1 Timotiyu 2:1-15
2 Mwawiihiiha, voopacerya wa soothene, kinnaceenyerya wi epakiweke mavekelo, mavekelo a vathi va murima, waavekelela akina ni mathamalelo wa achu a mukhalelo woothene,
2 wa mamwene ni wa oothene arino olamulelo,* wi ntitelele weeca mmureceleni ni mwawiichaala, nimucicimihaka Muluku ni murima woothene.
3 Ela ti yaphaama ni yaweemereryeya vamiithoni va Muluku Mvuluxa ahu,
4 yoowo onachuna wi achu a mukhalelo woothene evuluxiwe ni ophiyerya okhalano masuwelelo awaakhwanela eeparipari.
5 Tiwi orivo Muluku mmoha ni mulipa awinnyererya mmoha variyari va Muluku ni achu; muchu ene, ti Kristu Yesu,
6 yoowo iivelenle ntoko woopola wawaakhwanela ntakhara achu oothene.* Vooloca sa yeela, enamweereliwa onamoona mu elukuluku aya.
7 Ni yoolakelela yaweerela onamoona yoola, koheeriwa mulaleeryi ni murummwa, muhusiha a achu a maloko vooloca sa nroromelo ni eparipari. Kinaloca eparipari, nkinootha.
8 Mwawiihiiha, kinachuna wi mmapuro oothene alopwana etitelele ovekela, ewelihaka mata oororomeleya, ehirino esara naari waakhulana.
9 Emohamoha tho, athiyana anaphwanela owaraka soowara soophwanelela,* yiireerihaka ni makhalelo oocicimiheya ni amiruku,* ohiya ni makhalelo a ovathaanya* miihi echunaka wooseela, naari wiireeriha ni ooru, maluku oowalamela, naari ni ikuwo sa esisapo yoowalamela.
10 Nyenya yiireeriheke mmukhalelo woophwanelela ntoko athiyana anamulapa Muluku, ela tiwi, mmiteko saphaama.
11 Vaavaa muthiyana onahusereiye, akhaleke oomaala ni wiiwelela woothene.
12 Nkineemererya wi muthiyana ahusiheke naari amulamuleleke mulopwana, nto akhaleke oomaala.
13 Woona wi Atamu taapacenrye wuupiwa, voocharela Eva.
14 Nave tho, Atamu haawokiwe, nto muthiyana taawokiwe moomalela nave akhala mulipa oocheka.
15 Nyenya muthiyana onarwa avuluxiwa moorweela wa okhala maayi, atitelelaru* okhala mu nroromelo, mu osivela, mu weela murima vamoha ni okhala amiruku.*
Inoota
^ Naari: “owerya wa olamulela.”
^ Naari: “achu a mukhalelo woothene.”
^ Naari: “saweemereryeya.”
^ Naari: “awiisuumaaliha; awiiphimelela.”
^ Naari: “ochava; oluwa.”
^ Mu Ekriki, “yatitelelaru.”
^ Naari: “awiisuumaaliha; awiiphimelela.”
