Akalatiya 2:1-21
2 Ivinre iyaakha khumi naxexe, kaawela wanaawiili kiyaaka o Yerusalemu vamoha ni Parnape nave kaamukusa tho Titu.
2 Kaawenle wa nthowa na wuupululeliwa, nave kaaperekha wa anna michaka saphaama seiho kaalaleeryaaka variyari va maloko. Nyenya ela keenreno moovitheya, variyari va yaawo yaahoolela muloko, wi kiroromele wi nkaachimaka naari nkinachimaka siiyo ene.
3 Nto naari mano Titu, yoowo aari ni miyo, haakhinyereryiwe othikiliwa naamwi aari Mukiriki.
4 Nyenya mwaha ola waakhuma wa nthowa na anna oowoka yaavolonwe mwa hiyo mwa mavyakelo, yaawo yiipunyenrye wi ehocele otaphuwa yoowo nnapuhaahu mwawiiwanana ni Kristu Yesu ni yoolakelela ya oneera akapuro;
5 hiyo hinaawiiwelenle yaawo, hooye, naari mano mu elukuluku vakhaani,* wi eparipari ya michaka saphaama etitelele ni nyuwo.
6 Nto yaale yiisoona okhala oochuneya, (moohipwacha yaari oochuneya, wa miyo tahi echu, woona wi Muluku hanamuthoriha muchu mwawiiwanana ni yeeyo onooneiye) alopwana yaawo anahoolela muloko hiyaakileenleru echu evyaani.
7 Moohiyana, vaavaa yoonnaaya wi kaahinnyereryiwa michaka saphaama wa oohithikiliwa, hiiha ntoko Petru innyereryiweiye wa oothikiliwa
8 (woona wi yoowo omvanhe Petru owerya wa okhala murummwa wa yaale oothikiliwa, ookivaha tho owerya wa okhala murummwa a maloko)
9 ni yaasuwenlaaya wi kaahinnyereryiwa mahala matokweene, Tiyaku, Kefa* ni Yohani, yaawo yooniwa okhala apoco, yaahookolola ntata naya noolopwana wa miyo ni Parnape ntoko eneneeryo ya onthamwene,* wi niye wa maloko, nto awo wa oothikiliwa.
10 Yaanivenke pahiru wi niwuupuweleke alipa oohaawa, nave ti yeela kiniilipixeryaaka vancipale weerano.
11 Nto vaavaa Kefa* aaphin’yeiye o Antiyokeya, kaamvaanya* niwehanaka ethoi ni ethoi, woona wi chiryene owo aahesa.*
12 Tiwi, ehaakumve ophiya alopwana akina a nikhuuru na Tiyaku, owo aanalya vamoha ni achu a maloko; nto vaavaa awo yaaphin’yaaya, owo aahiya weerano yeela nave iivalaanya wa achu yaala, awoovaka yaale a nikhuuru na oothikiliwa.
13 Ayuta akina tho, yaamutakiherya yoowo mu wiisootherya yoola, ophiyerya tho wi Parnape aahaachariha yaawo mu wiisootherya waya.
14 Nto vaavaa konnaaka wi awo hiyeeca mwawiiwanana ni eparipari ya michaka saphaama, kaaloca ni Kefa* vamiithoni va oothene awo kiriki: “Vano weyo, naamwi ori Muyuta, onakhala ntoko muchu a maloko nave ohiya ntoko Muyuta, onawerya hai owaakeeleliha achu a maloko okhala mwawiiwanana ni saweera sa Ayuta?”
15 Hiyo nri Ayuta oyariwa wooyariwa, nave ohiya oocheka oorweela wa maloko,
16 noosuwela wi muchu oneeriwa okhala eekhaikhai, ohiya mwa miteko sa nlamulo, nto pahiru moorweela wa nroromelo mwa Yesu Kristu. Mwawiihiiha, ninnamuroromela Kristu Yesu, wi neeriwe okhala eekhaikhai moorweela wa nroromelo mwa Kristu, nave ohiya mwa miteko sa nlamulo, woona wi haavo* oni eeriwe okhala eekhaikhai moorweela mwa miteko sa nlamulo.
17 Vano, wakhala wi hiyaano tho nnooniwa okhala alipa oocheka naavyaka weeriwa okhala eekhaikhai moorweela wa Kristu, apwanne Kristu namuteko a yoocheka? Mweeparipari hooye!
18 Wakhala wi kinnakookela oteka ichu seiho kaanyaannyaaka, kinooniherya okhala mulipa oocheka.
19 Tiwi, moorweela wa nlamulo kookhwa vooloca sa nlamulo, wi kikhale mukumi wa Muluku.
20 Vano miyo kookhomeliwa va mwiri vamoha ni Kristu. Ori mukumi tahi yoomi, nto ti Kristu onakhala mwa miyo. Mweeparipari, okumi kinakhalaaka hiihaano mwa mwiili, kinakhala moorweela wa omuroromela Mwaana a Muluku, yoowo okisivenle ni iiveleela wa miyo.
21 Miyo nkinakhooca* mahala matokweene a Muluku; tiwi, wakhala wi wookololowa onarweela mwa nlamulo, chiryene Kristu okhwile siiyo ene.
Inoota
^ Mu Ekriki, “naari mano mu ewora emoha.”
^ Awiichaniwa tho Petru.
^ Naari: “ntoko eneeryo ya waataana.”
^ Awiichaniwa tho Petru.
^ Naari: “kaalocano moohoovelela.”
^ Naari: “woona wi owo aathorihiwa.”
^ Awiichaniwa tho Petru.
^ Mu Ekriki, “haavo muchu.”
^ Naari: “nkinaviihavo.”
