Akolose 3:1-25
3 Nto waakhanle wi mooviihiwa vamoha ni Kristu, mutitelele waavya ichu soosulu, weiwo Kristu okirantheiye omoono woolopwana wa Muluku.
2 Mutitelele otikitherya muupuwelo anyu mu ichu soosulu, ohiya mu ichu sa veelaponi yavathi.
3 Woona wi nyuwaano mookhwa, nave okumi anyu woovithiwa vamoha ni Kristu mwawiiwanana ni Muluku.
4 Vaavaa Kristu, yoowo ori okumi ahu, oneereiye ooneihiwe, nyuwaano tho munarwa mooneihiwa vamoha ni yoowo mu ncicimiho.
5 Mwawiihiiha, mwiiphe makupa a mwiili anyu* ari veelaponi yavathi, vooloca sa ocapaheya,* otakhala, nchuno noohiphwanelela na okonihana, minkhela soonanara ni nrima, ori olapa soophwaniherya.
6 Wa nthowa na ichu seiha, tenarwaaya esara ya Muluku.
7 Ola tho waari mukhalelo nyuwo mweecaanyu,* mmukhalelo anyu wa okumi wa khalai.*
8 Nyenya vano, nyuwo munaphwanela ohiya soothene iha: Onanariwa, esara, sootakhala ni oloca masu oophuca; nave munaphwanela osepa oloca sawuuliha muru mwaano mwanyu.
9 Muhootheryaneke mukina ni mukhwaawe. Munaphwanela orula omuchu wakhalai* ni saweera saya,
10 nave nware omuchu ovyaani, yoowo moorweela wa masuwelelo awaakhwanela, onarehereryiwa mwawiiwanana ni eruku ya yoole opatunxe;
11 mwa yoowo haavo Mukiriki naari Muyuta, oothikiliwa naari oohithikiliwa, namarwa, Nammawaani,* kapuro naari muchu ootaphuwa; nto Kristu tori ichu soothene ni mwa oothene.
12 Mwawiihiiha, ntoko oothanliwa a Muluku, aweela murima ni oosiveliwa, muware niphwanya, oreera murima, wiiyeviha,* wiichacala ni opixa murima.
13 Mutitelele ovilelana mukina ni mukhwaawe ni olevelelana mukina ni mukhwaawe ni murima woothene, naamwi mukina arino nthowa na omusomela mukhweiye. Hiiha ntoko Yehova oolevelenleiyeeni ni murima woothene, nyuwo tho munaphwanela weerano emohamoha.
14 Nto opwaha ichu soothene iha, muware osivela, woona wi nimakelo noophaameya na wiiwanana.
15 Nave tho, murecele wa Kristu olamuleleke mmurimani mwanyu,* ntakhara nyuwo mwiichaneliwe murecele yoola mmwiili mmoha. Nave mooniherye okhala oothamalela.
16 Masu a Kristu ekhale mwa nyuwo mwawaacaxa ni miruku soothene. Mutitelele ohusihana ni olipihana* mukina ni mukhwaawe ni masalmu, omucicimiha Muluku ni macipo oomunepani awiipiwa ni mathamalelo. Mutitelele wiipa mmurimani mwanyu wa Yehova.
17 Soothene muneeraanyu mweereke, mmasu naari mu saweera, mweerekeno soothene mu nsina na Apwiya Yesu, mmuthamalaka Muluku Atiithi, moorweela wa yoowo.
18 Athiyana nyuwo, muwiiweleleke asiiyanyu, hiiha ntoko oryaaya woophwanelela wa Apwiya.
19 Alopwana nyuwo, mutitelele waasivela asaarinyu nave muhinyeenyeyeke* ni yaawo.
20 Anamwane nyuwo, muwiiweleleke yaawo ooyanreeni mu ichu soothesene, woona wi ela ennaahakalaliha Apwiya.
21 Alipa ooyara nyuwo, muhaaximwiheke* anamwane anyu, wi awo ehiceecheye.*
22 Nyuwo anamuteko, mu soothene nwiiweleleke asipwiya anyu oomwiilini,* ohiya pahiru awo yoovareryakaani, wi mwaahakalalihe achu,* nyenya ni murima weeparipari, ni omoova Yehova.
23 Soothene muneeraanyu mweereke, mulapeke ni okumi* anyu woothene, ntoko munamweerela Yehova, ohiya achu.
24 Woona wi nyuwo moosuwela wi ti Yehova oni oovaheeni yoohiyeryiwa ntoko nchuwelo. Mulapeke ntoko akapuro a Apwiya, Kristu.
25 Mweeparipari, yoole oneerano yoonanara onarwa akookiheryiwa yoonanara yeeyo eenreiyeno, nave hiwaavo nthalu.
Inoota
^ Naari: “mwiiphe sa mmwiilini mwanyu.”
^ Mu Ekriki, porneiya. Moone Masu Atharihiwe.
^ Naari: “meecelo anyu tho yaari awiihiiha.”
^ Naari: “vaavaa mwaakhalaanyu mmukhalelo yoole.”
^ Mu Ekriki, “muchu akhalai.”
^ “Nammawaani” ooniherya muchu ohiri ampoomani.
^ Naari: “wiiyeviha wa mmuupuweloni.”
^ Naari: “ovareryeke murima anyu.”
^ Naari: “olopolana.”
^ Naari: “muhikhaleke oowali.”
^ Naari: “muhaaroxeke; muhaanyeenyeiheke.”
^ Naari: “ehikhaleke oohica.”
^ Mu Ekriki, “oomuchu.”
^ Mu Ekriki, “muhilapeke wi mooniwe ti achu.”
^ Moone Masu Atharihiwe, “Okumi.”
