2 Timotiyu 2:1-26
2 Vano weyo mwanaka, otitelele wiilipiha, moorweela wa mahala matokweene yaawo ari mwa Kristu Yesu;
2 nave ichu seiho wiiwalaawe wa miyo vamiithoni va anamoona ancipale, ichu seiha owunnyererye alopwana oororomeleya, yaawo anahaala okhala oophwanelela waahusiha akina.
3 Ntoko mukhoco aphaama a Kristu Yesu, opake makupaa mu ovilela soohooxa.
4 Haavo muchu onarumeela ntoko nakhoco nave mu elukuluku emohamoha aniivoliiherya* mu miyaha sa maroca* a okumi, voohikhala omuhakalaliha yoole omurempe ntoko munakhoco.
5 Nave naamwi mu axooku, yoowo onapaka mapokha hanachuweliwa* voohikhala wi oovonya mapokha mwawiiwanana ni malamulo a axooku.
6 Mulipa oolima onalapa moowetha tonaphwanela okhala oopacerya olya sawiima sa mmacani.
7 Otitelele wuupuwela yeeyo kinooleelaaka; Apwiya anahaala woovaha masuwelelo* mu ichu soothene.
8 Wuupuwele wi Yesu Kristu ooviihiwa mwa alipa ookhwa nave aari muyareriwo wa Tavite,* mwawiiwanana ni michaka saphaama kinalaleeryaaka;
9 wa nthowa na seiha kinnahooxeya nave kiri oomakiwa ni mithipo ntoko mulipa awiipha. Nyenya, masu a Muluku hamakiwe.
10 Mwa yeela, kinnatitelela ovilela ichu soothene wa nthowa na oothanliwa, wi yaawo tho yaakhele ovuluxiwa yoowo onarwa mwa Kristu Yesu, vamoha ni ncicimiho noohimala.
11 Masu ala toororomeleya: Chiryene wakhala wi nookhwa vamoha ni yoowo, nnahaala tho okhala akumi ni yoowo;
12 wakhala wi nootitelela ovilela, nnahaala olamulela tho vamoha ni yoowo; wakhala wi noomukhooca, owo tho onahaala onikhooca;
13 nakhala oohiroromeleya, owo nlelo toororomeleya, vawi hawerya wiikhooca mwaneene.
14 Otitelele owuupuserya ichu seiha, waaleelihaka* vamiithoni va Muluku wi ehiwaneke ntakhara masu, echu yeeyo ehinaphuriha echu, woona wi ennaapahula* yaale enawiriyana.
15 Wiilipixerye wiiperekha wa Muluku weyo mwaneene ori aweemereryeya, ntoko namalapa ohirino echu ya wuuliwa muru, ohusihaka ni othariha mwawaakhwanela masu a eparipari.
16 Nyenya osepe masu a siiyo ahiniiwanana ni yeeyo eri yaweela, woona wi awo enanweeriha omunyemula Muluku moopwahererya,
17 nave masu aya annatathareya ntoko namukooxe.* Mwa yaawo ari Eminewu ni Filetu.
18 Alopwana yaala aapheruwa nave ehiya eparipari, elocaka wi ovinya mookhwani woheereya nave annahuweliha nroromelo na akina.
19 Naamwi hiiha, mathipelo oolipa a Muluku annatitelela okhala, erinono eneneeryo ela yoohixipha: “Yehova ohaasuwela yaale ari awawe,” nave “Oothene yoole oniichana nsina na Yehova akhooce ohookololowa.”
20 Nyuwaano moosuwela wi mu empa etokweene hinnakhalamo pahi sookuxerya sa ooru ni sa eparata, nto sookhalamo sa mapawa ni sa oloko; ikina sinnaphariheliwa muteko wa ichu soocicimiheya nave ikina wa ichu soohicicimiheya.
21 Wakhala wi muchu oorapela wa sookuxerya seiha sookuchula, onamukhala ekaruma* wa miteko soocicimiheya, aweeliheya, oompharela phaama muteko mwaneene, oorehereya wa miteko soothene saphaama.
22 Wa nthowa nenla, ochawe minkhela sa omiravo, nyenya wiilipixerye waavya wookololowa, nroromelo, osivela, murecele vamoha ni yaawo anawiichana Apwiya ni murima waweela.
23 Ohiya yeeyo, okhooce miyaha satheru ni soololo, woona wi woosuwela wi ichu seiya inatannya owanawana.
24 Kapuro a Apwiya hanaphwanela owaniha, nto onaphwanela okhala ooreera murima ni achu oothene, oophwanelela ohusiha, awiivareryela vaavaa onahooxiweiye,
25 ni waahusiha mwawiichacala yaale anamvaanya. Akhweya Muluku onamwaavaha murima woocharuwa,* yoowo onahaala oweeriha okhalano masuwelelo awaakhwanela a eparipari;
26 nave hiihaa awo anamwiisuupuwelela, evuluxiwe mmuraakhoni wa Musaserya, woona wi yaaphariwa ni yoowo wi yeereke yookhwela awe.
Inoota
^ Mu Ekriki, “anaweiwa.”
^ Naari akhweya: “mmiteko sa nihiku nnihiku.”
^ Naari: “hanawarihiwa korowa.”
^ Naari: “wiiwexexa.”
^ Mu Ekriki, “mmiso wa Tavite.”
^ Naari: “oweerelaka onamoona mwawaakhwanela.”
^ Naari: “waatoloxa; waahuweliha.”
^ Naari: “nikhwaca nihinavola.”
^ Naari: “yookuxerya.”
^ Naari: “wa otoroka mukhalelo aya.”
