Aroma 5:1-21
5 Vano neeriwaahu awookololowa murima wa nthowa na nroromelo, hankooni nipuhe murecele* ni Muluku moorweela wa Apwiya ahu Yesu Kristu.
2 Nroromelo nahu mwa Yesu ninnaneeriha omwaacamela Muluku ni opuha mahala awe matokweene. Nnanwerya ohakalala* woona wi nookhalano ewehereryo ya waakhela ncicimiho noorweela wa Muluku.
3 Ohiya yeeyoru, nihakalaleke* tho vaavaa nnakumanaahuno soohooxa, woona wi noosuwela wi yoohooxa ennaruuha ovilela;
4 ovilela, onnaruuha mukhalelo wa weemereryiwa; mukhalelo wa weemereryiwa, onnaruuha ewehereryo,
5 nave ewehereryo henanlamwiha; woona wi osivela wa Muluku woomiineliwa mmurimani mwahu moorweela wa munepa waweela, yoowo nivahiwaahu.
6 Mweeparipari, vaavaa naaryaahu alipa ooceecheya, Kristu aakhwa wa nthowa na alipa oonanara murima mweelukuluku yaalakeleliwe.
7 Ti woovila wi muchu akhwe wa nthowa na muchu awookololowa murima; naamwi akhweya muchu ahaalaka weererya wiileva okhwa wa nthowa na muchu aphaama.
8 Nto Muluku onnooniherya onisivela wawe, vookhwa Kristu wa nthowa na hiyo vaavaa naaryaahu alipa oocheka.
9 Vano neeriwaahu awookololowa murima moorweela wa nikhami na Yesu, nnanwerya ororomela chiryene wi nnarwa nivuluxiwa mu esara ya Muluku.
10 Tiwi vaavaa naaryaahu amwiicani, naahaataanihiwa ni Muluku moorweela wa okhwa wa Mwanawe. Moohikhwa minikwa nnamvuluxiwa moorweela wa okumi awe, vano naataanihiwaahu.
11 Ohiya yeeyoru, ninnahakalala tho mwa Muluku moorweela wa Apwiya ahu Yesu Kristu, mwa yoowo hiihaano naakhenlaahu waataanihiwa.
12 Nthowa na muchu mmoha pahi yoovolowa mweelaponi yoocheka, nave moorweela wa yoocheka woovolowa mweelaponi okhwa, hiihaa tho okhwa wohaaphwanya achu oothene ntakhara oothene yaacheka . . .
13 Woona wi yoocheka yaakhala mweelaponi nihaakumve Nlamulo, nyenya, naahikhalavo nlamulo haavo onasomeliwa wi oopaka yoocheka.
14 Okhwa waalamulela ntoko mwene ovinyerya wa Atamu ophiyerya wa Mose. Ophiyerya wi waahaalamulela yaawo yahaapanke yoocheka yoolikana ni yoocheka ya Atamu. Atamu aanalikana ni yoowo aahaala orwa ohoolo waya.
15 Nto yoovaha ya Muluku heri ntoko yoocheka.* Tiwi, waakhanle wi moorweela wa muchu mmoha ancipale aakhwa, hanka vooloca sa mahala matokweene a Muluku ni yoovaha awe moorweela wa mahala matokweene a muchu mmoha, Yesu Kristu, chiri enamwaaphwanya ancipale!
16 Nave tho, heneereya hiihaa ni yoovaha ntoko yeeren’yaaya moorweela wa yoole ochenke. Tiwi, othoriha yoowo waaruule yeeren’ye yoohesa emoha waari olakiwa, nyenya yoovaha yeeyo yaaruule seeren’ye soohesa sincipale waari weeriwa awookololowa.
17 Okhwa woolamulela ntoko mwene moorweela wa yoocheka ya muchu mmoha. Nto opwaha yeeyo, yaale anaakhela mwawaacaxa mahala matokweene a Muluku, ni yoovaha awe yawookololowa enarwa ekhala akumi wi elamulele ntoko mamwene moorweela wa muchu mmoha, Yesu Kristu!
18 Ntoko yoocheka emoha enakumiheryaaya othorihiwa wa achu a mukhalelo woothene, hiihaa tho, muteko mmoha wawookololowa onnaweeriha achu a mukhalelo woothene weeriwa awookololowa murima wi yaakhele okumi.
19 Tiwi moorweela wa ohiiwelela wa muchu mmoha ancipale anneeriwa alipa oocheka, hiihaa tho, moorweela wa wiiwelela wa muchu mmoha, ancipale enarwa yeeriwa awookololowa.
20 Vano Nlamulo naavahiwa wi nooniherye wi achu aatepa ocheka. Nto vaavaa woonen’yaaya wi soocheka sootepa waaca, mahala matokweene a Muluku ti yaatempaaya waaca.
21 Ni yoolakelela taani? Wi hiihaa ntoko ocheka waalamunlaaya ntoko mwene vamoha ni okhwa, hiihaa tho mahala matokweene elamule ntoko mwene moorweela wa wookololowa ekerihaka wookumini woohimala moorweela wa Yesu Kristu Apwiya ahu.
Inoota
^ Naari akhweya: “hiyaano nookhalano murecele.”
^ Naari akhweya: “ninnahakalala.”
^ Naari akhweya: “ninnahakalala.”
^ Ela tiwi yoocheka ya Atamu.
