Akalatiya 6:1-18
6 Anna, naamwi muchu ahisuwelaka, apacerya opheruwa, nyuwo muri awunnuwa omunepani mweererye omukhaviherya muchu yoowo mmunepa wawiichacala. Nto mwiivareryeleke aneene meekhiinyu, wi muhimorele mu weehiwani tho.
2 Mutitelele woorolana mirici mukina ni mukhwaawe, nave mmukhalelo yoola nyuwo munarwa mwaakhwaniherya nlamulo na Kristu.
3 Wakhala wi muchu onniisoona okhala echweenevo, ahiri echweenevo, oniiwoka mukhateiye.
4 Nyenya mmoha ti mmoha aalikheleke saweera sawe, nave voocharela owo onahaala okhalano nthowa na ohakalala vooloca sa yoowo mwaneene, nave ohiya iilikanyihaka ni muchu mukina.
5 Tiwi mmoha ti mmoha onarwa ateexa murici awe.
6 Oothene yoole onahusihiwa masu, akawaneke ni yoole onamuhusiha ichu sawe soothene saphaama.
7 Muhiiwoke:* Muluku hanthatiwano.* Tiwi yeeyo muchu onamiseiye,* yeeyo tho tonahaaleiye ohepha;
8 ntakhara yoole onamisa mwa mwiili awe onarwa ahepha mwa mwiili awe eyuuce,* nto yoole onamisa mwa munepa onarwa ahepha mwa munepa ekumi yoohimala.
9 Mwawiihiiha, nihivelavele weera saphaama, woona wi mu elukuluku yoophwanelela nnahaala ohepha, wakhala wi hinivelavenle.
10 Mwa yeeyo, nakhalano ekari,* hankooni niweereleke saphaama oothene, xaxaxa yaale anapaka makupa a emusi ahu ya nroromelo.
11 Moone ileetera itokweene koorepenlaakaani ni ntata naka.
12 Oothene yaale anachuna wiisoona phaama mwa mwiili,* ti yaawo aneererya wootitelihaani wi muthikiliwe, nave aneerano yeeyo pahiru wi ehiikariwe wa nthowa na mwiri woohooxiwavo* wa Kristu.
13 Tiwi naamwi yaawo ene anathikiliwa haniiwelela Nlamulo, nto anachuna wi muthikiliwe wi ekhaleno nthowa na wiirumiha ntakhara mwiili anyu.
14 Nto miyo, kihiirumiheru ni echu vyakala voohikhala mwiri woohooxiwavo* wa Apwiya ahu Yesu Kristu; moorweela wa yoowo, elapo wa miyo ti yookhweene,* nave vooloca sa elapo miyo kiri ookhweene.
15 Tiwi echu eri yoochuneya tahi othikiliwa naari ohithikiliwa nyenya opatuxiwa ovyaani tori woochuneya.
16 Murecele ni ikharari ikhale ni oothene yaale aneeca mwawiiwanana ni nlakiheryo nenla, aa, wa Isarayeli a Muluku.
17 Vano ovinyerya hiihaano, ahikhale oni akuukhule, vawi kookhalano mmwiilini mwaka miititiri sa kapuro a Yesu.
18 Anna, wiivaha wanyu waphaama oreelihiwe moorweela wa mahala matokweene a Apwiya ahu Yesu Kristu. Aamen.
Inoota
^ Naari: “akhweya muhiwokiwe.”
^ Naari: “hananyemuliwa.”
^ Naari: “waala.”
^ Naari: “otoloxiwa.”
^ Mu Ekriki, “elukuluku elakeleliwe.”
^ Naari: “anachuna wooniwa phaama ni achu.”
^ Moone Masu Atharihiwe.
^ Moone Masu Atharihiwe.
^ Naari: “yookhwa vamwiri.”
