MACIPO yaari oochuneyaxa mu yookhovelela ya Isarayeli akhalai. Piipiliya wiiliwiili onnaaloca achu emanaka ikaruma ni wiipa macipo. Makupa mancipale a Mpiipiliyani apakiwe mmukhalelo wa macipo, ntoko yootakiherya, liivuru a Salmu, Ncipo na Solomoni, ni Wiikhupanyerya. Liivru mmoha onaloca sa okumi wa ilukuluku sakhalai, ooloca wi Piipiliya “onnooniherya mookwakwaleya wi Aisarayeli yaanapharihela macipo mmiteko soohiyanahiyana mu okumi aya.”

Macipo nihiku nnihiku. Aisarayeli yaaniipa macipo wi eloce miyoonelo saya. (Yes. 30:29) Athiyana yaanamana ikoma, yaaniipa macipo oohakalala nave yaaniina mu ifeesta ni vaavaa anakhoco yaavoothaaya okhoconi. (Amut. 11:34; 1 Sam. 18:​6, 7; 1 Mam. 1:​39, 40) Aisarayeli tho yaaniipa wi yooniherye wiicela woothene yoonaaya vaavaa yaamuyeleelaaya muchu mookhwani. (2 Math. 35:25) Ntoko ereferensiya emoha eloncaaya, “moohikhwa minikwa Ahepri chiryene yaari achu awiipa macipo”.

Macipo vaate va mwene. Mamwene tho o Isarayeli yaanasiveliwa vancipale ni macipo. Mwene Sauli aahimwiichana Tavite owannyawe wi amwiipele owo chakare. (1 Sam. 16:​18, 23) Nave mu elukuluku vakhaani ohoolo waya, vaavaa Tavite aareiye mwene, owo aahipaka ikaruma sa macipo, ahelamo macipo aphaama nave tho ophiyerya arehererya ikaruma seiho seempwano mu empa ya Yehova. (2 Math. 7:6; Amo. 6:5) Mwene Solomoni aakhalano alopwana ni athiyana yaawo yiipa vaate vawe.—Ekl. 2:8.

Macipo mu malapelo. Echu yoochuneyaxa tiyawi, Aisarayeli yaanapharihela macipo wi emulapele Yehova. Mweeparipari, alopwana awaakhwana 4.000 yaaniipa ikaruma sa macipo mu Empa ya Muluku o Yerusalemu. (1 Math. 23:5) Awo yaanawiipa apankwe, ikaruma sa mikoyi, ni achakare. (2 Math. 5:12) Nyenya tahi wi awo yaari mukhataaya yaamulapela Yehova ni macipo. Aisarayeli ancipale yaaniipa vaavaa yeecaaya mukwaha eyaaka o Yerusalemu ntakhara ifeesta, makina a macipo yaala yaasuweliwe ntoko Macipo a Owelano. (Sal. 120-134) Nave mwawiiwanana ni Soorempwa sa Ayuta, Aisarayeli yaaniipa macipo a Salmu Hallel a naari macipo oomvuwihano Yehova, variyari va yoolya ya Paska.

Macipo annatitelela okhala oochuneyaxa wa achu a Muluku. (Tiy. 5:13) Wiipa onnapaka makupa a malapelo ahu. (Aef. 5:19) Nave hiyaano ninnakhala awaacameleyaxa wa annihu ni arokora ahu vaavaa nnamwiipelaahu macipo Yehova vamoha. (Ako. 3:16) Nave eyo ennanlipiha vaavaa nnahoolelaahu mikhalelo soovila. (Saw. 16:25) Wiipa macipo ori mukhalelo mmoha waphaamaxa wa wooniherya nroromelo nahu wa Yehova ni osivela wahu wa yoowo.