina. Nnaphwanela okhala oolakelela ochariha vakhiviru khiviru yootakihaerya awe. (1 Pet. 2:21) Owo onahaala onikhaviherya waakhwaniherya. Nthowa nawi owo oororomeliha: “Kiri ni nyuwo mahiku oothene ophiyerya omakuchuwelo wa mukhalelo yoola wa ichu.”—Mat. 28:20.