Ahepri 5:1-14
5 Tiwi mulipa a mukucho mutokweene yoowo onakuxiwa veeri va achu onnathanliwa wi aakhaviheryeke yaawo okhapelela ichu sa Muluku, wi aveleele soovaha ni mikucho ntakhara soocheka.
2 Owo onnawerya waathananela* achu ahirino masuwelelo ni oohuwela,* woona wi yoowo ene tho onnakumanano sooceecheya sawe,
3 nave va nthowa nenla owo onnaphwanela oveleela soovaha ntakhara soocheka sawawe mwaneene hiiha ntoko oneereiye wa nloko.
4 Haavo muchu oniikuserya ncicimiho nenla, nto onaakhela pahiru iichaniwa ti Muluku mwaneene, hiiha ntoko eerenleiye Aroni.
5 Mwawiihiiha, Kristu hiiciciminhe mukhateiye iiseeraka mulipa a mukucho mutokweene, nto ocicimihiwe ni Yoole aalonce ni yoowo ariki: “Weyo wa mwanaka; olelo miyo kookhala tiithi aa.”
6 Ntoko olonceiye tho mu yoorepa ekina: “Weyo wa mulipa a mukucho oohimala oolikana ni Melikiseteki.”
7 Mu okumi awe veelaponi ya vathi,* Kristu aapaka mavekelo a vathi va murima ni sooveka, ni okhuwela otokweene ni miithori, wa Yoole aawerya omvuluxa wuukhwani; nave owo aawiriyaniwa wanthowa na omoova wawe Muluku.
8 Naamwi aari mwaana, owo aahuserya wiiwelela mwa ichu aahooxen’yeiyeno.
9 Nave amanle waakhwaniheryiwa owo aakhala mwaneene a ovuluxa woohimala wa yaale oothene anamwiiwelela,
10 ntakhara othanliwe ni Muluku ntoko mulipa a mukucho mutokweene oolikana ni Melikiseteki.
11 Vooloca sa yoowo, nookhalano sincipale sa oloca nto ti woovila othariha, woona wi nyuwo mwa eeruru mu wiiwexexa* wanyu.
12 Tiwi, naamwi vano* mwaaphwanenle okhala ahusiha, munnachuna tho wi muchu oohusiheeni ovinyerya woopaceryani, ichu soopacerya sa masu aweela a Muluku, nave nyuwo mookookela ochuna waamwa nipele, ohiya yoolya yoolipa.
13 Woona wi oothene yoole onatitelela waamwa nipele hanasuwela masu awookololowa, ntakhara owo mwaana.
14 Nto yoolya yoolipa ti ya achu awiichwelavo,* yaawo moorweela wa opharihela, aakhalano owerya waya wa wiiwexexa ovyakihiwe wi* esuwele mukhalelo wa ohiyaniha yaphaama ni yoonanara.
Inoota
^ Naari: “waamorela ikharari; okhala oophimelela.”
^ Naari: “oomwaryeya.”
^ Mu Ekriki, “Mmahiku a okumi awe ntoko muchu oomwiilini.”
^ Naari: “oolekela wiiwexexa.”
^ Mu Ekriki, “naamwi mu elukuluku yeela.”
^ Naari: “oolipa omunepani.”
^ Naari: “owerya waya wa wiiwexexa.”
