1 Akorintu 1:1-31
1 Miyaano Paulo, awiichaniwa wi kikhale murummwa a Kristu Yesu moorweela wa okhwela wa Muluku, ni munnihu Sosteni,
2 kinnarepela muloko wa Muluku ori o Korintu, wa nyuwo muri aweelihiwa mwawiiwanana ni Kristu Yesu, awiichaniwa wi mukhale aweela murima, vamoha ni oothene yaawo ari mmakupa oothene, aniichana nsina na Apwiya ahu Yesu Kristu, Apwiya aya ni awihu.
3 Mahala matokweene ni murecele wa Muluku, Atiithi ahu vamoha ni a Apwiya Yesu Kristu ekhale ni nyuwaano.
4 Mahiku oothene kinnamuthamalela Muluku aka ntakhara nyuwo, wa nthowa na mahala matokweene a Muluku mvahiwaanyu mwa Kristu Yesu;
5 woona wi mwa soothene, nyuwaano moovahiwa oreela mwa yoowo, mu owerya woothene wa oloca ni osuwela woothene,
6 woona wi onamoona vooloca sa Kristu woothipeleya mwa nyuwo,
7 ophiyerya wi ehinoohalelaani yamahala emoharu mano, muweheryaka wuupululiwa wa Apwiya ahu Yesu Kristu.
8 Owo tho onarwa ootikitheryaani ophiyerya o makuchuwelo, wi muhikhaleno nthowa nihiku na Apwiya ahu Yesu Kristu.
9 Muluku toororomeleya, yoowo owiichanneeni wi mukhale mwawiiwanana* ni mwanawe, Yesu Kristu Apwiya ahu.
10 Anna, mu nsina na Apwiya ahu Yesu Kristu, kinnooceenyeryaani wi oothene mweemereryaneke mu sooloca nave ohikhalevo okawanyeya mwa nyuwo, nyenya mukhale awiiwanana mwawaakhwanela mmuupuwelo mmohamoha ni mmoonelo mmohamoha.
11 Tiwi akina a vaate va Kolowe aakileela vooloca sa nyuwo, asinnaka, wi wookhalawo owanawana mwa nyuwo.
12 Echu kinachunaaka oloca tiila, tiwi mmoha ti mmoha a nyuwo onaloca ariki: “Miyo ka awawe Paulo,” “Nto miyo ka awawe Apolu,” “Nto miyo ka a Kefa,”* “Nto miyo ka a Kristu.”
13 Apwanne Kristu ookawanyeya? Apwanne Paulo ookhwa va mwiri wa nthowa na nyuwo? Naari apwanne mpatisiwe mu nsina na Paulo?
14 Kinnamuthamalela Muluku nthowa nawi nkimpatinse naari mmoharu a nyuwo, voohikhala Krispu ni Kaiyu,
15 wi ahikhalevo oni aloce wi mpatisiwe mu nsina naka.
16 Aa, kohaapatisa tho achu a veechokoni ya Estefana. Vooloca sa akina, nkisuwenle waakhanle wi kompatisa muchu mukina.
17 Tiwi Kristu hakirumme wi kipatiseke, nto wi kilaleerye michaka saphaama; nave ohiya ni masuwelelo a* masu, wi mwiri woohooxiwavo* wa Kristu ohikhale etheru ene.
18 Woona wi michaka vooloca sa mwiri woohooxiwavo* ti ololo wa yaale anarimeela, nto wa hiyo nnavuluxiwa, ti ikuru sa Muluku.
19 Tiwi yoorempwa: “Kinarwa kimaliha miruku sa alipa a miruku ni okhooca* osuwela wa alipa oosuwela.”
20 Ori woowi namiruku? Ori woowi mulipa oorepa?* Ori woowi namaloca a mukhalelo yoola wa ichu?* Mano, Muluku heerinhe wi miruku sa elapo ikhala ololo?
21 Tiwi, mwa miruku sa Muluku, elapo hephiyenrye omusuwela Muluku mwa miruku saya. Mwawiihiiha, moorweela wa ololo wa yeeyo enalaleeryiwa, Muluku aasiveliwa waavuluxa yaale anaroromela.
22 Vaavaa Ayuta anavekaaya ineneeryo nave Akriki enaavya miruku,
23 hiyaano nnamulaleerya Kristu okhwile va mwiri, yoowo ori nthowa nookwaculiha wa Ayuta nyenya wa maloko ti ololo.
24 Nto wa awiichaniwa, Ayuta hiiha ntoko Akriki, Kristu ti ikuru sa Muluku ni miruku sa Muluku.
25 Ntakhara echu yoololo ya Muluku ti yamirukuxa waapwaha achu, nave echu yooceecheya ya Muluku ti ya ikuruxa waapwaha achu.
26 Anna, nyuwaano munanwerya woona owiichanaani wawe: Haavo ancipale a miruku mwawiiwanana ni mwiili,* naari ancipale ooweryaxa naari ancipale a emusi yoovuwa,*
27 nto Muluku oothanla ichu soololo sa veelaponi, wi awuulihe muru a miruku; nave Muluku oothanla ichu sooceecheya sa veelaponi wi uulihe muru ichu sakuru.
28 Muluku oothanla ichu soohisuwanyeya sa veelaponi ni soonyemuliwa, seiho ihiri echweenevo wi uulihe muru ichu seiho iri echweenevo,
29 wi ahikhalevo* oni iirumiheke vamiithoni va Muluku.
30 Nto ori wa nthowa na yoowo muryaanyu awiiwanana ni Kristu Yesu, yoowo ori miruku sa Muluku wa hiyo, nave tho ori wookololowa, weelihiwa, ni otaphuliwa moorweela wa woopola,
31 wi ekhale hiiha ntoko erempwaaya: “Yoowo oniirumiha, iirumihe mwa Yehova.”
Inoota
^ Naari: “wi mwaataane.”
^ Awiichaniwa tho Petru.
^ Naari: “miruku sa.”
^ Moone Masu Atharihiwe.
^ Moone Masu Atharihiwe.
^ Naari: “okuha okhwipi.”
^ Ela tiwi, mulipa oosuwela Nlamulo.
^ Naari: “elukuluku yeela.” Moone Masu Atharihiwe.
^ Naari: “moonelo woomuchu.”
^ Naari: “ayariwe mu emusi yoocicimiheya.”
^ Naari: “ahikhalevo muchu.”
