Aefesu 5:1-33
5 Mwawiihiiha, khalani oomutakiherya Muluku, ntoko anamwane oosiveliwa,
2 nave mweeceke moosivela, hiiha ntoko Kristu onisivenleiye* nave iivaha ntakhara hiyo* ntoko yooveleela ni mukucho, muhiriri wa wunkhela onamuhakalaliha Muluku.
3 Ocapaheya,* mukhalelo woothene wa otakhala ni nrima naari mano ihiromoliwe veeri vanyu, hiiha ntoko eryaaya yoophwanelela wa achu aweela murima;
4 naari meecelo awuuliha muru, naari malocelo oololo, naari mathatelo awuuliha muru, ichu seiha siri soohiphwanelela; nyenya moohiyana mvaheke mathamalelo.
5 Tiwi nyuwo moosuwela yeela, nave munneemererya nyuwo aneene, wi muchu yoole ori oocapaheya,* naari muchu oothanyeya,* naari muchu a nrima, enataphulela olapa soophwaniherya, haano makupa wa yoohiyeryiwa mu Omwene wa Kristu ni wa Muluku.
6 Ahikhale ani oowokeeni ni masu atheru, tiwi wa nthowa na ichu seiha, esara ya Muluku enamwaarweela anamwane a ohiiwelela.
7 Mwawiihiiha, muhuukeno ichu seiya ni yaawo;
8 woona wi khalai mwaari epiiphi, nto vano mwa omwaleela mwawiiwanana ni Apwiya. Mutitelele weeca ntoko anamwane a omwaleela,
9 vawi yawiima ya omwaleela enaphitaanyerya yoothene eri yaphaama, ya wookololowa ni yeeparipari.
10 Musuweleke yeeyo eri yaweemereryeya wa Apwiya;
11 nave mmaale wuuka miteko ihinavaha sawiima seiyo iri sa epiiphi; moohiyana mooneihe seiho.
12 Tiwi ichu seiho awo aneeraaya moovitheya ti sa wuuliha muru naari mano wi ilociwe.
13 Nyenya ichu soothene inoonihiwa* inuupululiwa ni omwaleela, woona wi soothene inuupululiwa ti omwaleela.
14 Mwawiihiiha, ennalociwa wi: “Vinya, weyo onarupa, ovinye wuukhwani, nave Kristu onarwa oomwaaleela weyo.”
15 Mwawiihiiha, mutitelele wiivareryela wi muheeceke ntoko alolo, nyenya ntoko a miruku,
16 mpharihelaka phaama elukuluku anyu,* woona wi mahiku tootakhala.
17 Mwa yeeyo muhiye okhala achu oohisuwela, nyenya mutitelele wiiwexexa tiivi eri yookhwela ya Yehova.
18 Nave tho, muhihapaliweke ni eviinyu, mummo orimo meecelo oonanara,* nyenya mutitelele osareya ni munepa.
19 Muloceke mukina ni mukhwaawe* ni masalmu, macipo oomucicimiha Muluku ni macipo oomunepani, mwiipaka nave mucharihaka ni ncipo mmurimani mwanyu ntakhara Yehova,
20 mahiku oothene mmuthamalaka Muluku ahu ni Atiithi ntakhara ichu soothene mu nsina na Apwiya ahu Yesu Kristu.
21 Mwiiwelelaneke mukina ni mukhwaawe wa nthowa na omoova Kristu.
22 Athiyana ewiiweleleke asiiyaya ntoko wa Apwiya,
23 ntakhara mulopwana muru wa muthiyana, hiiha ntoko Kristu oreiye muru wa muloko ni mvuluxa a mwiili yoola.
24 Mweeparipari, hiiha ntoko muloko onamwiiwelelaaya Kristu, athiyana tho anaphwanela owiiwelelaka asiiyaya mu soothene.
25 Alopwana nyuwo, mutitelele waasivela asaarinyu, hiiha ntoko Kristu osivenleiye tho muloko nave iiveleela wa yoowo,
26 wi eelihe muloko, ovasa ni orapiha ni maahi moorweela wa masu,
27 wi iiperekhele yoowo mwaneene muloko mu oreera waya woothene, ohirino nthepa* naari nihoonya, naari echu ekina yoolikana, nto waweela ni woohikhalano nthowa.
28 Moolikana, alopwana anaphwanela waasivelaka asaaraya ntoko mwiili aya ene. Mulopwana onamusivela mwaariye, oniisivela mwaneene,
29 woona wi haavo muchu oniica mwiili awe ene, nto onnalyiha ni okhapelela yoowo, hiiha ntoko Kristu oneereiye ni muloko,
30 ntakhara nri makupa a mwiili awe.
31 “Va nthowa nenla mulopwana onamwaahiya apapa awe ni amama awe wi owo aphitaane* ni mwaariye, nave oopiili anamukhala mwiili mmoha.”
32 Yoovitheya yaweela yeela etokweene. Vano miyo kinaloca vooloca sa Kristu ni muloko.
33 Mwawiihiiha, mmoha ti mmoha a nyuwo onaphwanela omusivelaka mwaariye hiiha ntoko onisivenleiye; nave muthiyana onaphwanela okhalano ncicimiho nawiiseela wa aiyawe.
Inoota
^ Naari akhweya: “oosivenleiyeni.”
^ Naari akhweya: “nyuwo.”
^ Mu Ekriki, porneiya. Moone Masu Atharihiwe.
^ Moone Masu Atharihiwe, “Ocapaheya.”
^ Naari: “ootakhala.”
^ Naari: “inavaanyiwa.”
^ Mu Ekriki, “muthumaka elukuluku yoolakeleliwa.”
^ Naari: “eelavilavi.”
^ Naari akhweya: “wa nyuwo aneene.”
^ Naari: “nipapa.”
^ Naari: “atitelele okhala.”
